ပၢင်ပွႆးၾိင်ႈထုင်း လိူၼ်သိပ်းဢဵတ်း လိူၼ်သိပ်းသွင်ၸမ်မႃးယဝ်ႉလႄႈ ၼင်ႇႁိုဝ်မိူင်းတႆးတေမီး ပၢႆးမၢၵ်ႈမီး ၶိုၼ်ႈယႂ်ႇၵတ်းယဵၼ်ၼၼ်ႉ ၾၢႆႇၵၢၼ်တွင်ႈတဵဝ်း ၸိုင်ႈတႆးပွတ်းၸၢၼ်း တိုၵ်းသူၼ်း ၵူၼ်းမိူင်းတႆး ဢႅဝ်ႇယဵမ်ႈၶိုၼ်းၼႂ်းမိူင်းတႆးဝႃႈၼႆ။

ဝၼ်းတီႈ 28/9/2019 လုင်းၵျေႃႇၵျေႃႇလႅင်ႇ ႁူဝ်ပဝ်ႈ ၾၢႆႇတေႃႉသူင်ႇ ၼၵ်းတွင်ႈတဵဝ်း ၵူၼ်းၼွၵ်ႈမိူင်း (ၼႂ်းၸိုင်ႈတႆး ပွတ်း ၸၢၼ်း) ၊ ၵႅမ်ႁူဝ်ပဝ်ႈ 2 ၸုမ်းၸဝ်ႈၵၢၼ်တေႃႉသူင်ႇၵူၼ်းဢႅဝ်ႇယဵမ်ႈတွင်ႈတဵဝ်း( ၸိုင်ႈတႆး ပွတ်းၸၢၼ်း)  လၢတ်ႈတီႈၽူႈတွႆႇႁွၵ်ႈဝႃႈ – “ ယၢမ်းလဵဝ် ၵၢၼ်ဢႅဝ်ႇယဵမ်ႈတွင်ႈတဵဝ်းၼႆႉ ႁဝ်း ၵေႃႈၸႂ်ယႂ်ႇ ၵူၼ်းၼွၵ်ႈမိူင်း လႄႈ မိူင်းဝၼ်းတူၵ်းၵူၺ်း ဢမ်ႇလႆႈယဝ်ႉ။  ၵူၼ်းမိူင်းႁဝ်း  ဢႅဝ်ႇယဵမ်ႈ မိူင်းႁဝ်းၶိုၼ်း ၼႆႉၵေႃႈ ႁဝ်း တၵ်းလႆႈဝႆႉၼၵ်းဝူၼ်ႉသွၼ်ႇၶဝ်ႈပႃးၼႂ်းၵၢၼ်တွင်ႈတဵဝ်း။ ၶႂ်ႈတိုၵ်း သူၼ်း ၵူၼ်းမိူင်းႁဝ်း ဢႅဝ်ႇၼႂ်းမိူင်းႁဝ်း ၶိုၼ်းၼမ်ၼမ်။ ယၢမ်းလဵဝ်ပွႆးလိူၼ်သိပ်းဢဵတ်း ပွႆးၽြႃးၽွင်ႇတေႃႇဢူး ပွႆးႁူင်းၾႆးမိၼ် ၸိူဝ်း ၼႆႉၵေႃႈ ၸမ်ၼႃႇယဝ်ႉလူး။  ပၼ်ႁႅင်းၵၼ်ၶိုၼ်း ၼႆႉမိူၼ်တၢင်းၸွႆႈထႅမ်ပူၵ်းပွင် ပၢႆးမၢၵ်ႈမီး မိူင်းႁဝ်းၶိုၼ်း။ ”– ဝႃႈၼႆ။

ႁွင်ႈၵၢၼ်ၾၢႆႇ ဢဵၼ်ႁႅင်းၵူၼ်းလႄႈၵဵပ်းသဵၼ်ႈႁူဝ်ၼပ်ႉၵူၼ်းပိုၼ်ၽၢဝ်ႇဝႃႈၼႂ်းပီ 2019 တႃႇၶၢဝ်း တၢင်း 8 လိူၼ်ၼႆႉ ၵူၼ်းၼွၵ်ႈမိူင်း ဢၼ်ၶဝ်ႈမႃးလႄႈၼႂ်းမိူင်းႁူမ်ႈတုမ်မၢၼ်ႈ မီး 2 လၢၼ်ႉ 8   ။    ၵူၺ်း ၵႃႈ  ဢၼ်ဢဝ် Visa ၶ ဝ်ႈမႃးတၢင်းၵၢင်ႁၢဝ်မီး 1 လၢၼ်ႉ 2 သႅၼ်၊ ဢၼ်ၶဝ်ႈမႃးတၢင်းလႅၼ်လိၼ်  သမ်ႉမီးယူႇ 1 လၢၼ်ႉ 6 သႅၼ်။

