(  ၸၢႆးဢိူမ်ႈၾႃႉ – တူၼ်ႈတီး သူင်ႇၶၢဝ်ႇ) –  ၵူၼ်းဝၢၼ်ႈၵေႃႉၼိုင်ႈ ၼႂ်းၸႄႈဝဵင်းၵူတ်ႉၶၢႆ ၵႂႃႇႁႃပႃ ၸွမ်းသၢပ်ႇၼမ်ႉၶၢႆၼၼ်ႉ ပွႆႇမၢၵ်ႇ တႅၵ်ႇတိူဝ်ႉၺႃး တူဝ်ၵဝ်ႇၶိုၼ်း မိုဝ်းၾၢႆႇၶႂႃႇ ၶွၼ်ၼိုင်ႈ ပုတ်းတင်းႁႃႈၼိဝ်ႉ။

မိူဝ်ႈဝၼ်းထီႉ 30/09/2019 ယၢမ်းၵၢင်ဝၼ်း  ၶျိၼ်ႊဝူ ဢႃယု 30 ပၢႆ ၵူၼ်းဝၢၼ်ႈမိူင်းယူး ဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ   ႁဵတ်းမၢၵ်ႇႁင်းၵူၺ်းသေ ၵႂႃႇပွႆႇႁႃပႃ ၊ ပွႆႇမၢၵ်ႇဢမ်ႇထိုင် ၼမ်ႉ တႅၵ်ႇၼိူဝ်ၵွင်းလႄႈ  တိူဝ်ႉၺႃးတူဝ်ၵဝ်ႇ၊ မိုဝ်းပုတ်းၵႂႃႇတင်းႁႃႈၼိဝ်ႉ။

ၸဝ်ႈၼႃႈတီႈၸုမ်းၸွႆႈထႅမ်တူင်ႇဝူင်းၵူၼ်း ၼမ်ႉၽၵ်းၵႃ  (ဢၼ်ၵႂႃႇၸွႆႈထႅမ် မၼ်းၸၢႆး) ၼၼ်ႉလၢတ်ႈဝႃႈ -“လၢႆးႁဵတ်း မၼ်း ဢမ်ႇပေႃးမႅၼ်ႈၶႃႈယူဝ်ႉ။ မၼ်းဢဝ်ယၢမ်းသတ်ႉသႂ်ႇၼႂ်းၵူင်မႆႉ။ သမ်ႉၸႂ်ႉ သၢႆသီႈ(သႆႈယၢမ်း) သႅၼ်းဝႆး၊ ပွႆႇ ဢမ်ႇတၼ်းထိုင်ၼမ်ႉ၊ တႅၵ်ႇၼိူဝ်ၵွင်း လႄႈ တိူဝ်ႉတူဝ်၊ တိူဝ်ႉၶိင်း၊ တိူဝ်ႉပႃးမိုဝ်းမၼ်း ၾၢႆႇၶႂႃ ၼိဝ်ႉမၼ်းပုတ်းၶၢတ်ႇယွၵ်းယွႆၵႂႃႇတင်းႁႃႈၼိဝ်ႉၼၼ်ႉၼႃႇ” – ဝႃႈၼႆ။

ယၢမ်းလဵဝ်ၸုမ်းၸွႆႈထႅမ် ဢဝ်တူဝ်မၼ်းၸၢႆးၶဝ်ႈယူတ်းယႃတီႈႁူင်းယႃၼမ်ႉၽၵ်းၵႃ ၊ ၾၢႆႇၵူၼ်းႁိူၼ်းမၼ်းၸၢႆးသမ်ႉ မႆႈၸႂ်သေ သိုပ်ႇသူင်ႇ ၵႂႃႇမူႇၸေႊ၊ ဢွၵ်ႇတၢင်းၽၵ်းတူၸၢင်ႉၽိူၵ်ႇ (ၽၵ်းတူမိူင်း ၶႄႇ – မိူင်းတႆး) သေ သိုပ်ႇၵႂႃႇယူတ်းယႃ ၾၢႆႇၸေႊၵဝ်ႇ မိူင်းမၢဝ်း။

ၵူၼ်းၼႂ်းပိုၼ်ႉတီႈလၢတ်ႈဝႃႈ ၵူၼ်းယူႇသၢပ်ႇၼမ်ႉၵူတ်ႉ၊ ၼမ်ႉၶၢႆ ၼႆႉ မၢၵ်ႇပွႆႇပႃ ၊ ၸႂ်ႉမၢၵ်ႇဢၼ်ႁဵတ်းဢဝ်ႁင်းၵူၺ်း၊ မၢင်ၸိူဝ်းၵေႃႈ ပဵၼ်ၵၢၼ် မၢင်ၸိူဝ်းၵေႃႈ ပဵၼ်ၽေး ၵႆႉတႅၵ်ႇတိူဝ်ႉၵၼ်ယူႇ – ဝႃႈၼႆ။

ၸုမ်းၸွႆႈထႅမ်တူင်ႇဝူင်းၵူၼ်း  ပၼ်ၾၢင်ႉပႃးဝႃႈ ၵၢၼ်ၸႂ်ႉမၢၵ်ႇပွႆႇပႃၼႆႉ ပဵၼ်ၵၢၼ်မူၺ်ႉ တူဝ် သတ်းၼႂ်းၼမ်ႉ ၊ ယႃႉၼမ်ႉႁွင်ႈၼမ်ႉၵေး လႄႈ ဢမ်ႇတူၵ်းထုၵ်ႇ၊ ၸႂ်ႉလၢႆး ၵၢင်ဢဝ် သွၼ်ႈဢဝ် မဵတ်း ဢဝ် သၢင်ႇထုၵ်ႇလိူဝ်ပိူၼ်ႈ ။ ၾၢႆႇၼိုင်ႈ ၵၢၼ်ၸႂ်ႉမၢၵ်ႇၸႂ်ႉယၢမ်းသေ ပွႆႇပႃႇၼႆႉ ၵႆႉပဵၼ်ၽေးတေႃႇ သၢႆၸႂ်ၸဝ်ႈၵဝ်ႇပႃးလႄႈ ဢမ်ႇထုၵ်ႇလီယိူင်ႈၵၼ် ႁႃပႃလူၺ်ႈလၢႆးၼႆႉဝႃႈၼႆ။

ဢိင်ၶေႃႈမုလ်းတီႈ DVB