ဝၼ်းလိူၼ်သိပ်းဢဵတ်းမူၼ်း ဝၼ်းဢွၵ်ႇဝႃႇၼၼ်ႉ ႁူင်းၾႆးမိၼ်လုၵ်ႈၼိုင်ႈ တူၵ်းလူင်းမႃးသႂ်ႇ ရူတ်ႉၵႃးဢၼ်ၵိုတ်းဝႆႉၼႂ်းပၢင်ႁူင်းၾႆးမိၼ်ဢဝေႇယႃႇလႄႈၾႆးမႆႈရူတ်ႉၵႃးလမ်းၼိုင်ႈ-ထိုင်ယၢမ်းလဵဝ်ယင်းပႆႇႁၼ်ၸဝ်ႈၶွင်ရူတ်ႉ။

ဝၼ်းတီႈ 13/10/2019 ယၢမ်းၵၢင်ၶိုၼ်း 11 မူင်းၶိုင်ႈ ႁူင်းၾႆးမိၼ်တူၵ်းသႂ်ႇရူတ်ႉၵႃးဢၼ်ၵိုတ်းဝႆႉ 3 လမ်း။ တႃႇသွင်လမ်းတႄႉ တၼ်းပၢႆႈလွတ်ႈသေတႃႉ တႃႇၼိုင်ႈလမ်းတႄႉ ဢမ်ႇႁၼ်ၸဝ်ႈၶွင် ။

တွၵ်ႊတိူဝ်ႊ တၢၼ်းဝိၼ်း ႁူဝ်ပဝ်ႈၸုမ်းမေႃႁဵတ်းႁူင်းၾႆးမိၼ် မိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ-  “ပဵၼ်ႁူင်းၾႆးမိၼ်ဢၼ်ပွႆႇဢဵၼ်ႈ ။ ဢမ်ႇၸႂ်ႈႁူင်းၾႆးမိၼ်ဢၼ်တေၶဝ်ႈၶေႉၶဵင်ႇလိူၼ်သိပ်းသွင်ၼႆႉၶႃႈ။ ရူတ်ႉၵႃး 3 လမ်းၼၼ်ႉသမ်ႉမႃးၸွတ်ႇဝႆႉႁဵတ်းသင်ၼႂ်းပၢင်ႇၼၼ်ႉ ၶၢဝ်းယၢမ်းၼၼ်ႉႁဝ်းၶႃႈၵေႃႈပေႃးဢမ်ႇပွင်ႇၸႂ်” –  ဝႃႈၼႆ။

ရူတ်ႉၵႃးၺႃးၾႆးမႆႈၼၼ်ႉ တေႃႇထိုင်ယၢမ်းလဵဝ်ပႆႇႁူႉၸဝ်ႈၶွင်သေတႃႉ ၾၢႆႇပလိၵ်ႈတႄႉ ပိုတ်ႇလိူင်ႈဝႆႉလူၺ်ႈ မၢႆမီႈ   ဝႆႉၾႆးမဝ်မၢင် မၢတ်ႈတြႃ 285  သေ ၸွမ်းၸွပ်ႇႁႃၸဝ်ႈၶွင်ရူတ်ႉဝႆႉယူႇဝႃႈၼႆ။

ၸဝ်ႈႁၢၼ် ၵျေႃႇဝိၼ်းသူၺ်ႇ ၵႅမ်ၽူႈၵွၼ်းတပ်ႉပလိၵ်ႈ  တပ်ႉပလိၵ်ႈၸေႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ -“ မိူဝ်ႈဝႃးၾႆးမႆႉရူတ်ႉၵၼ်းၼိုင်ႈတီႈပၢင်ႇႁူင်းၾႆးမိၼ် ဢဝေႇယႃႇၼႆလႄႈၶႃႈၶဝ်ၵႂႃႇတူၺ်း။ ဢမ်ႇပႆႇႁူႉၸဝ်ႈၶွင်မၼ်းၶႃႈ။ တိုၵ်ႉၸွပ်ႇႁႃယူႇ။” – ဝႃႈၼႆ။

ရူတ်ႉၵႃးဢၼ်ၺႃးၾႆးမႆႈၼႆႉ ၵႃႈၶၼ်တေမီးမွၵ်ႈ 20 သႅၼ်ပျႃး ဝႃႈၼႆ။

ပၢင်ပွႆးၶေႉၶဵင်ႇႁူင်းၾႆးမိၼ် လိူၼ်သိပ်းသွင်တႄႉ တေၸတ်းၼႂ်းဝၼ်းတီႈ 4 တေႃႇထိုင် 12 လိူၼ်ၼူဝ်ႊဝႅမ်ႊပိူဝ်ႊတေမႃးၼႆႉ။