မိူဝ်ႈၼႆႉ ဝၼ်းတီႈ 13/9/2019 သိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း TNLA ပၢင်ပဵၼ်တိုၵ်းၵၼ် ၼႂ်းၸႄႈဝဵင်း ၼမ်ႉသၼ်ႇ ႁၢဝ်ႈႁႅင်း ၵူၼ်းမိူင်း တူၵ်းၸႂ်ၵူဝ်ႁႄတိုၼ်ႇသၢၼ်ႈ။

ပၢင်တိုၵ်းၼႆႉ တႄႇပဵၼ် ယၢမ်းၵၢင်ၼႂ် 7 မူင်း တီႈလွႆၽြႃး ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ ။ ယူႇတီႈတပ်ႉ သိုၵ်းလူင် ပွင်ၸိုင်ႈမၢၼ်ႈ ၸႂ်ႉၵွင်ႈလူင် လႄႈ ၶိူင်ႈမိၼ် ယိုဝ်းႁၢဝ်ႈႁႅင်း ၵူၼ်းၼႂ်းပိုၼ်ႉတီႈဢွၼ်ၵၼ်တူၵ်းၸႂ် တိုၼ်ႇသၢၼ်ႈဝႃႈၼႆ။

လူၺ်းဢေး လၢတ်ႈတီႈၽူႈတွႆႇႁွၵ်ႈဝႃႈ “  တေႃႇထိုင် ယၢမ်းဝၢႆးဝၼ်း 3 မူင်းပၢႆၼႆႉ တိုၵ်ႉယိုဝ်းၵၼ်ယူႇ။ လႆႈငိၼ်းသဵင်ၵွင်ႈမၢၵ်ႇလူင်ႁၢဝ်ႈႁႅင်း။ ယဝ်ႉ ၵေႃႈ ၶိူင်ႈမိၼ်ၵေႃႈမႃး။ ႁဝ်းၶႃႈၵူၼ်းမိူင်း  ဢွၼ်ၵၼ်ပိၵ်ႉၽၵ်းတူသေ မူၵ်းယူႇၼႂ်းႁိူၼ်းၵူၺ်းၶႃႈ၊ ဢမ်ႇႁတ်း ဢွၵ်ႇၵႂႃႇတၢင်းလႂ် ယွၼ်းသူးယႃႇႁႂ်ႈသိုပ်ႇပဵၼ်ပၢင်တိုၵ်းထႅင်ႈၵူၺ်းယဝ်ႉၶႃႈ” ဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းဢူၺ်းလီပွတ်းႁွင်ႇ သၢမ်ပီႈၼွင်ႉၼႆႉ တေၵိုတ်းတိုၵ်းၾၢႆႇလဵဝ်ၼႆသေ ဢွၼ်ၵၼ်ပိုၼ်ၽၢဝ်ႇဝႆႉႁင်းမၼ်းသေတႃႉ ယၢမ်းလဵဝ် သမ်ႉတိုၵ်ႉယိုဝ်းၵၼ်ထႅင်ႈယူႇ။

တႃႉဢၢႆႈၵျေႃႇ ၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ပၢင်တိုၵ်းပဵၼ် ႁၢဝ်ႈႁႅင်း။ တႄႇပဵၼ် ၵၢင်ၼႂ် 7 မူင်း ထိုင် 12 မူင်းၵၢင်ဝၼ်း ပဵၼ် တၢင်းဝၢၼ်ႈလွႆလႄႈ ႁူဝ်ၵျွင်း။ ယင်ႉၵမ်ႉၼိုင်ႈၵူၺ်း သိုပ်ႇပဵၼ် ထႅင်ႈ ယၢမ်းဝၢႆးဝၼ်း 2 မူင်းပၢႆ ယူႇတီႈတၢင်းသိုၵ်းမၢၼ်ႈတႄႉ ၸႂ်ႉၶိူင်ႈမိၼ်သေယိုဝ်း ။တေႃႈလဵဝ်ၼႆႉ ပၢင်တိုၵ်းယဵၼ်ၵႂႃႇယဝ်ႉၼႆသေတႃႉ တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းၵၼ်ယူႇ။” ဝႃႈၼႆ။

ဝၼ်းတီႈ 16-17/9/2019 တေထိုင်ၼႆႉ ၸုမ်းဢူၺ်းလီ 4 ၸုမ်းတင်း ၶွမ်ႊမသျိၼ်ႊလွင်ႈငမ်းယဵၼ် တေႁူပ်ႉၵၼ် တီႈၵဵင်း တုင် ၸိုင်ႈတႆးပွတ်းဢွၵ်ႇၶူင်းထႅင်ႈ ဝႃႈၼႆ။

တႃႉဢၢႆႈၵျေႃႇ လၢတ်ႈဝႃႈ “ သိုၵ်းမၢၼ်ႈၸႂ်ႉၵွင်ႈလူင်ယိုဝ်းႁၢဝ်ႈႁႅင်း။ ပေႃးပဵၼ်ပၢင်တိုၵ်းၸိူင်ႉၼႆ တေယၢပ်ႇၽိုတ်ႇ တွၼ်ႈ တႃႇ လွင်ႈဢုပ်ႇဢူဝ်းၵၼ်။ ယဝ်ႉၵေႃႈ ၾၢႆႇၼိုင်ႈလႄႈ ၾၢႆႇၼိုင်ႈၵေႃႈဢမ်ႇပေႃးမီးလွင်ႈယုမ်ႇယမ်ၼိူဝ်ၵၼ်” ဝႃႈ ၼႆ။

သိုၵ်းလူင်ပွင်ၸိုင်ႈမၢၼ်ႈ တင်း ၸုမ်းဢူၺ်းလီ 3 ၸုမ်းၼႆႉ တႄႇပဵၼ်ပၢင်တိုၵ်းၵၼ် မိူဝ်ႈဝၼ်းတီႈ 15/8/2019 တေႃႇထိုင် ယၢမ်းလဵဝ် တိုၵ်ႉသိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇ ၼႂ်းၸိုင်ႈတႆးပွတ်းႁွင်ႇ။ ဢိင်ၼိူဝ်လွင်ႈပဵၼ်ပၢင်တိုၵ်းၼႆႉသေ ၵူၼ်း မိူင်းလႆႈလူႉတၢႆၸွမ်းၼႂ်းပၢင်တိုၵ်း ဢမ်ႇယွမ်း 10 ၵေႃႉ မၢတ်ႇၸဵပ်း ဢမ်ႇယွမ်း 27 ၵေႃႉ ရူတ်ႉၵႃး ၺႃးၽဝ် ၼပ်ႉႁူဝ်သိပ်း လမ်း ဝႃႈၼႆ။