ႁၢင်ပီႈ 2019 ၼႆႉ ၶႄႇ ထႆး ၼပ်ႉႁူဝ်မိုၼ်ႇၶဝ်ႈမႃး ၼႂ်းဝဵင်းတႃႈၶီႈလဵၵ်းသေ ႁဵတ်းၵၢၼ်ပၢႆးမၢၵ်ႈမီး – ၵၢၼ်တေႃႇလွင်း၊ ၵၢၼ်ႁူင်းႁႅမ်း၊ ၵၢၼ်ပႂ်ႉၶွမ်ႊၽိဝ်ႊတိူဝ်ႊ တွပ်ႇလၢတ်ႈၵၢၼ်လဵၼ်ႈလွင်း ၼိူဝ် ဢွၼ်ႊလၢႆႊ Internet ၸိူဝ်းၼႆႉ ။
ႁွင်ႈၵၢၼ်လူင် ၾၢႆႇ တွင်ႈတဵဝ်းဢႅဝ်ႇယဵမ်ႈ လႄႈ ၵၢၼ်ႁူင်းႁႅမ်း မိူင်းႁူမ်ႈတုမ်မၢၼ်ႈ လူင်ပွင်ၸိုင်ႈ ၼေႇပျီႇတေႃႇ ပိုၼ်ၽၢဝ်ႇဝႃႈ – တင်ႈတႄႇ ဝၼ်းတီႈ 4/10/2019 တေႃႇ ဝၼ်းတီႈ 17/10/2019 ၶၢဝ်း တၢင်းသွင်ဝူင်ႈ မီးၶႅၵ်ႇၶဝ်ႈ/ဢွၵ်ႇ လိုဝ်ႈသဝ်း 50000 ၵေႃႉ ပၢႆ ၼႆသေ တႃႉ ၵူၼ်းႁဵတ်းၵၢၼ် ႁူင်းႁႅမ်း ၼႂ်းဝဵင်းတႃႈၶီႈလဵၵ်းလၢတ်ႈဝႃႈ ၶႄႇဝၢင်းၽႅၼ် တေမႃး ႁဵတ်းၵၢၼ် ႁူင်းႁႅမ်း လႄႈ ၵၢၼ်တေႃႇ လွင်း တီႈတႃႈၶီႈလဵၵ်း ၊ တေႃႇပီၼႆႉသဵင်ႈတေမႃးၼပ်ႉႁူဝ်မိုၼ်ႇၵေႃႉ – ဝႃႈ ၼႆ။
“ ဢၼ်ႁဝ်းၶႃႈ လႆႈႁူႉ တေႃႇပီၼႆႉသဵင်ႈ ၶႄႇ တေၶဝ်ႈမႃး တႃႈၶီႈလဵၵ်း 6 မိုၼ်ၵေႃႉ။ ယၢမ်း လဵဝ် မီး 3 မိုၼ်ႇပၢႆ ယဝ်ႉ။ ႁူင်းႁႅမ်း ၶႃႈၵေႃႈ ၶဝ်မႃးၶၢတ်ႈဝႆႉတႃႇ 12 ပီ ဢေႃႈ” – ၼႆ ၸဝ်ႈၶွင် ႁူင်းႁႅမ်း ဢၼ်ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈလၢတ်ႈ။
ၵူၼ်းၶႄႇ ၵမ်ႈၼမ် လႆႈႁူႉဝႃႈ မႃးမဝ် ဢဝ်ႁူင်းႁႅမ်း သေ ႁဵတ်းၸဝ်ႈၶွင် ပၢင်လွင်း။ ၵူၼ်းၼုမ်ႇထႆး တင်း ၵူၼ်းၼုမ်ႇတႆး ၼပ်ႉႁူဝ်ႁဵင် တႄႉ ပႂ်ႉၶွမ်ႊၽိဝ်ႊတိူဝ်ႊ ပၢင်လွင်း ၼႂ်းၶွမ်ႊပိဝ်ႊတိူဝ်ႊ ။
“ၼိုင်ႈလိူၼ် ၼႆႉ တီႈဢေႇသုတ်း လႆႈငိုၼ်း မွၵ်ႈ 3 မိုၼ် ဝၢတ်ႇယူႇၶႃႈ။ လူဝ်ႇမေႃ ၵႂၢမ်းထႆး သေ ပေႃးပိူၼ်ႈ လဵၼ်ႈမႃး ထၢမ်မႃး လူဝ်ႇတွပ်ႇပၼ်ၼၼ်ႉၶႃႈၼႃႇၼေႃ။ မၢဝ်ႇဢွၼ်ႇ သၢဝ်ဢွၼ်ႇ တၢင်းၾၢႆႇမိူင်းထႆး ၵေႃႈ မႃးၵိၼ်ၸၢင်ႈပႂ်ႉၼမ်ၵျႃႉဢေႃႈ။ ၼိုင်ႈဝၼ်းၼိုင်ႈဝၼ်းၼႆႉ ၵႂႃႇပႂ်ႉတူၺ်းတီႈႁူဝ်ၶူဝ်ၶႃႈလေႃႇ၊ ၶၢဝ်း ပိုတ်ႇၶူဝ် ပိၵ်ႉၶူဝ် ၶဝ်ႈဢွၵ်ႇ ၼမ်တႄႉၶႃႈ” – ၸၢႆးၼွႆႉ ဢႃႇယု 19 ပီ မေႃၵႂၢမ်းထႆး လိၵ်ႈထႆးသေ ပႂ်ႉပၢင်လွင်းၼၼ်ႉလၢတ်ႈ ။
ဝဵင်းတႃႈၶီႈလဵၵ်းၼႆႉ ပဵၼ်ဝဵင်းၵႃႉၶၢႆ – ၵူၼ်းၸႃႇတီႉ မီးတႆး၊ လႃးႁူႇ၊ ဢၶႃႇ ၊ ၵူၼ်းဢၼ်ၶဝ်ႈမႃး ႁဵတ်းၵၢၼ်ပၢႆးမၢၵ်ႈမီးတႄႉ ၶႄႇ ၊ ထႆး၊ ၵြႃး။ မၢၼ်ႈတႄႉ မိူဝ်ႈဢွၼ်တၢင်း မႃးၸွမ်းၼႃႈတီႈ ပုၼ်ႈၽွၼ်း ၶႃႈႁၢပ်ႇၵၢၼ်လူင်ပွင်ၸိုင်ႈ။ ယၢမ်းလဵဝ် မႃးႁႃႁဵတ်းၵၢၼ် ၸွမ်းဝၼ်း မီးထိုင်ၼပ်ႉႁူဝ်မိုၼ်ႇ။ ယွၼ်ႉပဵၼ်ဝဵင်း ႁႃငိုၼ်းငၢႆႈ ႁဵတ်းၵၢၼ်ၼွၵ်ႈမၢႆမီႈ – မိူၼ်ၼင်ႇ ပၢင်တေႃႇလွင်း၊ ၵႃႉၶၢႆ ယႃႈမဝ်း ၵမ် ၸိူဝ်းၼႆႉလိူင်ႇလႄႈ ၵူၼ်းၵိုၼ်းငိုၼ်းၶွၼ်ႈ ပၼ်ႁႃၶႃႈႁႅမ်ၵၼ်တၢႆ ၵေႃႈၵႆႉၵႆႉ ၵိူတ်ႇၶိုၼ်ႈ။
