တီႉလႆႈၶိူင်ႈၵွင်ႈၵၢင်ႇ ၶွင်တပ်ႉသိုၵ်းတဢၢင်း တီႈႁိမ်းဝၢၼ်ႈႁူဝ်မိူင်း ဢိူင်ႇႁူးၶိၼ်း ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်း ႁွင်ႇ။
ဝၼ်းတီႈ 23/11/2019 တပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ တီႉလႆႈၶိူင်ႈၵွင်ႈၵၢင်ႇ ၶွင်တပ်ႉသိုၵ်းတဢၢင်း TNLA တီႈ ႁိမ်းဝၢၼ်ႈႁူဝ်မိူင်း ဢိူင်ႇႁူးၶိၼ်း ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ။ ၵူတ်ႇထတ်းတီႉလႆႈ ၶိူင်ႈၵွင်ႈၵၢင်ႇ မိူဝ်ႈဝၼ်း တီႈ 22/11/2019 ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ၶိူင်ႈၵွင်ႈၵၢင်ႇ ဢၼ်တီႉလႆႈၼၼ်ႉ ပဵၼ် FN – 6 ၵွင်ႈယိုဝ်းၶိူင်ႈမိၼ် 1 လဝ်း၊ ၶိူင်ႈ ၵွင်ႈၵၢင်ႇ 170 လဝ်း၊ မၢၵ်ႇၵွင်ႈတင်းမူတ်း 8 သႅၼ်လႄႈ ၶူဝ်းၼုင်ႈၶွင်တပ်ႉသိုၵ်းတဢၢင်း ၸိူဝ်းၼႆႉ” ဝႃႈၼႆ။
တႃႉဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ “ တပ်ႉသိုၵ်းမၢၼ်ႈ တီႉၵႂႃႇ ၶိူင်ႈၵွင်ႈၵၢင်ႇ ႁဝ်းၶႃႈတႄႉ ၸႂ်ႈ ၶႃႈဢေႃႈ။ ၵူၺ်းၵႃႈ ၶဝ်တီႉၵႂႃႇၵႃႈႁိုဝ်တႄႉ ဢမ်ႇလႆႈႁူႉ” ဝႃႈၼႆ။
“ ဢိင်ၼိူဝ် လွင်ႈသိုၵ်းလူင်ပွင်ၸိုင်ႈမၢၼ်ႈ တီႉလႆႈ ၶိူင်ႈၵွင်ႈၵၢင်ႇ ၶွင်တပ်ႉသိုၵ်းတဢၢင်းၸိူဝ်းၼႆႉ ဢမ်ႇႁိုင်သင် လႅပ်ႈတေ ပဵၼ်ပၢင်တိုၵ်းၵၼ်ႁၢဝ်ႈႁႅင်းမႃးထႅင်ႈယူႇ” ၵူၼ်းမိူင်းပိုၼ်ႉတီႈ ၼမ်ႉသၼ်ႇ လၢတ်ႈၼႄၼင်ႇၼႆ။
