တပ်ႉသိုၵ်းလူင်ပွင်ၸိုင်ႈမၢၼ်ႈ လႄႈ တပ်ႉသိုၵ်းဝႃႉ ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းၸႄႈဝဵင်းမိူင်းယၢင်း၊ မိူင်းၶၢၵ်ႇၼၼ်ႉ လၢမ်းၸူးၼႃႈလိၼ်ၶိုၵ်ႉတွၼ်းမၢႆသီႇ ထုင်ႉသိူဝ်လိုဝ်း – မိူင်းယၢင်း တင်ႈတႄႇဝၼ်းတီႈ 28 မႃး တေႃႇဝၼ်းမိူဝ်ႈၼႆႉ ယင်းပႆႇယဝ်ႉ လႅင်ႇၶၢဝ်ႇပိုၼ်ႉတီႈလၢတ်ႈၼႄ ၼင်ႇၼႆ။

ဝၼ်းတီႈ 23/10/2019 ပိဝ်ႇႁႃႇမူး မိူင်းၶၢၵ်ႇ ၸဝ်ႈသိုၵ်းလူင် သူႇရိင်ႇထုၼ်း ၸီႉသင်ႇတပ်ႉသိုၵ်းမၢၼ်ႈ ႁဵတ်းၵဵတ်ႉႁဵတ်းလၢၼ်ႇ တီႈမိူင်းငႅၼ်းၸဵင်ႇၸၢၼ်းဝၼ်းတူၵ်းမိူင်းၶၢၵ်ႇ ႁႄႉႁၢမ်ႈၵူတ်ႇထတ်းရူတ်ႉၵႃးဝႃႉ ဢမ်ႇပၼ်ၶဝ်ႈၼႂ်းၶူးၼႂ်းဝဵင်း။ ဝၼ်းတီႈ 25/10/2019 သိုၵ်းဝႃႉ တပ်ႉၸုမ်း 468 ၶဝ်ႈဝႅတ်ႉလွမ်ႉတပ်ႉ သိုၵ်းမၢၼ်ႈ ဢၼ်ပၵ်းသဝ်း ယူႇဝႆႉ ႁိမ်းဝၢၼ်ႈႁူဝ်ပုင်ႇ မိူင်းငႅၼ်း ထိုင်တီႈ သိုၵ်းလူင်ပွင်ၸိုင်ႈမၢၼ်ႈ ဢိုပ်းၶဝ်ႈသွင်ဝၼ်းၼႆပျီႇတုၸိတ်ႉ မိူင်းၶၢၵ်ႇ ဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈ။

ဝၼ်းတီႈ 27/10/2019  တူဝ်တႅၼ်းလုမ်းၵပ်းသၢၼ်ဝႃႉၵဵင်းတုင် ၵႂႃႇႁူပ်ႉဢုပ်ႇ ၽူႈၵွၼ်းတိူင်းသၢမ်ႇၸဵင် ၵဵင်းတုင် ၸွမ်ႁၢၼ်ၶိၼ်ႇလႅင်ႇသေ ထွၼ်ဢွၵ်ႇသိုၵ်းဢွၵ်ႇၼႂ်းပိုၼ်ႉတီႈ။ လွင်ႈၶဵင်ၶႅင်သွင်ၾၢႆႇ ဝူင်ႈၵၢင် သိုၵ်းမၢၼ်ႈ တင်းသိုၵ်းဝႃႉၵေႃႈ လူတ်းယွမ်းၵႂႃႇၽွင်ႈသေတႃႉ ၾၢႆႇသိုၵ်းလူင်ပွင်ၸိုင်ႈသမ်ႉတိုၵ်ႉၶဵင်ႈၶဵင် ၵူတ်ႇထတ်း ၵူၼ်းဝႃႉ သိုၵ်းဝႃႉ တၢင်းၶဝ်ႈဢွၵ်ႇ ဝဵင်းမိူင်းယၢင်း၊ ဝဵင်းမိူင်းၶၢၵ်ႇ။

“ဝၢႆးလင်ပၼ်ႁႃၼႆႉယဝ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈၵေႃႈ ၶဵင်ႈၶဵင်ဢဝ်ႁူမ်ႇလူမ်ႈ တၢင်းၶဝ်ႈ တၢင်းဢွၵ်ႇ ဝဵင်းမိူင်းၶၢၵ်ႇ၊ မိူင်းယၢင်း၊ ၵူတ်ႇထတ်း ပီႈၼွင်ႉဝႃႉ၊ သိုၵ်းဝႃႉ ၊ ၵႃးဝႃႉ ၸိူဝ်းၶဝ်ႈဢွၵ်ႇၵႂႃႇမႃး၊ ပေႃးပဵၼ် ဝႃႉ ၵမ်ႈၼမ် ဢမ်ႇပၼ်ၵႂႃႇမႃး၊ ၾၢႆႇဝႃႉၵေႃႈ ၶဵင်ႈၶႅင်လွင်ႈႁူမ်ႇလူမ်ႈ တၢင်းၶဝ်ႈဢွၵ်ႇ ဝဵင်းၼႂ်းၼႃႈလိၼ် ၶဝ်ၵုမ်းၵမ်ၶိုၼ်း  ၼၼ်ႉၶႃႈၼႃႇ’’– ၽူႈၵွၼ်းဢိူင်ႇ ၼႂ်းၸႄႈဝဵင်းမိူင်းယၢင်း ၵေႃႉၼိုင်ႈလၢတ်ႈ။

