သိုၵ်းလူင်ပွင်ၸိုင်ႈမၢၼ်ႈ ဢဝ်ၶိူင်ႈဝိၼ် ပၼ်ႇလဵပ်ႈ ၼႂ်းၸႄႈဝဵင်းၵူတ်ႉၶၢႆသေ ပွႆႇမၢၵ်ႇသႂ်ႇ ဝတ်ႉဝႃးလႄႈ ႁိူၼ်းယေး ၵူၼ်းဝၢၼ်ႈ လႆႈလူႉၵွႆ ၵူၼ်းမိူင်းပိုၼ်ႉတီႈလၢတ်ႈ။

ဝၼ်းတီႈ 2/9/2019 ယၢမ်းဝၢႆးဝၼ်း 4 မူင်းပၢႆၼၼ်ႉ သိုၵ်းလူင်ပွင်ၸိုင်ႈမၢၼ်ႈ ၸႂ်ႉႁိူဝ်းမိၼ် 2 လမ်း မိၼ်ပၼ်ႇလဵပ်ႈၼႂ်း ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇသေ ပွႆႇမၢၵ်ႇလူင်း တိူဝ်ႉသႂ်ႇတီႈဝတ်ႉႁူၺ်ႈၶူၵ်ႉ လႄႈ ႁိူၼ်းၵူၼ်းဝၢၼ်ႈ ၵမ်ႈၽွင်ႈ လႆႈလူႉၵွႆ ဝႃႈၼႆ။

လုင်းဢၢႆႈမူၼ်း ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈ တဢၢင်း လၢတ်ႈတီႈၽူႈတွႆႇႁွၵ်ႈဝႃႈ “ ဢွၼ်တၢင်းသုတ်းတႄႉ ၶဝ်ဢဝ်ႁိူဝ်းမိၼ်သေယိုဝ်း။ ဝၢႆးၼၼ်ႉယဝ်ႉ သမ်ႉၶိုၼ်းဢဝ်ၵွင်ႈလူင်ယိုဝ်းထႅင်ႈ။ ဢၼ်ၶဝ်ဢဝ်ႁိူဝ်းမိၼ်ယိုဝ်းၼၼ်ႉ တိူဝ်ႉသႂ်ႇတီႈဝတ်ႉႁူၺ်ႈၶူၵ်ႉ။ မၢၵ်ႇလူင်ဢၼ်ၶဝ်ယိုဝ်းမႃးၼၼ်ႉ တိူဝ်ႉၸွမ်းႁိူၼ်းၵူၼ်းဝၢၼ်ႈ”ဝႃႈၼႆ။

ၵူၼ်းၵူတ်ႉၶၢႆလၢတ်ႈဝႃႈ “ယၢမ်းၵၢင်ၼႂ် ၸုမ်းသိုၵ်းဢူၺ်းလီၵႂႃႇယိုဝ်းတပ်ႉတီႈၵူတ်ႉၶၢႆ။ ထိုင်ဝၢႆးဝၼ်းမႃးသိုၵ်းမၢၼ်ႈၵူတ်ႉၶၢႆ ယိုဝ်းမၢၵ်ႇလူင်သႂ်ႇ ဝၢၼ်ႈႁူၺ်ႈၶူၵ်ႉ။ မၢၼ်ႈထမ်ႈလႄႈ ႁူဝ်ၸၢင်ႉ။ လိူဝ်ၼၼ်ႉ သမ်ႉဢဝ်ႁိူဝ်းမိၼ်ၵႂႃႇပၼ်ႇပႃးထႅင်ႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတိတ်းတေႃႇၵႂႃႇတီႈၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈၵေႃႈ ဢမ်ႇမီးလွင်ႈတုမ်ႉတွပ်ႇလၢတ်ႈသင်ၶိုၼ်း။

