မိူဝ်ႈၼႆႉ ဝၼ်းတီႈ 24/9/2019 ယၢမ်းၵၢင်ၼႂ် တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း/ လွႆ TNLA ပဵၼ်ပၢင် တိုၵ်းၵၼ် ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။
မိူဝ်ႈၼႆႉ ယၢမ်းၵၢင်ၼႂ် 5 မူင်းၶိုင်ႈ သိုၵ်းလူင်ပွင်ၸိုင်ႈမၢၼ်ႈ ၶလယ 45၊ 242 လႄႈ 269 ႁူမ်ႈၵၼ်သေ လေႃႇတိုၵ်းတပ်ႉ သိုၵ်းတဢၢင်းတပ်ႉၸုမ်း 5 တင်း တပ်ႉၵွင် 223 ၾၢႆႇႁွင်ႇ ၼိူဝ်ဝၢၼ်ႈၵုင်းသႃႇ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။
ၸဝ်ႈႁၢၼ် တႃႉဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ယၢမ်းၵၢင်ၼႂ် 5 မူင်းၶိုင်ႈၼၼ်ႉ သိုၵ်း မၢၼ်ႈ မႃးယိုဝ်းတီႈတပ်ႉပၢင်သဝ်းႁဝ်း။ တေႃႇထိုင်ယၢမ်းၵၢင်ဝၼ်းတဵင်ႈၵေႃႈယင်း တိုၵ်ႉပဵၼ်ပၢင်တိုၵ်းၵၼ်ယူႇ သဵင်ၵွင်ႈပႆႇ ယဵၼ်” ဝႃႈၼႆ။
ဢွင်ႈတီႈပဵၼ်ပၢင်တိုၵ်းၵၼ်ၼၼ်ႉ ယၢၼ်ၵႆ ဝဵင်းၵူတ်ႉၶၢႆ မွၵ်ႈ 2 လၵ်း သိုၵ်းလူင်ပွင်ၸိုင်ႈမၢၼ်ႈၸႂ်ႉၵွင်လူင်သေယိုဝ်း ဝႃႈၼႆ။
ၸၢႆးလႃႉဢွင်ႇ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝဵင်းၵူတ်းၶၢႆ ႁဝ်းတႄႉ လႆႈငိၼ်းသဵင်ၵွင်ႈလူင်ၶႃႈ။ ဢွင်ႈတီႈဢၼ်ပဵၼ်ပၢင်တိုၵ်းၵၼ်ၼၼ်ႉ ၸမ်ဝဵင်းၵူတ်ႉၶၢႆၼႆႉၵူၺ်း။ ပၢင်တိုၵ်းၼႆႉ တႄႇပဵၼ် ယၢမ်းၵၢင်ၼႂ် 5 မူင်းၶိုင်ႈ ထိုင် 11 မူင်းၵၢင်ဝၼ်းၼႆႉ။ ပဵၼ်ၵၼ်တၢင်းၾၢႆႇၸၢၼ်းလွႆသၢမ်သိပ်း” ဝႃႈၼႆ။
ၵူၺ်းၵႃႈ ပၢင်တိုၵ်းဢၼ်ပဵၼ်ၵၼ်မိူဝ်ႈၼႆႉတႄႉ သွင်ၾၢႆႇၽႃႇၺႃးသေ ပဵၼ်ၵႂႃႇၵူၺ်း။ လႆႈငိၼ်းသဵင်ၵွင်ႈပဵၼ်ၵမ်း။ တေႃႈလဵဝ် ၼႂ်းဝဵင်းၵူတ်ႉၶၢႆ ၵူၼ်းၵႂႃႇမႃးမိူၼ်ၵဝ်ႇယဝ်ႉ မၼ်းၸၢႆးလၢတ်ႈၼင်ႇၼႆ။
ၸုမ်းဢူၺ်းလီသိုၵ်း 3 ၸုမ်းၼႆႉ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် တေႃႇထိုင်ပီၼႆႉသဵင်ႈ ဝၼ်းတီႈ 31 လိူၼ်တီႊသႅမ်ႊပိူဝ်ႊ။ လိူဝ်ၼၼ်ႉ တၢင်းၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈသမ်ႉ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် ထိုင်ဝၼ်း တီႈ 21/9/2019 ၼႆႉ သေ တေႃႇထိုင်ယၢမ်းလဵဝ် ပႆႇသိုပ်ႇပိုၼ်ၽၢဝ်ႇၵိုတ်းတိုၵ်းထႅင်ႈ။
ၸဝ်ႈႁၢၼ် တႃႉဢၢႆႈၵျေႃႇ လၢတ်ႈဝႃႈ “ ၵဵဝ်ႇလူၺ်ႈလွင်ႈ သိုၵ်းမၢၼ်ႈ ပိုၼ်ၽၢဝ်ႇ ၵိုတ်းတိုၵ်းဢမ်ႇၵိုတ်းတိုၵ်းဢၼ်ဝႃႈၼၼ်ႉ မၼ်းဢမ်ႇၵဵဝ်ႇၵၼ်တင်းႁဝ်း။ မိူဝ်ႈပူၼ်ႉမႃးၶဝ်ပိုၼ်ၽၢဝ်ႇၵိုတ်းတိုၵ်းဝႆႉသေတႃႉၵေႃႈ တိုၵ်ႉပဵၼ်ပၢင်တိုၵ်းၵၼ်ယူႇ။ ဢမ်ႇ ဢွၵ်ႇၶေႃႈပိုၼ်ၽၢဝ်ႇၵေႃႈ ပဵၼ်ပၢင်တိုၵ်းၵၼ်ယူႇ။ ဢၼ်ၶဝ်ဢမ်ႇသိုပ်ႇၵိုတ်းတိုၵ်းထႅင်ႈတႄႉ လႅပ်ႈၶဝ်တေႁၢင်ႈႁႅၼ်းသိုၵ်း ၶဝ်။ လႅပ်ႈတေပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇႁိုဝ် ဢၼ်ဝႃႈၼၼ်ႉ ပဵၼ်ဢၼ်လီမႆႈၸႂ်ယူႇ” ဝႃႈၼႆ။
ၸုမ်းဢူၺ်းလီသိုၵ်း 4 ၸုမ်း တင်း တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ မိူဝ်ႈဝၼ်းတီႈ 17/9/2019 ၼၼ်ႉ ႁူပ်ႉဢုပ်ႇဢူဝ်း ငူပ်ႉငီႉၵၼ် တီႈၵဵင်းတုင် ၸိုင်ႈတႆးပွတ်းဢွၵ်ႇၶူင်း။ ၵဵဝ်ႇလူၺ်ႈလွင်ႈလူတ်းယွမ်းပၢင်တိုၵ်းၼၼ်ႉ ဢမ်ႇလႆႈဢုပ်ႇဢူဝ်းသင် ၵၼ်။ လိူဝ်ၼၼ်ႉ ပိုၼ်ၽၢဝ်ႇဝႆႉဝႃႈ ပေႃးထိုင်ဢွၵ်ႊထိူဝ်ႊပိူဝ်ႊ တေႁူပ်ႉၵၼ်ထႅင်ႈ ဝႃႈၼႆ။
