ဝၢႆးတူဝ်တႅၼ်း သွင်ၾၢႆႇဢုပ်ႇၵၼ်တီႈၵဵင်းတုင်ယဝ်ႉ သိုၵ်းလူင်ပွင်ၸိုင်ႈမၢၼ်ႈလႄႈ သိုၵ်း TNLA ပဵၼ် ပၢင်တိုၵ်းၵၼ် ၼႂ်း ၸႄႈဝဵင်းၵူတ်ႉၶၢႆ ၵမ်းၼႆႉၵူၼ်းမိူင်း 400 ပၢႆ လႆႈပၢႆႈၽေးသိုၵ်းသိူဝ်ထႅင်ႈ။

ဝၼ်းတီႈ 24/9/2019 ယၢမ်းၵၢင်ၼႂ် 5 မူင်းၶိုင်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း TNLA ပဵၼ် ပၢင်တိုၵ်း ၵၼ် ၼႂ်းၸႄႈဝဵင်းၵူတ်ႉၶၢႆလႄႈ ၵူၼ်းဝၢၼ်ႈၵုင်းသႃႇ၊ ၵူၼ်းဝၢၼ်ႈလေႃးမူၼ်ႇ၊ ၵူၼ်းဝၢၼ်ႈဢၢႆႇ၊ ၵူၼ်းဝၢၼ်ႈပႃႇၶိဝ်း တင်း မူတ်း 400 ၵေႃႉပၢႆ လႆႈပၢႆႈယၢၼ်ႁိူၼ်းယေးတီႈယူႇ။

ဢူးတိၼ်ႇဝိၼ်း ၸုမ်းၸွႆႈထႅမ် (ၵရုၼႃႇ) ၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈၵုင်းသႃႇ 130 ပၢႆတႄႉ ဢွၼ်ၵၼ် ပၢႆႈၵႂႃႇသွၼ်ႈဝႆႉတီႈ ဝၢၼ်ႈမၢၼ်ႈတူင်ႈဢေႃႈ။ ၵူၼ်းဝၢၼ်ႈလေႃးမူၼ်ႇ၊ မၢၼ်ႈဢၢႆႇတင်း ဝၢၼ်ႈပႃႇၶိဝ်းသမ်ႉ ဢွၼ်ၵၼ်ပၢႆႈၵႂႃႇသွၼ်ႈ ၸွမ်းဝတ်ႉဝႃးမုၼ်ၸဝ်ႈ၊ ၵျွင်းၶရိတ်ႉယၢၼ်ႇၽႂ်မၼ်းဝႆႉ” ဝႃႈၼႆ။

သိုပ်ႇလၢတ်ႈဝႃႈ “ မိူဝ်ႈဝႃးပဵၼ်ပၢင်တိုၵ်းၵၼ် ၵူၼ်းမိူင်းဢွၼ်ၵၼ်ပၢႆႈဢေႃႈ၊ တႃႇၶဝ်ႈၵႂႃႇၸွႆႈၶဝ်ယၢပ်ႇ၊ သဵၼ်ႈတႃႈသၢႆတၢင်း ယၢပ်ႇၽိုတ်ႇလိူဝ်ႁႅင်း၊ တေႃႈလဵဝ် ၵူၼ်းပၢႆႈၽေးသိုၵ်း ဢၼ်လူဝ်ႇတၢင်းၸွႆႈထႅမ်တႄႉ ၶဝ်ႈသၢၼ်၊ ၼမ်ႉၼမ်းလႄႈ ၼမ်ႉ ၵိၼ် ၸိူဝ်းၼႆႉ” ဝႃႈၼႆ။

မိူဝ်ႈၼႆႉ ယၢမ်းၵၢင်ၼႂ်ၵေႃႈ ၼႂ်းၸႄႈဝဵင်းၵူတ်ႉၶၢႆ တိုၵ်ႉလႆႈငိၼ်းသဵင်ၵွင်ႈလူင် တႅၵ်ႇထႅင်ႈယူႇ။ တေႃႇထိုင်ယၢမ်းလဵဝ်တႄႉ ယဵၼ်ၵႂႃႇယဝ်ႉ။ မိူဝ်ႈဝႃးတႄႉ ပဵၼ်ပၢင်တိုၵ်းၵၼ်ႁၢဝ်ႈႁႅင်း ဝႃႈၼႆ။

ၸဝ်ႈႁၢၼ် တႃႉဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉႁဝ်းၶႃႈ ဢမ်ႇလႆႈပဵၼ်ပၢင်တိုၵ်းၵၼ်။ ယူႇတီႈၾၢႆႇတပ်ႉသိုၵ်းမၢၼ်ႈၶဝ် ယိုဝ်းၵွင်ႈလူင်ၾၢႆႇလဵဝ်ၵူၺ်း” ဝႃႈၼႆ။

သိုပ်ႇလၢတ်ႈဝႃႈ “ ပူၼ်ႉမႃး မိူဝ်ႈဝၼ်းတီႈ 17/9/2019 ၸုမ်းဢူၺ်းလီသိုၵ်း 4 ၸုမ်း တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ႁူပ်ႉထူပ်းဢုပ်ႇဢူဝ်းၵၼ်တီႈၵဵင်းတုင်။ ဝၢႆးသေဢုပ်ႇဢူဝ်းၵၼ်ယဝ်ႉၼၼ်ႉ သိုၵ်းတဢၢင်း TNLA တင်း တပ်ႉသိုၵ်းလူင် ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵျွၵ်ႉမႄး 1 ပွၵ်ႈ၊ ၼႂ်းၸႄႈဝဵင်းသီႇပေႃႉ 1 ပွၵ်ႈ။

ၸုမ်းဢူၺ်းလီသိုၵ်း 3 ၸုမ်း တပ်ႉသိုၵ်း တဢၢင်း TNLA၊ ၵဝ်ႈၵၢင်ႉ MNDAA လႄႈ ရၶႅင်ႇ AA ၼႆႉ ႁူမ်ႈၵၼ်ပိုၼ်ၽၢဝ်ႇ ၵိုတ်းတိုၵ်းၾၢႆႇလဵဝ် တေႃႇ ထိုင် ပီၼႆႉသဵင်ႈ။ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် ၶၢဝ်းတၢင်း 9 လိူၼ် ယဝ်ႉၵႂႃႇမိူဝ်ႈ ဝၼ်းတီႈ 21/9/2019။