မၢၵ်ႇဢၼ်တူၵ်းသႂ်ႇ တီႈဝတ်ႉႁူၺ်ႈၶူၵ်ႉၼၼ်ႉ တိူဝ်ႉသႂ်ႇ ႁူင်းသုင်းသွမ်း၊ ဝိႁၢရ်၊ သိမ်ႇ၊ ႁွင်ႈၼမ်ႉ ၵျွင်းမုၼ်ၸဝ်ႈ။ လိူဝ်ၼၼ်ႉ တူၵ်းသႂ်ႇႁိူၼ်းၵူၼ်းဝၢၼ်ႈ လႆႈလူႉၵွႆၵမ်ႈၽွင်ႈ ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈၽႅဝ်ဝႆႉဝတ်ႉႁူမ်ႈယဵၼ် (မဟာစည်ရိပ် သာ) လၢတ်ႈ။

“မၢၵ်ႇလူင်ဢၼ်သိုၵ်းမၢၼ်ႈယိုဝ်းၼၼ်ႉ တိူဝ်ႉသႂ်ႇဝတ်ႉ။ တိူဝ်ႉသႂ်ႇႁိူၼ်းၵူၼ်းဝၢၼ်ႈ မိူၼ် ၼင်ႇ ၸၢၼ်းႁိူၼ်း၊ မုင်းႁိူၼ်း၊ သမ်ႉပေႃးပွင်ႇပဵၼ်ႁူး ၵႂႃႇမူတ်း၊ မိူဝ်ႈၽွင်း သိုၵ်းမၢၼ်ႈ ဢဝ်ႁိူဝ်းမိၼ် ပွႆႇမၢၵ်ႇသႂ်ႇလႄႈ ယိုဝ်းၵွင်ႈလူင်သႂ်ႇၼၼ်ႉ ၵူၼ်းဝၢၼ်ႈ လႆႈဢွၼ်ၵၼ်ပၢႆႈၵႂႃႇမူၵ်းဝႆႉၼႂ်းၶုမ်လိၼ်/ ထၢင်လိၼ်ဝႆႉ” ဝႃႈၼႆ။

လုင်းထုၼ်းဢွင်ႇ ၸုမ်းၸွႆႈထႅမ် ၵရုၼႃႇ ၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝႃးယၢမ်းၵၢင်ၶမ်ႈၼၼ်ႉ ယွၼ်ႉမၢၵ်ႇ တူၵ်းသႂ်ႇၼႂ်းဝၢၼ်ႈၼႆသေ ၸုမ်းႁဝ်းၶႃႈလႆႈၵႂႃႇၸွႆႈဢဝ်ၵူၼ်းဝၢၼ်ႈဢွၵ်ႇမႃး တင်းမူတ်း 264 ၵေႃႉ။ ဢဝ်မႃးဝႆႉတီႈဝတ်ႉ ႁူမ်ႈယဵၼ်(မဟာစည်ရိပ်သာ) ဝႆႉ” ဝႃႈၼႆ။

ဝၢၼ်ႈႁူၺ်ႈၶူၵ်ႉၼႆႉ ယၢၼ်ၵၼ်တင်းဝဵင်းၵူတ်ႉၶၢႆ 2 လၵ်း ဝႃႈၼႆ။

ဝၼ်းတီႈ 31/8/2019 ၼၼ်ႉ ၸုမ်းဢူၺ်းလီ 4 ၸုမ်းလႄႈ သုၼ်ၵၢင်မႄးလီ ၼႂ်းၸိူဝ်ႉၸၢတ်ႈ NRPC ႁူပ်ႉဢုပ်ႇ ငူပ်ႉ ငီႉၵၼ် တီႈၵဵင်းတုင်။ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈၵေႃႈ ပိုၼ်ၽၢဝ်ႇဝႆႉဝႃႈ သိုပ်ႇၵိုတ်းတိုၵ်းထႅင်ႈလႄႈ လွင်ႈၵူၼ်းပၢႆႈၽေးတီႈ ၵူတ်ႉၶၢႆၼၼ်ႉ တေၶပ်းၶိုင်ႁၢင်ႈႁႅၼ်း သူင်ႇပွၵ်ႈၶိုၼ်းႁိူၼ်းယေး ဝႃႈၼႆ။