ၵဵဝ်ႇၵပ်းလွင်ႈၼႆႉလုင်းၵျေႃႇၵျေႃႇလႅင်ႇလၢတ်ႈဝႃႈ-  “လူင်ပွင်ၸိုင်ႈပိုၼ်ၽၢဝ်ႇဝႃႈ ပီၼႆႉ ၵူၼ်းဢႅဝ်ႇယဵမ်ႈတွင်ႈတဵဝ်း မႃးမိူင်းမၢၼ်ႈ ၼမ်လိူဝ်ပီၵၢႆ 25% ။ ၵူၺ်းၵႃႈ ပေႃးမႃးထတ်းတူၺ်း ၶိုၼ်းတႄႉ  ၼၵ်းတွင်ႈတဵဝ်း ၵူၼ်းမိူင်းၶႄႇၼႆႉၼမ်လိူဝ် ဢၼ်လုၵ်ႉမိူင်းဝၼ်းတူၵ်းမႃး လႄႈယူႊရူပ်ႊမႃး။   ပီႈၼွင်ႉၵူၼ်းမိူင်းၶႄႇၼႆႉသမ်ႉမႃးၸွမ်းၶူင်းၵၢၼ်ၸီးရူဝ်းပတ်ႉၵျႅတ်ႉ ။     ”  – ဝႃႈၼႆ။

ၸီးရူဝ်းပတ်ႉၵျႅတ်ႉၼႆႉ ပဵၼ်ၶူင်းၵၢၼ် ဢမ်ႇဢဝ်ငိုၼ်းတိတ်းၸပ်းတူဝ်မႃး။ ဢဝ်ဢႅပ်ႉ ၊ ဢဝ်ဝီႊၶျႅတ်ႉၼႂ်းမိုဝ်းထိုဝ်သေ ၸၢႆႇငိုၼ်းလႄႈ ငိုၼ်းၶဝ်ႈဢမ်ႇၽဵင်ႇ။

ဢၼ် ၼၵ်းတွင်ႈတဵဝ်း မိူင်းဝၼ်းတူၵ်း   ဢမ်ႇပေႃးမႃးဢႅဝ်ႇယဵမ်ႈမိူင်းႁူမ်ႈတုမ်ဢႄႇလူင်းၼႆႉတႄႉ ပဵၼ်ယွၼ်ႉငဝ်းလၢႆး ၵၢၼ်သိုၵ်း ၵၢၼ်မိူင်းသုၵ်ႉယုင်ႈၼႂ်းၸေႈမိူင်းရၶႅင်ႇ ၼၼ်ႉဝႃႈၼႆ။

“ ၾၢႆႇၼိုင်ႈၵေႃႈ  တေလႆႈဝႃႈ  ႁႅင်းသိုဝ်ႇမိူင်းမၢၼ်ႈၼႆႉ ဢမ်ႇႁူၺ်းၸၼ်လႆႈ ၼၵ်းတွင်ႈတဵဝ်း မိူင်းဝၼ်းတူၵ်း။  ယွၼ်ႉပိူဝ်ႈ ဢၼ်ပဵၼ်တႄႉမီးတႄႉမိူၼ်ၼင်ႇ ပၼ်ႁႃ မိူင်းရၶႅင်ႇၼႆႉ ၵေႃႈဢမ်ႇ လႅၼ်လႆႈလူး။ ယွၼ်ႉပၼ်ႁႃၼႆႉသေ မိူင်းႁူမ်ႈတုမ်ၼႆႉသမ်ႉ ၶဝ်ႈပႃးၼႂ်းမိူင်းဢၼ်ၺႃး  မိူင်းဝၼ်းတူၵ်း ဢိုတ်းႁႅတ်ႉပၢႆးမၢၵ်ႈမီး   ။ ၵွပ်ႈပၼ်ႁႃၸိူဝ်းၼႆႉလႄႈ ႁဵတ်းႁႂ်ႈၵူၼ်းမိူင်းဝၼ်းတူၵ်း မႃးဢႅဝ်ႇယဵမ်ႈတွင်ႈ တဵဝ်း မႃး မိူင်းမၢၼ်ႈၼႆႉလူတ်းလူင်း ” – လုင်းၵျေႃႇၵျေႃႇလႅင်ႇတႄႉလၢတ်ႈၼင်ႇၼႆ။

လူင်ပွင်ၸိုင်ႈမိူင်းႁူမ်ႈတုမ်တႄႉပိုၼ်ၽၢဝ်ႇဝႃႈ ပီၵၢႆ 2018 သမ်ႉ ၶၢဝ်းတၢင်း 8 လိူၼ် မီးၵူၼ်းၶဝ်ႈမႃးဢႅဝ်ႇယဵမ်ႈမီး 2 လၢၼ်ႉ 2 ၵူၺ်း – ဝႃႈၼႆ။