တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်းပဵၼ်ပၢင်တိုၵ်းၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇထႅင်ႈ။

မိူဝ်ႈၼႆႉ ဝၼ်းတီႈ 16/10/2019 ယၢမ်းၵၢင်ၼႂ် 6 မူင်း သွင်ၾၢႆႇပဵၼ်ပၢင်တိုၵ်းၵၼ် ႁိမ်းဝဵင်းၵူတ်ႉၶၢႆ ၾၢႆႇတပ်ႉသိုၵ်း တဢၢင်း လႆႈလူႉတၢႆ 1 ၵေႃႉ။ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ လႆႈလူႉတၢႆ 3 ၵေႃႉ ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်း TNLA ပိုၼ်ၽၢဝ်ႇဝႆႉၼင်ႇၼႆ။

တေႃႇလွႆၺွႆႇ ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉၵၢင်ၼႂ် လႆႈငိၼ်းသဵင်ၵွင်ႈလူင်၊ သဵင်ၵွင်ႈဢွၼ်ႇတႅၵ်ႇ။ ႁဝ်း ၶႃႈ ၵူၼ်းဝၢၼ်ႈ ဢွၼ်ၵၼ်ၵူဝ်ၶႃႈဢေႃႈ။ ပၢင်တိုၵ်းၼႆႉ ဢမ်ႇပဵၼ်ၼႂ်းဝဵင်းၵူတ်ႉၶၢႆသေတႃႉ လႆႈငိၼ်းသဵင်ၵွင်ႈႁႅင်းၼႃႇ လႄႈ ၼႅတ်ႈဢွၼ်ၵၼ်ပၢႆႈၵႂႃႇမူၵ်းၼႂ်းလုၵ်းလိၼ်ၵၼ်။ ပၢင်တိုၵ်းၼႆႉ ပဵၼ်ႁိမ်းဝဵင်းၵူတ်ႉၶၢႆၼႆႉၵူၺ်း။ သိုၵ်းမၢၼ်ႈဢၼ် ပၵ်း တပ်ႉတီႈၵူတ်ႉၶၢႆၼႆႉ ယိုဝ်းၵွင်ႈလူင်” ဝႃႈၼႆ။

ယၢမ်းလဵဝ်တႄႉ သဵင်ၵွင်ႈယဵၼ်ၵႂႃႇယဝ်ႉ။ ၵူၺ်းၵႃႈ ၵူၼ်းမိူင်းတႄႉ တိုၵ်ႉတူၵ်းၸႂ်ၵူဝ်ႁႄယူႇ။ ဢွၼ်ၵၼ်ပိၵ်ႉၵၢတ်ႇပိၵ်ႉ ႁိူၼ်းဝႆႉ ဝႃႈၼႆ။

ပၢင်တိုၵ်း မိူဝ်ႈၼႆႉ ႁိုင်မွၵ်ႈ 1 ၸူဝ်ႈမူင်း။ လွင်ႈၵူၼ်းမိူင်းမၢတ်ႇၸဵပ်းၸွမ်းတႄႉ ဢမ်ႇလႆႈငိၼ်း။

ပူၼ်ႉမႃး မိူဝ်ႈဝၼ်းတီႈ 9/10/2019 ၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း ယိုဝ်းၵၼ် ၼႂ်းၵၢင်ဝဵင်း သႅၼ်ဝီ ၸိုင်ႈတႆးပွတ်းႁွင်ႇသေ ၵူၼ်းမိူင်းၺႃးၸၢၵ်ႇမၢၵ်ႇၸွမ်း မၢတ်ႇၸဵပ်း 7 ၵေႃႉ။ မိူဝ်ႈဝၼ်းတီႈ 31 လိူၼ်ဢေႃႊ ၵတ်ႊသ်ၼၼ်ႉၵေႃႈ ၼႂ်းၸႄႈဝဵင်းၵူတ်ႉၶၢႆ ပဵၼ်ပၢင်တိုၵ်းၵၼ်သေ မၢၵ်ႇလူင်တူၵ်းသႂ်ႇ ၼႂ်းဝၢၼ်ႈ ၼၢင်းယိင်းလႄႈ လုၵ်ႈဢွၼ်ႇလႅင် လႆႈလူႉတၢႆၸွမ်း 5 ၵေႃႉ။