လုင်းဢၢႆႈမူၼ်း လၢတ်ႈဝႃႈ “ မိူဝ်ႈပူၼ်ႉမႃးၼၼ်ႉ ယွၼ်ႉဝႃႈ မီးလွင်ႈသိုပ်ႇၵိုတ်းတိုၵ်းထႅင်ႈသေ ႁဝ်းၶႃႈ ပဵၼ်ဢၼ်ၸႂ်လီ ၸွမ်းတႄႉ တွၼ်ႈတႃႇၵူၼ်းပၢႆႈၽေးပေႃးတေလႆႈပွၵ်ႈႁိူၼ်းၼၼ်ႉႁဝ်းၶႃႈတိုၵ်ႉၶပ်းၶိုင်ဝႆႉယူႇ။ ၵူၺ်းၵႃႈ ပၢင်တိုၵ်းပဵၼ် ၾၢႆႇလဵဝ်သေယိုဝ်းတႄႉ ၵူၼ်းဝၢၼ်ႈတႄႉ ဢမ်ႇၵူဝ်ၶႃႈ။ တေႃႈလဵဝ်ၼႆႉ သမ်ႉၸႂ်ႉႁိူဝ်းမိၼ်ပွႆႇမၢၵ်ႇ ၸႂ်ႉၵွင်ႈလူင် ယိုဝ်းၼႆ ဢၼ်ၼႆႉယဝ်ႉ ၵူၼ်းဝၢၼ်ႈႁဝ်းၵူဝ်သေပိူၼ်ႈ။ ဢမ်ႇႁူႉဝႃႈ မၢၵ်ႇတေတူၵ်းမိူဝ်ႈလႂ်။ မၢၵ်ႇလူင်ဢၼ်ယိုဝ်းမႃးၼၼ်ႉ ဢမ်ႇႁူႉဝႃႈ တေမႃးတၢင်းလႂ် ၸဵမ်ၸိူဝ်းၼႆႉ” ဝႃႈၼႆ။

မိူဝ်ႈဝၼ်းတီႈ 31/8/2019 မၢၵ်ႇလူင်တူၵ်းသႂ်ႇ ႁိူၼ်းၵူၼ်းဝၢၼ်ႈ တီႈဝၢၼ်ႈမေႃႇႁဵၵ်ႇ ၸႄႈဝဵင်းၵူတ်ႉၶၢႆသေ တူၵ်း

သႂ်ႇၵူၼ်း ဝၢၼ်ႈ လႆႈလူႉတၢႆ 5 ၵေႃႉ။ ၼႂ်းၼၼ်ႉ ပႃးၼၢင်းယိင်း၊ လုၵ်ႈဢွၼ်ႇလႅင်လႄႈ လုၵ်ႈဢွၼ်ႇ ဝႃႈၼႆ။

တပ်ႉသိုၵ်းလူင်ပွင်ၸိုင်ႈမၢၼ်ႈတင်း ၸုမ်းဢူၺ်းလီ 3 ၸုမ်းၼႆႉ တႄႇပဵၼ်ပၢင်တိုၵ်းၵၼ်မႃး မိူဝ်ႈဝၼ်းတီႈ 15/8/2019 မႃးသေ တေႃႇထိုင်ဝၼ်းမိူဝ်ႈၼႆႉ ၵူၼ်းမိူင်းလႆႈလူႉတၢႆယွၼ်ႉပၢင်တိုၵ်း 17 ၵေႃႉ မၢတ်ႇၸဵပ်း 30 ၵေႃႉယဝ်ႉ ဝႃႈၼႆ။