ပလိၵ်ႈလူင်ပွင်ၸိုင်ႈ ဢိူင်ႇမိူင်းၸီး တႃႈမိူင်းငႅၼ်း ၸေႈဝဵင်းၵူတ်ႉၶၢႆ 4 ၵေႃႉ ၺႃးၸုမ်းယိပ်းၵွင်ႈၸုမ်းၼိုင်ႈ တိၺွပ်းၵႂႃႇၼၼ်ႉ ႁိုင် 4 ဝၼ်းယဝ်ႉၵေႃႈ ယင်းပႆႇပွၵ်ႈႁိူၼ်းၶိုၼ်း ဝႃႈၼႆ။
ပလိၵ်ႈမိူင်းၸီး 4 ၵေႃႉၼႆႉ ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈမႃးတိၺွပ်းမိူဝ်ႈဝၼ်းတီႈ 29 /9/2019 ပူၼ်ႉမႃးၼႆ ၵႅမ်ၸွမ်ႁၢၼ် ၸေႃႇၶိၼ်ႇဢွင်ႇ ၽူႈၵွၼ်းတပ်ႉပလိၵ်ႈ ၸေႈမိူင်းတႆး လၢတ်ႈ။
“တေႃႇထိုင်ဝၼ်းမိူဝ်ႈၼႆႉတႄႉ ၸိူဝ်းၶဝ်ပႆႇလွတ်ႈမႃး။ ၾၢႆႇႁဝ်းၶႃႈၵေႃႈ တိုၵ်ႉဢုပ်ႇဢူဝ်းၵၼ်ယူႇတေႁဵတ်းႁိုဝ်ၵႄႈလိတ်ႈၼႆ။ ႁဝ်းၶႃႈယင်းပႆႇလႆႈငိၼ်းၶၢဝ်ႇၶဝ်ထႅင်ႈၸိူင်ႉႁိုဝ်။ ပဵၼ်ၸုမ်းလႂ်တိၵႂႃႇၼႆၵေႃႈ ယင်းပႆႇႁူႉတႅတ်ႈတေႃးၶႃႈ။ ”
ၵူၺ်းၵႃႈ ၸုမ်းဢၼ်တိၺွပ်းပလိၵ်ႈၵႂႃႇၼၼ်ႉ ယင်းၵပ်းသိုပ်ႇၾူၼ်းမႃးၸူး မေးၼၢင်းၽူႈႁွင်ႈၵၢၼ်ပလိၵ်ႈမိူင်းၸီးယူႇဝႃႈ ယႃႇႁႂ်ႈမႆႈၸႂ်ၸွမ်းသင်။ တေၵူတ်ႇထတ်းတူၺ်းလီလီသေ တေၶိုၼ်းပွႆႇပၼ်ယူႇၼႆ ၵႅမ်ၸွမ်ႁၢၼ် ၸေႃႇၶိၼ်ႇဢွင်ႇလၢတ်ႈၼေၽူႈတွႆႇႁွၵ်ႈၼင်ႇၼႆ။
ပလိၵ်ႈ 4 ၵေႃႉ ဢၼ်ၺႃးတိၵႂႃႇၼႆႉ ပဵၼ်ပလိၵ်ႈ ဢၼ်ယူႇတီႈတပ်ႉပၢင်သဝ်းမိူင်းၸီး၊ ပဵၼ် ႁၢၼ် 2 ၵေႃႉ၊ ႁူဝ်ႁၢၼ် ၵေႃႉၼိုင်ႈ၊ ႁူဝ်သိုၵ်းလူင် ၵေႃႉၼိုင်ႈ။
ၸဝ်ႈႁၢၼ် တႃးဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈ သိုဝ်ႇၶၢဝ်ႇလၢႆလၢႆဢၼ်ဝႃႈ – လႆႈငိၼ်းဝႃႈ ၵူၼ်းယိပ်းၵွင်ႈၸုမ်းၼိုင်ႈ ၼုင်ႈၶူဝ်းၵူၼ်းဝၢၼ်ႈသေ လူင်းၵဵပ်းၶွၼ်ႇ ၵဵပ်းငိုၼ်းၼႆလႄႈ ၸင်ႇလႆႈၵႂႃႇၵူတ်ႇထတ်းတိၺွပ်းမႃးဝႃႈၼႆ။
ၽိူဝ်ႇႁဝ်းၶႃႈၵႂႃႇၵူတ်ႇထတ်းတိၺွပ်းၶဝ်မႃး ႁဝ်းၶႃႈႁၼ်မၢၵ်ႇပွမ်း၊ ႁၼ်ဝႂ်တိုတ်းငိုၼ်းၸိူဝ်းၼႆႉ။ ၶဝ်ဝႃႈၶဝ်လုၵ်ႉတီႈ တပ်ႉပလိၵ်ႈ မိူင်းၸီးမႃးၼႆ – တႃးဢၢႆႈၵျေႃႇ လၢတ်ႈၼင်ႇၼႆ။
ၵူၺ်းၵႃႈ ယူႇတီႈၽူႈတွႆႇႁွၵ်ႈ ၵပ်းသိုပ်ႇ TNLA သမ်ႉဢမ်ႇလႆႈလႄႈ ဢမ်ႇၸၢင်ႈလႆႈတွင်ႈထၢမ်။
ထုင်ႉမိူင်းၸီး တႃႈမိူင်းငႅၼ်း ၸေႈဝဵင်းၵူတ်ႉၶၢႆၼၼ်ႉ မီးတပ်ႉသိုၵ်း TNLA , MNDAA လႄႈ KIA တူင်ႉၼိုင်။
