သိုၵ်းလူင်ပွင်ၸိုင်ႈမၢၼ်ႈ တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း တၢင်းႁိုင် မွၵ်ႈ 20 မိၼိတ်ႉ။
မိူဝ်ႈၼႆႉ ဝၼ်းတီႈ 15/10/2019 ယၢမ်းၵၢင်ၼႂ် 9:45 မူင်း ထိုင် 10:05 မူင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈတပ်ႉၶမယ 575, 520 ဢဵၼ်ႁႅင်းႁိမ်း 40 ၵေႃႉ ပဵၼ်ပၢင်တိုၵ်းၵၼ်တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တီႈ ႁိမ်းဝၢၼ်ႈၵၼ်ႉၵၼ် ဢိူင်ႇၼွင်ႁီး ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ယွၼ်ႉသိုၵ်းလူင် ပွင် ၸိုင်ႈမၢၼ်ႈ သွၵ်ႈတဝ်ထိူၼ်ႇ ဢမ်ႇပွင်ႇၶၢဝ်ႇထိုင် RCSS လႄႈ ၸင်ႇလႆႈႁိုၵ်ႉၸုၼ်ၽႃႇၺႃးၵၼ်သေ ပဵၼ်ပၢင်တိုၵ်းၵၼ် ဝႃႈၼႆ။
ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ RCSS/SSA ၽူႈၼင်ႈလုမ်းၵပ်းသၢၼ် တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ပၢင်တိုၵ်းၵၼ် တၢင်းႁိုင် မွၵ်ႈ 20 မိၼိတ်ႉၼႆႉ။ တၢင်းၾၢႆႇႁဝ်းတႄႉဢမ်ႇပဵၼ်သင် ဢမ်ႇမီးလွင်ႈမၢတ်ႇ ၸဵပ်းလူႉတၢႆသင်။ တၢင်းၾၢႆႇတပ်ႉသိုၵ်းမၢၼ်ႈၶဝ်တႄႉ သိုၵ်းႁဝ်းၶႃႈ တိုၵ်ႉၵူတ်ႇထတ်းတူၺ်းယူႇ။ ၶဝ်သွၵ်ႈတဝ်ထိူၼ်ႇမႃး ၶဝ်ဢမ်ႇပွင်ႇၶၢဝ်ႇၸူးသိုၵ်းႁဝ်း ယွၼ်ႉၼၼ်တင်းသွင်ၾၢႆႇၸင်ႇလႆႈပဵၼ်ပၢင်တိုၵ်းၵၼ်”ဝႃႈၼႆ။
တပ်ႉသိုၵ်းလူင်ပွင်ၸိုင်ႈမၢၼ်ႈတင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ တႄႇဢဝ် ၼႂ်း လိူၼ်ၻီႊသႅမ်ႊပိူဝ်ႊ 2015 မႃး တေႃႇထိုင် 2019 ၼႆႉ ပဵၼ်ပၢင်တိုၵ်းၵၼ်မႃး 52 ပွၵ်ႈယဝ်ႉ။ လိူဝ်ၼၼ်ႉ ၼႂ်းပီ 2019 ၼႆႉၵူၺ်း ပဵၼ် 5 ပွၵ်ႈ ၸဝ်ႈသိုၵ်း ၸၢႆးဢူး လၢတ်ႈၼႄၼင်ႇၼႆ။
ထႅင်ႈၾၢႆႇၼိုင်ႈၵေႃႈ မိူဝ်ႈၼႆႉ ဝၼ်းတီႈ 15/10/2019 ၼႆႉ ပဵၼ်ဝၼ်း ၸုမ်းယိပ်းၵွင်ႈၵၢင်ႇလူင်းလၢႆးမိုဝ်း ၵိုတ်းတိုၵ်းပတ်း ပိုၼ်ႉတူဝ်ႈမိူင်း NCA ၶွပ်ႈတဵမ် 4 ပီၵေႃႈၸႂ်ႈ။
ၸုမ်းယိပ်းၵွင်ႈၵၢင်ႇ လူင်းမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼႆႉ မိူၼ်ၼင်ႇ ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉ သိုၵ်းၸိုင်ႈတႆး (RCSS/SSA)၊ ၸုမ်း ပူတ်း ပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈ ၶျၢင်း (CNF)၊ တႅဝ်း ႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈ တုမ်ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉ သိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ၸုမ်းလႃးႁူႇတီႇမူဝ်ႊၶရႅတ်ႉ တိၵ်ႉ LDU လႄႈ ၸုမ်းပႃႇတီႇမိူင်းမွၼ်းမႂ်ႇ NMSP ၸဵမ်ၸိူဝ်းၼႆႉ။
