ၸုမ်းၼႅင်ႈသၢၼ် မိူင်းဢမေႊရီၵၼ်ႊသၢၼ်ၶတ်း ၶွမ်ႊပၼီႊၵျပၼ်ႊ ဢၼ်ႁူမ်ႈပၢႆးမၢၵ်ႈမီးသိုၵ်းမၢၼ်ႈ

(ၸၢႆးဢိူမ်ႈၾႃႉ  သူင်ႇၶၢဝ်ႇ) ၸုမ်းၼႅင်ႈသၢၼ် Action Network ဢၼ်ပၵ်းတီႈမိူင်းဢမေႊရီၵ ၼၼ်ႉ တႄႇသၢၼ်ၶတ်း ၶွမ်ႊပၼီႊ Kirin ပီႊယိူဝ်ႊၵျပၼ်ႊ ဢၼ်ႁူမ်ႈပၢႆးမၢၵ်ႈမီးဢူးပႅင်ႇ ၶွင်သိုၵ်းမၢၼ်ႈ ႁဵတ်းပီႊယိူဝ်ႊ ဢွၵ်ႇလၢႆလၢႆယၢင်ႇ။

တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ  ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း လၢႆၸိူဝ်ႉလၢႆပိူင်လႄႈ ၸုမ်း ၼႅင်ႈသၢၼ် Action Network ၼႆႉ တႄႇတီႈမိူင်းဢမေႊရီႊၵ  သေ ၵဵပ်းသဵၼ်ႈၸိုဝ်ႈ လူင်းလၢႆးမိုဝ်း သၢၼ်ၶတ်း ၶွမ်ႇပၼီႊပီႊယိူဝ်ႊ Kirin ၵျပၼ်ႊ ဢၼ်ႁူမ်ႈပၢႆးမၢၵ်ႈမီးသိုၵ်းမၢၼ်ႈ မျၢၼ်ႇမႃႉၸီးပႂႃးယေး ဢူးပႅင်ႇသေ ႁဵတ်းဢွၵ်ႇမျၢၼ်ႇမႃႇ ပီႊယိူဝ်ႊ၊ မၼ်းတလေးပီႊယိူဝ်ႊ ၸိူဝ်းၼႆႉ။

“ ၶွမ်ႇပၼီႊ Kirin ၵျပၼ်ႊ ၼႆႉ ထုၵ်ႇလီၵိုတ်းပႅတ်ႈ လွင်ႈႁဵတ်းၵၢၼ်ၸွမ်းတပ်ႉသိုၵ်းလူင်ပွင်ၸိုင်ႈ မၢၼ်ႈၼႆႉ ယဝ်ႉ။  ပေႃးႁူမ်ႈပၢႆးမၢၵ်ႈမီးသိုၵ်းမၢၼ်ႈၵေႃႈ မိူၼ်ပၼ်ႁႅင်းၶဝ်ႁႂ်ႈပူၼ်ႉပႅၼ် သုၼ်ႇလႆႈၵူၼ်း ထႅင်ႈ။ ၵွပ်ႈၼၼ်ႉ လီၵိုတ်းယိုတ်းပႅတ်ႈၽႂ်းၽႂ်း ”-  ၸုမ်းၼႅင်ႈသၢၼ် Action Network ၼၼ်ႉ လၢတ်ႈတီႈ ႁွင်ႈၵၢၼ် ၶၢဝ်ႇမိူင်းဢမေႊရီႊၵ ၼင်ႇၼႆ။

ၶွမ်ႇပၼီႊ Kirin ၵျပၼ်ႊ ၼႆႉလိူဝ်သေ ႁဵတ်းဢွၵ်ႇ ပီႊယိူဝ်ႊ ယင်းႁဵတ်းဢွၵ်ႇ ၶူဝ်းၶွင် သိူဝ်ႈၽႃႈ ဢၼ်ၸိုဝ်ႈ သဵင်ယႂ်ႇလၢႆလၢႆ ယၢင်ႇ။

ပေႃးသွၼ်ႇပႃးၶွမ်ႊပၼီႊ Kirin ၵျပၼ်ႊၼႆႉၸိုင် ၶွမ်ႊပၼီႊ ဢၼ်ၸိုဝ်ႈသဵင်ယႂ်ႇၼွၵ်ႈမိူင်း ၶဝ်ႈႁူမ်ႈ လူင်းတိုၼ်း ႁဵတ်းၵၢၼ်ၸွမ်း ၸုမ်းသိုၵ်းမၢၼ်ႈ ဢမ်ႇယွမ်း 44 ဢၼ်။ ဢမ်ႇလူင်းၵမ်းသိုဝ်ႈၵေႃႈ လူင်း  ၸွမ်းတၢင်းဢွမ်ႈဝႆႉ ၼႆ FFM ၶွမ်ႊမသျိၼ်ႊၶူၼ်ႉၶႂႃႉၶေႃႈမုလ်းမိူင်းမၢၼ်ႈ ၸၢတ်ႈၸိုင်ႈလုမ်ႈ ၾႃႉ ဢွၵ်ႇလိၵ်ႈၽိုၼ်ႁၢႆးငၢၼ်း ၵဵဝ်ႇၵပ်းလူၺ်းမိူင်းႁူမ်ႈတုမ်မၢၼ်ႈဝႆႉၼင်ႇၼႆ။

ယူႇတီႈၸုမ်းၼႅင်ႈသၢၼ် Action Network တႄႉ ၼႂ်းၵႃႈၶွမ်ႊပၼီႊလၢႆလၢႆဢၼ်ၼၼ်ႉ တေဢဝ်ၶွမ်ႊပၼီႊ Kirin ၵျပၼ်ႊပဵၼ်လၵ်းသေ တေသၢၼ်ၶတ်းၵႂႃႇ ႁၢဝ်ႈႁၢဝ်ႈႁႅင်းႁႅင်းဝႃႈၼႆ။

ၶေႃႈမုလ်းဢိင်ဢဝ်မႃးတီႈ သဵင်ၶၢဝ်ႇမိူင်းဢမေႊရီႊၵ