မၢၵ်ႇလူင်တူၵ်းသႂ်ႇႁိူၼ်းၵူၼ်းၼႂ်းဝဵင်းလႃႈသဵဝ်ႈ လႄႈ ၶမ်ႈၼႆႉသိုၵ်းမၢၼ်ႈပိၵ်ႉတၢင်းလၢႆလၢႆသဵၼ်ႈ

မိူဝ်ႈၼႆႉ ဝၼ်းတီႈ 16/11/2019 တွၼ်ႈၼႂ် ၸုမ်းဢူၺ်းလီသိုၵ်းပွတ်းႁွင်ႇ မႃးယူႇတၢင်းလွႆသၢႆး ႁူဝ်လွႆၸၢင်ႉ သေ ပွႆႇမၢၵ်ႇသႂ်ႇၼႂ်းဝဵင်းလႃႈသဵဝ်ႈလၢႆလုၵ်ႈ – တူၵ်းၼႂ်းပွၵ်ႉၵဝ်ႇ၊ ႁိမ်းၶူင်ႇႁိူဝ်းမိၼ်၊ ႁိမ်းတပ်ႉသိုၵ်းမၢၼ်ႈၸိူဝ်းၼႆႉလႄႈ ၶမ်ႈၼႆႉ ၾၢႆႇၸုမ်းသိုၵ်းမၢၼ်ႈ ၶဵင်ႈၶႅင်လွင်ႈႁူမ်ႇလူမ်ႈ ၵူတ်ႇထတ်းၵူၼ်းၵႂႃႇမႃး။

ၶမ်ႈၼႆႉ တင်ႈတႄႇ မွၵ်ႈ 8 မူင်း ၸုမ်းသိုၵ်းမၢၼ်ႈ ပိၵ်ႉတၢင်းတမ်းလွင်ႈႁူမ်ႇလူမ်ႇ ႁိမ်းပွၵ်ႉၸၢင်ႈလဵၵ်း သဵၼ်ႈတၢင်း လူင် လုၵ်ႉလႃႈသဵဝ်ႈလူင်ၵႂႃႇ ပၢင်ႇႁိူဝ်းမိၼ် တႃႈရူတ်ႉၾႆး၊ ပိတ်ႉတီႈ တၢင်းၽႄ လုၵ်ႉသၢမ်ယႅၵ်ႈၼမ်ႉတူႈ ၵႂႃႇၸူးလုမ်း တိူင်းသိုၵ်း၊ သဵၼ်ႈတၢင်း လုၵ်ႉ တီႇပၢင်ႇလဵၼ်ႈႁႅင်း ၵႂႃႇတၢင်းႁေႃၵဝ်ႈလင် ၸိူဝ်းၼႆႉ ပိၵ်ႉဢိုတ်းသဵၼ်ႈတၢင်း ၵူတ်ႇထတ်းၵူၼ်းၵႂႃႇမႃး ၼႂ်းပိုၼ်ႉတီႈ။

“ၶဝ်ပိၵ်ႉတၢင်း ႁိမ်းတႄႇတီႈၶၢႆမႆႉ ပွၵ်ႉၸၢင်ႈလဵၵ်းၼၼ်ႉၵမ်းလဵဝ်ယဝ်ႉ၊ သဵၼ်ႈတၢင်း လွႆယဵဝ်ႈ ပူႇတႃႇ သမ်ႉ ပိၵ်ႉတၢင်းပွၵ်ႉၶၢႆးႁဵဝ်း ႁိမ်းၸၼ်ႉၸွမ်ၼၼ်ႉၶႃႈၼေႈ” – ၸၢႆးဢၢႆႈၶမ်း လုၵ်ႈႁဵၼ်းၸၼ်ႉၸွမ်လႃႈသဵဝ်ႈ လၢတ်ႈ။

