ၸုမ်းသိုၵ်းဢူၺ်းလီ 3 ၸုမ်း ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇဝႃႈ သိုၵ်းလူင်ပွင်ၸိုင်ႈမၢၼ်ႈ ၽိူမ်ႉႁႅင်းသိုၵ်း တူင်ႉၼိုင်ၶဝ်ႈၸူး ႁၢဝ်ႈႁႅင်းလႄႈ သင်ၸိူဝ်ႉပဵၼ်ပၼ်ႁႃမႃးၸိုင် ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ တၵ်းတေလႆႈ ဢဝ် ပုၼ်ႈၽွၼ်း ဝႃႈၼႆ။
ၶေႃႈပိုၼ်ၽၢဝ်ႇဢၼ်ၸုမ်းသိုၵ်းၵဝ်ႈၵၢင်ႉ MNDAA၊ သိုၵ်းတ ဢၢင်း(လွႆ) TNLA လႄႈ သိုၵ်းရၶႅင်ႇ AA ႁူမ်ႈၵၼ် ပိုၼ်ၽၢဝ်ႇ ဢွၵ်ႇဝႆႉမိူဝ်ႈဝၼ်းတီႈ 29/10/2019 ၼၼ်ႉတႅမ်ႈဝႆႉဝႃႈ တပ်ႉသိုၵ်းလူင်ပွင်ၸိုင်ႈမၢၼ်ႈ ၽိူမ်ႉထႅမ်ႁႅင်းသိုၵ်း ၶဝ်ႈတူင်ႉၼိုင် ႁၢဝ်ႈႁႅင်း ၼႂ်းၼႃႈတီႈတပ်ႉသိုၵ်းတဢၢင်း၊ ၵဝ်ႈၵၢင်ႉလႄႈ ရၶႅင်ႇ တူင်ႉၼိုင်ဝႆႉ။ သင်ဝႃႈ သိုၵ်းမၢၼ်ႈၽိူမ်ႉႁႅင်းသိုၵ်းၶဝ်ႈမႃး ၸိုင် ၸၢင်ႈလႆႈၵႅတ်ႇၵင်ႈတူဝ်ပိုတ်းယိုဝ်းယူႇ ပိုၼ်ၽၢဝ်ႇ တႅမ်ႈဝႆႉၼင်ႇၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ “ တေႃႈလဵဝ် ပၢင်တိုၵ်းဢၼ်ပဵၼ်ယူႇၼႂ်းမိူင်းႁူမ်ႈတုမ်ၼႆႉ ၼင်ႇႁိုဝ်တေၵိုတ်း၊ ၼင်ႇႁိုဝ် တေလူတ်းယွမ်း၊ လႆႈႁူပ်ႉထူပ်းဢုပ်ႇဢူဝ်းၵၼ်သေ လူင်းလၢႆးမိုဝ်း ၵိုတ်းတိုၵ်း (Bilateral Ceasefire Agreement)၊ လိူဝ်ၼၼ်ႉ မိူဝ်ႈဝၼ်းတီႈ 20 လိူၼ်သႅပ်ႊထႅမ်ႊပိူဝ်ႊ ဝၢႆးဢုပ်ႇၵၼ်တီႈၵဵင်းတုင် ယဝ်ႉၼၼ်ႉ ယူႇတီႈၸုမ်း သိုၵ်းဢူၺ်းလီ 3 ၸုမ်း ပိုၼ်ႈၽၢဝ်ႇၾၢႆႇလဵဝ်ဝႆႉ တေၵိုတ်းတိုၵ်း တေႃႇထိုင်ဝၼ်းတီႈ 31 လိူၼ်ၻီႊသႅမ်ႊပိူဝ်ႊသဵင်ႈ” ဝႃႈၼႆ။
ဢၼ်တပ်ႉသိုၵ်းလူင်ပွင်ၸိုင်ႈႁဵတ်းယူႇယၢမ်းလဵဝ်ၼႆႉ မၼ်းႁဵတ်းႁႂ်ႈပၢင်ႁူပ်ႉထူပ်းဢမ်ႇၶိုပ်ႈၼႃႈ ၵူၺ်းဢမ်ႇၵႃး ယင်းၶႂ်ႈၸၼ်ႁႂ်ႈႁူၼ်လင်ၶိုၼ်းသေ ယင်းတုမ်ႉတိူဝ်ႉပႃးလွင်ႈယုမ်ႇယမ်ၼႂ်းၵႄႈသွင်ၾၢႆႇ ဝႃႈၼႆ။
ၵွပ်ႈၼႆ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈတၵ်းလႆႈ ၵိုတ်းတိုၵ်းၽႂ်းၽႂ်းသေ ၸတ်းႁဵတ်းပၢင်ႁူပ်ႉထူပ်းဢုပ်ႇဢူဝ်းၵၼ် လူၺ်ႈၵၢင်ၸႂ်ၽိူၵ်ႇၸိုၼ်ႈၶၢဝ်သႂ် ဝႃႈၼႆ။
မိူဝ်ႈဝၼ်းတီႈ 28/10/2019 ဝၼ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA ၶွပ်ႈ တဵမ် 4 ပီတဵမ်ၼၼ်ႉ ၽူႈၵွၼ်းသိုၵ်းသုင်သုတ်းတပ်ႉသိုၵ်းလူင်ပွင်ၸိုင်ႈ မၢၼ်ႈၸွမ်ၸိၵ်းသိုၵ်းလူင်မိၼ်းဢွင်ႇလၢႆႇဝႃႈ မိူဝ်ႈ ၼႂ်းၵၢင်လိူၼ်ဢေႃႊၵတ်ႊသ်ၼၼ်ႉ ဢၼ်ၸုမ်းသိုၵ်းဢူၺ်းလီ 3 ၸုမ်း ၶဝ်ႈယိုဝ်း တီႈပၢင်ဢူႈ၊ ၼွင်ၶဵဝ်၊ လႃႈသဵဝ်ႈလႄႈ ၵူတ်ႉၶၢႆ ၸိူဝ်းၼၼ်ႉ “ မၼ်းပဵၼ်သုၼ်ႇလႆႈသုၼ်ႇပဵၼ် ၸၢဝ်းၶိူဝ်းႁႃႉ” ထၢမ်ဝႆႉၸိူင်ႉၼႆ။
