လုၵ်ႈဢွၼ်ႇတႆး ယၢၼ်မိူင်း 2 ၵေႃႉ ဢၼ်ၶိုၼ်ႈႁူင်းႁဵၼ်းထႆး ဝႆႉၼႂ်းၸႄႈတွၼ်ႈၵဵင်းမႆႇ ၸိုင်ႈထႆးၼၼ်ႉ မီးတိုဝ်ႉတၢင်း တေလႆႈၵႂႃႇလဵပ်ႈႁဵၼ်းတီႈပၢင်ပွႆးၼႄၾၢႆႇပၢႆးသၢႆႊ (စက်မှု သိပ္ပံပြပွဲ)တီႈမိူင်းၵျပၼ်ႊ။
ၼၢင်းၶမ်းၽွၼ်း တိယ ဢႃယု 15 ပီလႄႈ ၼွင်ႉယႃႈယီ သႄႉသျီႇ ဢႃယု 12 ပီ သွင်ၵေႃႉၼႆႉပဵၼ် လုၵ်ႈဢွၼ်ႇ ႁႅင်းၵၢၼ်ယၢၼ်မိူင်း(ၵူၼ်းမိူင်းတႆး) တေလႆႈၵႂႃႇလဵပ်ႈ ႁဵၼ်းတီႈပၢင်ပွႆးၼႄပၢႆးသၢႆႊ (စက်မှု သိပ္ပံပြပွဲ) Small Power Change the World Project Year 7 တီႈမိူင်းၵျပၼ်ႊ ၼႂ်း ဝၼ်းတီႈ 6-9/10/2019 ၼႆႉဝႃႈၼႆ။
ၵဵဝ်ႇၵပ်းလွင်ႈ လုၵ်ႈႁဵၼ်း 2 ၵေႃႉ တေလႆႈၵႂႃႇလဵပ်ႈႁဵၼ်း တီႈမိူင်း ၵျပၼ်ႊၼၼ်ႉ ယူႇတီႈလူင်ပွင်ၸိုင်ႈမိူင်းထႆး ပၼ်ၶႂၢင်ႉ ႁဵတ်းပၼ်ပပ်ႉ ၶၢမ်ႈမိူင်းသီလိူင်(တွၼ်ႈတႃႇၵူၼ်းဢမ်ႇမီးသဵၼ်ႈမၢႆႁူဝ်ႁိူၼ်း ၼႂ်းမိူင်းထႆး) ။ ယွၼ်ႉဝႃႈ လုၵ်ႈႁဵၼ်း 2 ၵေႃႉၼႆႉ ဢမ်ႇပႆႇမီးဝႂ်ၵပ်းတူဝ်ထႆး(မၢႆၾၢင်)။ ယွၼ်ႉဝႃႈပေႃႈမႄႈလုၵ်ႈဢွၼ်ႇၼႆႉ ဢမ်ႇၸႂ်ႈၵူၼ်းမိူင်းထႆး ၊ ပဵၼ်ၵူၼ်းၵိူတ်ႇတၢင်းမိူင်းတႆးသေမႃးပဵၼ်ႁႅင်းၵၢၼ်ၼႂ်းမိူင်းထႆး။
တေႃႈလဵဝ် ၶဝ်သွင်ၵေႃႉၼႆႉ လႆႈယိပ်းဝႂ် 10 ပီ(ဝႂ်ပိုၼ်ႉတီႈ) သေ ႁဵၼ်းလိၵ်ႈၼႂ်းႁူင်းႁဵၼ်းလူင်ပွင်ၸိုင်ႈၼႆး ၼႂ်းၸႄႈဝဵင်းၵဵင်းလၢဝ်လႄႈ ၸႄႈဝဵင်း သမိူင်း ၸႄႈတွၼ်ႈၵဵင်းမႆႇ ၸိုင်ႈထႆး။
ၶဝ် 2 ၵေႃႉၼႆႉဢမ်ႇၸႂ်ႈႁူင်းႁဵၼ်းလဵဝ်ၵၼ်။ ၵူၺ်းပဵၼ်လုၵ်ႈႁဵၼ်းၵတ်ႉၶႅၼ်ႇလိၵ်ႈသေ လႆႈႁပ်ႉသူးရၢင်းဝလ်းၾၢႆႇပၢႆးသၢႆႊ ဢၼ်လႆႈၶႅင်ႇၵၼ် ၼႂ်းႁူင်းႁဵၼ်း ၼႂ်းမိူင်းထႆးပတ်းပိုၼ်ႉမႃး လၢႆလၢႆၶၵ်ႉတွၼ်ႈ ဝႃႈၼႆ။
တွၼ်ႈတႃႇ လုၵ်ႈႁဵၼ်းတႆး ယၢၼ်မိူင်း 2 ၵေႃႉ တေလႆႈၵႂႃႇလဵပ်ႈႁဵၼ်းတီႈ ပၢင်ပွႆးၾၢႆႇပၢႆးသၢႆႊ(စက်မှု သိပ္ပံပြပွဲ) တီႈမိူင်း ၵျပၼ်ႊ ၼၼ်ႉ ယူႇတီႈၶူးသွၼ်၊ ၽူႈၵွၼ်းၼႃႈတီႈ(နယ်မြေအုပ်ချုပ်ရေးမှူး)၊ ယဝ်ႉၵေႃႈ ၸၼ်ႉၸွမ်ၾၢႆႇပၢႆး ၸၢၵ်ႈ ၵုင်း ထဵပ်ႈ(ဘန်ကောက်မြို့ နည်းပညာတက္ကသိုလ်) ၸွႆႈၵမ်ႉထႅမ်ပၼ် ။
ၼၢင်းၶမ်းၽွၼ်း တိယၼႆႉ ၶိုၼ်ႈႁဵၼ်းဝႆႉတီႈ ႁူင်းႁဵၼ်းဝၢၼ်ႈဝေႃႇၵႅဝ်ႈ ၸႄႈဝဵင်းသမိူင်း။ ယိင်းယႃးယီ သႄႉသျီႇသမ်ႉ ၶိုၼ်ႈႁဵၼ်းဝႆႉတီႈ ႁူင်းႁဵၼ်းဝၢၼ်ႈဢၼုရူဝ်းထႆး ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈထႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