မိူဝ်ႈၼႆႉၵၢင်ၼႂ် ၸုမ်းဢူၺ်းလီသိုၵ်းပွတ်းႁွင်ႇ မႃးယူႇ ႁိမ်းၵွင်းလွႆသၢႆး ၾၢႆႇလင်တႃႈရူတ်ႉၾႆးသေ ယိုဝ်း၊ မၢၵ်ႇလူင် တူၵ်းသႂ်ႇ ၼႂ်းပွၵ်ႉ 9 သွင်လုၵ်ႈ တိူဝ်ႉၺႃးၵူၼ်းမၢတ်ႇၸဵပ်းၵေႃႉၼိုင်ႈ၊ ႁိူၼ်း၊ ၵႃး ၸိူဝ်းၼႆႉၵေႃႈတိူဝ်ႉပႃး။

“ၶဝ်မႃးယူႇတီႈလွႆသၢႆးသေ ယိုဝ်းၼၼ်ႉၼႃႇ ပေႃးလွႆသၢႆးသုင်ဢိတ်းတႄႉ တေယိုဝ်းထိုင် ဝၢင်းလိုင်ႇပျၢၼ်ႇယူႇ၊ ၵွပ်ႈၼၼ် မိူဝ်ႈၼႆႉ ဝၢင်းလိုင်ႇပျၢၼ်ႇၵေႃႈ လႆႈပိၵ်ႉပႅတ်ႈဢေႃႈ ။ ဢမ်ႇပၼ်ၶိုၼ်ႈပၼ်လူင်းယဝ်ႉ” – ၼႆ ၸၢႆးသႂ် ဢၼ်လုၵ်ႉလႃႈ သဵဝ်ႈ ဢၢင်ႇဢွၵ်ႇၶၢဝ်းတၢင်း ၵႂႃႇတႃႈၶီႈလဵၵ်းၼၼ်ႉလၢတ်ႈ။

ၵူၺ်းၵႃႈၵဵဝ်ႇၵပ်းလွင်ႈၼႆႉသေ ၽူႈတွႆႇႁွၵ်ႈလႆႈၵပ်းၾူၼ်းၸူးၽူႈၶၢၼ်ပၢၵ်ႇ TNLA တႃႇတွင်ႈထၢမ်။ ၵူၺ်းၵႃႈပိၵ်ႉၾူၼ်းဝႆႉလႄႈ ၵပ်းဢမ်ႇလႆႈ။

ဝၢႆး ၸုမ်းသိုၵ်းဢူၺ်းလီပွတ်းႁွင်ႇ တၢင်း သိုၵ်းလူင်ပွင်ၸိုင်ႈမၢၼ်ႈ   သွင်ၸုမ်း ႁူပ်ႉဢုပ်ႇၵၼ် တီႈၵဵင်းတုင်ယဝ်ႉ ပၢင်တိုၵ်းၼႂ်းဝူင်ႈၵၢင်သွင်ၸုမ်း ပဵၼ်ယူႇပဵၼ်တီႈပဵၼ်တီႈသေတႃႉ  ဢမ်ႇပေႃး ႁႅင်းယႂ်ႇၵႃႈႁိုဝ်၊ တႄႇဢဝ်ႁူဝ်လိူၼ် ၼူဝ်ႊဝႅမ်ႊပိူဝ်ႊၼႆႉမႃးၸင်ႇ   ၼႂ်းၸႄႈဝဵင်းၵျွၵ်ႉမႄး၊ သီႇပေႃႉ၊ ၵူတ်ႉၶၢႆ ၸိူဝ်းၼႆႉ သဵင်ၵွင်ႈတႅၵ်ႇၵူႈဝၼ်း၊ သဵၼ်ႈတၢင်းၵႃး မူႇၸေႊ – လႃႈသဵဝ်ႈ ၵေႃႈ ၺႃးၸုမ်းယိပ်းၵွင်ႈ တတ်းႁႅတ်ႉ ဢႅပ်ႇသွၼ်ႉ  ဢဝ်ႁဵတ်းတီႈႁႄႉ သေ လေႃႇတိုၵ်းၵၼ်မႃးၵေႃႈမီး။