မိူဝ်ႈၼႆႉ ဝၼ်းတီႈ 20/10/2019 ယၢမ်းႁူဝ်ၶမ်ႈ မွၵ်ႈ 6:45 မူင်းၼၼ်ႉ ၵူၼ်းႁၢႆႉ ၶဝ်ႈယိုဝ်း ၸဝ်ႈတူၼ်ၶူး ပၺ်ၺႃၸေႃးတ ၽူႈၵွၼ်းဝတ်ႉၶိူဝ်းၼိမ်း ဢႃယု 45 ပီ ဝႃႇသႃ 25 ဝႃႇ တီႈၼႂ်းဝၢင်းဝတ်ႉၶိူဝ်းၼိမ်း ဢိူင်ႇၶိူဝ်းၼိမ်း ၸႄ  ႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ။

ၸၢႆးႁၢၼ်ႇ ႁူဝ်ပဝ်ႈ ၸုမ်းၵူၼ်းၼုမ်ႇတႆး TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၸဝ်ႈသြႃႇႁဝ်း ၺႃးယိုဝ်း၊ 5 ႁွႆးသေ လႆႈလွၼ်ႇၵႂႃႇထင်တီႈၵမ်းလဵဝ်ၶႃႈယဝ်ႉ။ မိူဝ်ႈၽွင်းၼၼ်ႉ မီးၵူၼ်း 2 ၵေႃႉ ၶီႇရူတ်ႉၶိူင်ႈမႃးသေ ဢဝ် ၵွင်ႈ ယိုဝ်းသႂ်ႇ ၸဝ်ႈသြႃႇၵမ်းလဵဝ်။ ၵူၼ်းဢၼ်မႃးယိုဝ်းပဵၼ်ၽႂ် ၸုမ်းလႂ် ဢၼ်ဝႃႈၼၼ်ႉ ဢမ်ႇလႆႈႁူႉၶႃႈ” ဝႃႈၼႆ။

ၸဝ်ႈတူၼ်ၶူး ပၺ်ၺႃၸေႃးတၼႆႉ ၺႃးမၢၵ်ႇၵွင်ႈ 5 ႁွႆး – တီႈၵွၵ်းႁူဝ်၊ တႃ၊ ၼႃႈဢူၵ်း ၸဵမ်ၸိူဝ်းၼႆႉ။ တေႃႈ လဵဝ် ၶၢပ်ႈတူဝ်ၸဝ်ႈ ဢဝ်ၵႂႃႇၵူတ်ႇထတ်း တီႈႁူင်းယႃလူင် လႃႈသဵဝ်ႈဝႆႉယဝ်ႉ။

“ မိူဝ်ႈၽွင်းၸဝ်ႈသြႃႇၺႃးယိုဝ်းၼၼ်ႉ သင်ၶၸဝ်ႈ တင်းၵၢၼ်ႇတင်းၵျွင်း ဢွၼ်ၵၼ်ၼင်ႈ ဝႆႈၽြႃး/ ၼင်ႈ တြႃးၵၼ်ယူႇ ၸဝ်ႈသြႃႇသမ်ႉ ပႆသၢင်းၵျၢၼ်ႇၸွမ်းသၢင်ႇဝၢင်ႇ တီႈၵျွင်းၶိူဝ်းၼိမ်း။ ၸဝ်ႈသြႃႇ လုၵ်ႉတၢင်းၶူဝ်လႆ တၢင်းႁွင်ႇ ပႆႇမႃးၸူးတၢင်းၸၢၼ်း မီးၵူၼ်းသွင်ၵေႃႉ ၼုင်ႈၶူဝ်းၵူၼ်းႁိူၼ်းသေ ၶီႇရူတ်ႉၶိူင်ႈမႃး ၵိုတ်းၼွၵ်ႈဝၢင်းၵျွင်း ယၢၼ်မွၵ်ႈ 8-9 ဝႃးၼႆႉ ယိုဝ်းသႂ်ႇၸဝ်ႈ သြႃႇ  ”  – ၸၢႆးႁၢၼ်ႇ လၢတ်ႈ ၼႄၼင်ႇၼႆ။

ၸဝ်ႈတူၼ်ၶူး ပၺ်ၺႃၸေႃးတၼႆႉ တႄႇၼင်ႈဝတ်ႉၶိူဝ်းၼိမ်းၼႆႉမႃး တင်ႈတႄႇပီ 2003 မႃးတေႃႇထိုင်မိူဝ်ႈလဵဝ် တင်းမူတ်း မီး 16 ပီယဝ်ႉ။   ပဵၼ်ၸဝ်ႈတူၼ်ထိ 5 ဢၼ်ၼင်ႈဝတ်ႉၶိူဝ်းၼိမ်းၼႆႉ။ ဝၢၼ်ႈၶိူဝ်းၼိမ်းၼႆႉ ပဵၼ်ၼႂ်းဢိူင်ႇၶိူဝ်းၼိမ်း ယၢၼ်ဝဵင်းလႃႈသဵဝ်ႈ မွၵ်ႈ 10 လၵ်း မီးၵႄႈ လႃႈသဵဝ်ႈ – သီႇပေႃႉ ။