ၵူၼ်းသွင်ၵေႃႉၶီႇလူတ်ႉၶိူင်ႈၶဝ်ႈယိုဝ်းႁူင်းပလိၵ်ႈ လႃႈသဵဝ်ႈ

ၵူၼ်းသွင်ၵေႃႉ ၶီႇလူတ်ႉၶိူင်ႈမႃးယိုဝ်းႁူင်းပလိၵ်ႈမၢႆ 2  ဢၼ်မီးတီႈ ပွၵ်ႉ 12 လႃႈသဵဝ်ႈ  ပဵၼ်ၽႂ်ယိုဝ်း ဢမ်ႇလႆႈႁူႉၸွမ်း ဝႃႈၼႆ။

ဝၼ်းတီႈ 3/9/2019 မိူဝ်ႈဝႃးယၢမ်းၵၢင်ၶမ်ႈ 8 မူင်းၼႆႉ ႁူင်းပလိၵ်ႈမၢႆ 2 ဝဵင်းလႃႈသဵဝ်ႈ ၺႃးယိုဝ်း။ ၵူၼ်းတႄႉဢမ်ႇမီးလွင်ႈမၢတ်ႇၸဵပ်းလုတၢႆ။   ႁူဝ်ႉ ၊ ႁိူၼ်းပလိၵ်ႈ  ၺႃးမၢၵ်ႇၵွင်ႈလုၵွႆၽွင်ႈယူႇဝႃႈၼႆ။

ၸၢႆးသႅင် ၵူၼ်းလႃႈသဵဝ်ႈ ၵူၼ်းၸမ်ၸႂ်ပလိၵ်ႈလႃႈသဵဝ်ႈလၢတ်ႈတီႈၽူႈတွႆႇႁွၵ်ႈဝႃႈ – “မီးၵူၼ်းသွင်ၵေႃႉ ၶီႇလူတ်ႉၶိူင်ႈသေ မႃးတၢင်းလင် ႁူင်းပလိၵ်ႈသေ မႃးယိုဝ်း။ ယိုဝ်းယဝ်ႉလႅၼ်ႈပၢႆႈၶိုၼ်းၵမ်းလဵဝ်။ ပလိၵ်ႈၵေႃႈဢမ်လမ်းၸွမ်း။ ၵူၼ်းမိူင်း ငိၼ်းသဵင်ၵွင်ႈယဝ်ႉဢမ်ႇႁတ်းဢွၵ်ႇႁိူၼ်းယေး။ ဢမ်ႇမီးၽႂ်ႁတ်းၵႂႃႇတူၺ်းၶႃႈ ” – ဝႃႈၼႆ။

ၸၢႆးသႅင်လၢတ်ႈဝႃႈ ၾၢႆႇလင်တပ်ႉပလိၵ်ႈမၢႆ 2 ၼၼ်ႉ ၸမ်ၵၼ်တင်းလုမ်းပီႇတုၸိတ်ႉမၢၼ်ႈပၢင်ႇ   ။ ၵူၺ်းၵႃႈဢၼ်ယိုဝ်းၼႆႉပဵၼ်ၽႂ်ၼႆတႄႉဢမ်ႇလႆႈႁူႉ ပလိၵ်ႈၵေႃႈ ပႆႇပိုၼ်ၽၢဝ်ႇပဵၼ်တၢင်းၵၢၼ် ဝႃႈၼႆ။

ၼၢင်းလူႇ ၵူၼ်းလႃႈသဵဝ်ႈလၢတ်ႈဝႃႈ –   “ၼႂ်ၼႆႉတႄႉႁၼ်ပလိၵ်ႈၵဵပ်းၶွၵ်ႇမၢၵ်ႇၵွင်ႈယူႇ။ ဢၼ်ၵူတ်ႇထတ်း ၵူၼ်းၵႂႃႇမႃးတႄႉ တီႈလႃႈသဵဝ်ႈၼႆႉ ၵူတ်ႇထတ်းၸဵမ်မိူဝ်ႈဝူင်ႈပူၼ်ႉပုၼ်ႉ။ တၢင်းၶူဝ်ဢေႇတီႇၸိူဝ်းၼႆႉ ၊ တၢင်းမၢၼ်ႈဢၢႆႇ ၸိူဝ်းၼႆႉ  ပႂ်ႉၵူတ်ႇထတ်းယူႇ။ ”- ဝႃႈၼႆ။

ဢၼ်မႃးယိုဝ်းၼႆႉၶၢဝ်းယၢမ်း မွၵ်ႈ 8 မူင်းၶိုင်ႈ ၵၢင်ၶမ်ႈ။ ပဵၼ်ၶၢဝ်းယၢမ်းလဵဝ်ၵၼ်တင်းဢၼ် လူတ်ႉၵႃး 7 လမ်းၺႃးၽဝ်တီႈသျူႉၶိၼ်းတႃႇ  ၾၢႆႇႁွင်ႇဝဵင်းၵူတ်ႉၶၢႆ မွၵ်ႈ 8 လၵ်း (သဵၼ်ႈတၢင်းၵႂႃႇၼမ်ႉၽၵ်းၵႃ) ။

ၵဵဝ်ႇၵပ်းလွင်ႈၼႆႉ ပလိၵ်ႈလႃႈသဵဝ်ႈပွႆႇၶၢဝ်ႇ ဝႃႈ- ဢၼ်လၢၵ်ႇလၢႆးၼႆႉ ပဵၼ်ၶၢဝ်းလဵဝ်ၵၼ်တင်းလူတ်ႉၵႃးၺႃးၽဝ်။ၸုမ်းၽူႈၵေႃႇၵၢၼ်ႁၢႆႉၼႆႉ  မိူၼ်ၶဝ်တင်ႈၸႂ်ဝႆႉ။ – ဝႃႈၼႆ။

ၽူႈၼမ်းၼႂ်း ၵူႈလွင်ႈလွင်ႈ တပ်ႉသိုၵ်း TNLA တႃႉၽူင်းၵျေႃႇ   လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ယိုဝ်းတီႈလႃႈသဵဝ်ႈၼႆႉ ဢမ်ႇၸႂ်ႈၼမ်ႉမိုဝ်း ၸုမ်းတဢၢင်း ” – ဝႃႈၼႆ။

မိူဝ်ႈဝႃးယၢမ်းၵၢင်ၶမ်ႈမွၵ်ႈ 8 မူင်းၶိုင်ႈ လူတ်ႉၵႃး 7 လမ်းၺႃးၽဝ်တီႈ သျူႉၶိၼ်းတႃႇၼႆႉ ပဵၼ်လူတ်ႉၵႃးၵူၼ်းမိူင်း။လူတ်ႉယႂ်ႇ 4 လမ်းလႄႈ လူတ်ႉဢွၼ်ႇ 3 လမ်း။