(ၸၢႆးဢိူမ်ႈၾႃႉ -သူင်ႇၶၢဝ်ႇ ) သိုၵ်းလူင်ပွင်ၸိုင်ႈမၢၼ်ႈ တၢင်းသိုၵ်း TNLA ပဵၼ်ပၢင်တိုၵ်းၵၼ် ၼႂ်းဢိူင်ႇႁူဝ်ၼႃး ၸႄႈဝဵင်းၼမ်ႉၶမ်း ၸိူင်ႈတႆးပွတ်းႁွင်ႇ။
ဝၼ်းတီႈ 22/10/2019 ယၢမ်းၵၢင်ၼႂ် 7 မူင်းၶိုင်ႈ သိုၵ်းလွႆ TNLA လႆႈပဵၼ်ပၢင်တိုၵ်းၵၼ် တင်းသိုၵ်း လူင်ပွင်ၸိုင်ႈမၢၼ်ႈ တီႈႁိမ်းၸမ်ႁူင်းသဝ်းၸုမ်းပီႇတုၸိတ်ႉ ဢိူင်ႇႁူဝ်ၼႃး ဝၢၼ်ႈပၢင်ႇၶႃး ၸဵင်ႇၸၢၼ်း ဝၼ်းဢွၵ်ႇ ဝဵင်းၼမ်ႉၶမ်း ။
ၸၢႆးဢွင်ႇမိၼ်ႇ ၸဝ်ႈႁႆႈၸဝ်ႈၼႃး ဝဵင်းၼမ်ႉၶမ်းလၢတ်ႈဝႃႈ “ သိုၵ်းလွႆ လူင်းမႃးတၢင်းတပ်ႉပၢင်သဝ်း သိုၵ်း ပီႇတုၸိတ်ႉ ။ လႆႈယိုဝ်းၵၼ်တင်းသိုၵ်းမၢၼ်ႈၵမ်းၼိုင်ႈသေ သိုၵ်းလွႆ ၶိုၼ်းထွႆၵႂႃႇ။ ဝၢႆးၼၼ်ႉတႄႉ ယူႇယူႇ လႆႈငိၼ်း သဵင်ၵွင်ႈမေႃးၾၢႆႇလဵဝ်ၵူၺ်းယဝ်ႈ ” ဝႃႈၼႆ။
ဝၢၼ်ႈပၢင်ႇၶႃးမီး ၸဵင်ၸၢၼ်းဝၼ်း ဢွၵ်ႇဝဵင်းၼမ်ႉၶမ်း ယၢၼ်ၵႆမွၵ်ႈ 2 လၵ်း။
ၵဵဝ်ႇၵပ်းလွင်ႈယိုဝ်းၵၼ်ၼႆႉသေ ၵူၼ်ႈဝၢၼ်ႈၼႂ်း ဝၢၼ်ႈပၢင်ႇၶႃးတႄႉ ဢမ်ႇမီးလွင်ႈမၢတ်ႇ ၸဵပ်း ဢမ်ႇ မီးၽႂ်ပၢႆႈၽေးသိုၵ်း ဝႃႈၼႆ။
သိုၵ်း TNLA ပိုၼ်ၽၢဝ်ႇဝႃႈ ယွၼ်ႉပိူဝ်ႈသိုၵ်းလူင်ပွင်ၸိုင်ႈ ပူၼ်ႉပႅၼ်ၶဝ်ႈတဝ်ၼႂ်းၼႃႈလိၼ်TNLA တူင်ႉၼိုင်လႄႈ ၸင်ႇလႆႈႁႅၼ်းသိုၵ်းမႃးပိုတ်းယိုဝ်း။ ပၢင်တိုၵ်းၼႆႉ သိုၵ်း TNLA တူၵ်းသုမ်း 1 ၵေႃႉ။ ၾၢႆႇသိုၵ်းလူင်ပွင်ၸိုင်ႈတႄႉ လွင်ႈတၢႆမၢတ်ႇဢမ်ႇလႆႈႁူႉၸွမ်းဝႃႈၼႆ။
ၼႂ်းၸႄႈဝဵင်းၼမ်ႉၶမ်းၼႆႉ ၸုမ်းယိပ်းၵွင်ႈၵၢင်ႇတင်းသိုၵ်းလူင်ပွင်ၸိုင်ႈမၢၼ်ႈပဵၼ်ပၢင်တိုၵ်းၵၼ် ၊ သိုၵ်းၵူၼ်းမိူင်း ၵေႃႈမီးလၢႆမူႇလၢႆၸုမ်းလႄႈ ၵူၼ်းဝၢၼ်ႈၵႂႃႇမႃးႁဵတ်းၵၢၼ်လႆႈၾၢင်ႉတူဝ်ယူႇတႃႇသေႇ။