ထိုင်မႃး ဝၼ်းတီႈ 28/10/2019 ႁႅင်းသိုၵ်းဝႃႉ 30 ပၢႆ ပူၼ်ႉပႅၼ် ၶဝ်ႈၼႂ်းပိုၼ်ႉတီႈၸုမ်းမိူင်းလႃး ပွတ်း ဝၢၼ်ႈၼွင်ႁူၵ်း၊ ဝၢၼ်ႈၼမ်ႉ၊ ပႃႇသၢၼ်ႈ၊ ဝၢၼ်ႈၶဵၼ်း၊ ဝၢၼ်ႈၼမ်ႉယၢင်း ၸိူဝ်းၼႆႉလႄႈ ၾၢႆႇတၢင်းသိုၵ်း မိူင်းလႃး ၵႅတ်ႇဝႅတ်ႉၸုမ်းသိုၵ်းဝႃႉဝႆႉလႄႈ ထိုင်ၽူႈၼမ်းသွင်ၾၢႆႇ ႁူပ်ႉဢုပ်ႇၵႄႈလိတ်ႈၵၼ် ဝႆႉ သေတႃႉ တေႃႇထိုင်ဝၼ်းမိူဝ်ႈၼႆႉ ၸုမ်းဝႃႉ ယင်းပႆႇထွၼ် ပွၵ်ႈဝႃႈၼႆ။

ပူဝ်ႇဢၢႆႈၼပ်း ၽူႈမီးၸၼ်ႉၼႂ်းသိုၵ်းဝႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇၶေႃႈ ၸီႉသင်ႇတင်း ၼိူဝ်လႄႈ ႁဝ်းၶႃႈၵေႃႈလႆႈႁဵတ်းၸွမ်းၵူၺ်း ။ ၸုမ်းမိူင်းလႃးတင်းႁဝ်းၶႃႈၼႆႉ ယူႇမႃးမိူၼ်ပီႈမိူၼ်ၼွင်ႉ ၵၼ်လႄႈ ဢမ်ႇၶႂ်ႈၶဝ်ႈမႃး/ဢမ်ႇၶႂ်ႈႁဵတ်း။ မိူဝ်ႈၵႂႃႇဝႅတ်ႉတပ်ႉမၢၼ်ႈတီႈ မိူင်းငႅၼ်းၼၼ်ႉယင်းပႃးၸႂ်ပႃး ၶေႃးယူႇလႃႈ။ ယၢမ်းလဵဝ်ၶဝ်ႈမႃးၼႂ်းမိူင်းလႃးၼႆႉ သိုၵ်းမိူင်းလႃးၵေႃႈမႃးဝႅတ်ႉတပ်ႉႁဝ်းဝႆႉ ႁဝ်းၵေႃႈဢမ်ႇ ၶႂ်ႈယိုဝ်း။ တႃႇယိုဝ်းၵေႃႈ ဢမ်ႇလႆႈၶႂၢင်ႉ။ တလဵဝ် ၵူၼ်းလူင်သွင်ၾၢႆႇ တိုၵ်ႉဢုပ်ႇၵၼ်ယူႇလႆႈငိၼ်းၼင်ႇ ၼႆၶႃႈ”– ဝႃႈၼႆ။

မိူဝ်ႈပီ 2016 လိူၼ်သႅပ်ႉထႅမ်ႊပိူဝ်ႊ ဝၼ်းတီႈ 28 ၼၼ်ႉ သိုၵ်းဝႃႉဢဵၼ်ႁႅင်း 1000 ပၢႆ ၶဝ်ႈၼႂ်းၼႃႈလိၼ် မိူင်းလႃးသေ ယိုတ်းဢဝ်တပ်ႉပၢင်သဝ်းၶွင်မိူင်းလႃး 5 တီႈ။ ၽူႈၼမ်းသွင်ၾၢႆႇႁူပ်ႉဢုပ်ႇၵၼ်သေ ထွၼ်ဢွၵ်ႇၼႂ်းၵၢင်ပီ 2016 သေတႃႉ တပ်ႉပၢင်သဝ်း မွၼ်ႈသၢမ်သုမ်တႄႉ ႁၼ်ႉတေႃႇဝၼ်းမိူဝ်ႈၼႆႉ ယင်းပႆႇထွၼ်ဢွၵ်ႇပၼ်ၶိုၼ်း။ လူင်ပွင်ၸိုင်ႈမၢၼ်ႈၼေႇပျီႇတေႃႇၵေႃႈဝႃႈ ၸူဝ်ႈၸုမ်းသိုၵ်းဝႃႉ ဢမ်ႇ ထွၼ်ဢွၵ်ႇ တပ်ႉပၢင်သဝ်းလွႆသၢမ်သုမ် ၵဵၵ်ႉ/လၢၼ်ႇ ၶူဝ်တႃႈပိင်းၼၼ်ႉၵေႃႈ တိုၼ်းဢမ်ႇၸၢင်ႈပိုတ်ႇပၼ် ၶိုၼ်း- ဝႃႈၼႆဝႆႉ။