ၾူၼ်လူမ်းလႅင်ႉမုၼ်ႊသုၼ်ႊ ၽတ်းပဝ်ႇၼႂ်းမိူင်းဢိၼ်ႊတီႊယႃႊၼမ်ႉထူမ်ႈယႂ်ႇၼမ် ၵူၼ်းတၢႆမီးမွၵ်ႈ 100 ယဝ်ႉ။
လိူၼ်ၵျုၼ်ႊလႄႈလိူၼ်ႈ သႅပ်ႉထႅမ်ႊပိူဝ်ႊ ၼႆႉပဵၼ်ၶၢဝ်းၾူၼ်မိူင်းဢိၼ်ႊတီႊယႃႊ။ ပေႃးထိုင် ၶၢဝ်း ၾူၼ်မႃး ၼႂ်းၸေႈမိူင်း ပီႊႁႃႊ လႄႈ ၸေႈမိူင်း ဢုတ်ႊတရႃႊပရႃႊတဵတ်ႉသျ် ပွတ်းႁွင်ႇမိူင်း ဢိၼ်ႊတီႊယႃႊ ဢၼ်မီးတိတ်းၸပ်း မိူင်းၼီႊပေႃႊလ် လႄႈမိူင်းပင်းၵလႃးထဵတ်ႉ ၼႆႉၼမ်ႉထူမ်ႈႁၢဝ်ႈႁႅင်းၵူႈပီ။
ၼႂ်းပီ 2019 ၵူၺ်း တင်ႈဢဝ်ႈဝၼ်းတီႈ 28-29 /9/2019 မႃးတေႃႇထိုင်ဝၼ်းမိူဝ်ႈၼႆႉ 2 ၸေႈ မိူင်းၼႆႉ မီးၵူၼ်းတၢႆယွၼ်ႉၼမ်ႉထူမ်ႈ 100 ပၢႆယဝ်ႉ၊ မၢတ်ႇၸဵပ်းသေ လႆႈၵႂႃႇႁူင်းယႃ ဢမ်ႇယွမ်း 20 ။
ၸိူဝ်းဢၼ်မၢတ်ႇၸဵပ်းလုတၢႆၼႆႉ ပဵၼ်ယွၼ်ႉ လူတ်ႉၵႃးပဵၼ်ၽေးၵိုင်ႉၵၢင်ႉ၊ ပဵၼ်ယွၼ်ႉၸူမ် လွင်ႈၸွမ်းၼမ်ႉ၊ ပဵၼ်ယွၼ်ႉ တူၼ်ႈမႆႉႁၵ်းလူမ်ႉတဵင်ၺႃး ၸိူဝ်းၼႆႉ။
တီႈဝဵင်း Lucknow ၊ မိူင်း ပႃႊရႃႊၼသီႊ ၼႂ်းၸေႈမိူင်းဢုတ်ႊတရႃႊပရႃႊတဵတ်ႉသျ် ၼၼ်ႉ ယွၼ်ႉ ၼမ်ႉထူမ်ႈလိူဝ်ႁႅင်းလႄႈ ႁူင်းႁဵၼ်းလူင်ပွင်ၸိုင်ႈလႆႈ ၵိုတ်းလိုဝ်ႈဝႆႉ။
ၾၢႆႇၼိုင်ႈၵေႃႈ ၾၢႆႇၾိင်ႈၾႃႉရႃႇသီႇ ပိုၼ်ၽၢဝ်ႇပၼ်ၾၢင်ႉဝႆႉဝႃႈ ၾူၼ်တေတူၵ်းထႅင်ႈ ႁၢဝ်ႈႁႅင်း ။ မိူင်းဢၼ်ၼမ်ႉထူမ်ႈၼႆႉ သိုဝ်ႇၶၢဝ်ႇမိူင်းဢိၼ်ႊတီႊယႃႊ ဢွၵ်ႇဝႆႉဝႃႈ ပဵၼ်မိူင်းဢၼ် ၽၢၼ်ၵိၼ်းမိူင်းၼိုင်ႈ- ဝႃႈၼႆ။
ၾၢႆႇသိင်ႇဝႅတ်ႉလွမ်ႉမိူင်း ၼိဝ်းတေႊလီႊ မိူင်းဢိၼ်ႊတီႊယႃႊ ပိုတ်ႇလၢတ်ႈဝႃႈ – ၼမ်ႉထူမ်ႈႁၢဝ်ႈႁႅင်း ပွၵ်ႈၼႆႉ ၼေဝႃႈ သိင်ႇဝႅတ်ႉလွမ်ႉလု၊ ႁွင်ႈၼမ်ႉ လၢႆႇၼမ်ႉဢမ်ႇလီ၊ ႁူဝ်ၵူၼ်းမိူင်းၼမ်မႃးသေ ပိူင်ၾၢင် ဝဵင်းဢၼ်ၵေႃႇသၢင်ႈဝႆႉၼၼ်ႉ ဢမ်ႇပဵၼ်ပၵ်းပဵၼ်ပိူင်လႄႈ ဢဝ်ၼႆႉၵႂႃႇ ပၼ်ႁႃၼမ်ႉထူမ်ႈ ၼႆႉ တေပဵၼ် ၽေးၶဵၼ်ဢၼ်ၶဵင်ႇတႃႉၵူၼ်းၼႂ်းဝဵင်းဢၼ်ၼိုင်ႈယူႇ – ဝႃႈၼႆ။
တင်ႈဢဝ်လိူၼ်ၵျုၼ် ပီ 2019 ၼႆႉမႃး ယွၼ်ႉပိူဝ်ႈၾူၼ်တူၵ်း ၼမ်ႉထူမ်ႈလႄႈ မိူင်းဢိၼ်ႊတီႊယႃႊ ၼႆႉမီးတၢႆယွၼ်ႉၼမ်ႉ 1422 ၵေႃႉယဝ်ႉ ၶၢဝ်ႇသျိၼ်ႊႁႂႃႊ ႁၢႆးငၢၼ်းဝႆႉၼင်ႇၼႆ။
