သဵင်ၵွင်ႈတႅၵ်ႇၼိူဝ်သဵၼ်ႈတၢင်းလူင်ၼႂ်းၵႄ ၵျွၵ်ႉမႄး-ၼွင်ၶဵဝ် ၵူၼ်းၵႂႃႇတႃႈပႆတၢင်း ၸဝ်ႈရူတ်ႉၸဝ်ႈၵႃးပေႃးလႆႈၵိုတ်းယင်ႉဝႆႉၸူဝ်ႈၶၢဝ်း။

ဝၼ်းတီႈ 4/11/2019 ယၢမ်းၵၢင်ဝၼ်းမွၵ်ႈ 12 မူင်းသဵင်ၵွင်ႈတႅၵ်ႇ    ၼႂ်းၵႄႈဝၢၼ်ႈပၢင်ႇတိုင် – ဝၢၼ်ႈၶၢႆးတူၼ်ႈႁုင်း ႁိမ်းၸမ်တၢင်းၽေ ၵွင်းမူးလႅင် ၼႂ်းၵႄႈ ၼွင် ၶဵဝ် – ၵျွၵ်ႉမႄး ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းပိုၼ်ႉတီႈဝႃႈ ပဵၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ယူႇၾၢႆႇ လဵဝ်သေယိုဝ်း   ဝႃႈၼႆ။

ဢူးတိၼ်ႇမွင်ႇတဵင်း ၸုမ်းၸိဝိတ ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ဢမ်ႇၸႂ်ႈ ပၢင်တိုၵ်း။ ယူႇတီႈၾၢႆႇတပ်ႉမတေႃႇ ၶဝ် ထၢင်ႇထိူမ်သေယိုဝ်းၵူၺ်း။ ၶဝ်ယိုဝ်းတႃႇလွင်ႈႁူမ်ႇလူမ်ႈၶဝ်ၵူၺ်း” ဝႃႈၼႆ။

ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “   ပဵၼ်ၾၢႆႇလႂ် တၢင်းၾၢႆႇလႂ် ယိုဝ်းၵၼ်တႄႉတႄႉ ဢမ်ႇလႆႈႁူႉၶႃႈ။ ႁိမ်းႁွမ်းၼၼ်ႉတႄႉမီးသိုၵ်း RCSS တူင်ႉၼိုင် ဝႆႉ။ ယွၼ်ႉလႆႈငိၼ်းသဵင်ၵွင်ႈသေ ရူတ်ႉၵႃးၵူၼ်းမိူင်းၶိုၼ်ႈလူင်း လႆႈၵိုတ်းဝႆႉၵမ်ႉၼိုင်ႈ။   ဢိင်ၼိူဝ် ၵၢၼ်ပိုတ်းယိုဝ်းၼၼ်ႉ လွင်ႈတုမ်ႉတိူဝ်ႉၵူၼ်းမိူင်းတႄႉ ပႆႇလႆႈႁူႉ” ဝႃႈၼႆ။

“ၼႂ်းၸႄႈဝဵင်းၵျွၵ်ႉမႄးႁဝ်းၶႃႈၼႆႉ ၵႆႉမီးလွင်ႈပိုတ်းယိုဝ်းၸိူင်ႉၼႆတႃႇသေႇ လွင်ႈႁူမ်ႇလူမ်ႈၵူၼ်းမိူင်းႁဝ်းၶႃႈ ဢမ်ႇမီး ပဵၼ်ဢၼ်မႆႈၸႂ် ၵူဝ်ယူႇတႃႇသေႇၶႃႈယဝ်ႉ” ၵူၼ်းမိူင်းၵျွၵ်ႉမႄးၵေႃႉၼိုင်ႈ လၢတ်ႈၼႄၼင်ႇၼႆ။

မိူဝ်ႈဝႃး ဝၼ်းတီႈ 3/11/2019 ယၢမ်းဝၢႆးဝၼ်း 2 မူင်းၶိုင်ႈၼၼ်ႉၵေႃႈ ၺႃးၸုမ်းဢမ်ႇႁူႉၾၢႆႇ ၶဝ်ႈယိုဝ်းၽူႈၵွၼ်းဢိူင်ႈမိူင်း တၢင်ႈ၊ ပူႇၵႄႇ ဝၢၼ်ႈၼႃးမူၼ်းလႄႈ ပူႇၵႄႇၵဝ်ႇ ဝၢၼ်ႈလွႆဢွႆႇ လႆႈလူႉတၢႆ တီႈႁၢၼ်ႉၶဝ်ႈၽၵ်း ၼမ်ႉၶူင်း ၸႄႈဝဵင်းၵျွၵ်ႉမႄး ဝႃႈၼႆ။