သိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇသိုပ်ႇၵိုတ်းတိုၵ်းထႅင်ႈ တႃႇ 5 တိူင်း ၼႂ်းၸႄႈမိူင်းတႆးလႄႈ ၸႄႈမိူင်းၶၢင် တႃႇၶၢဝ်း တၢင်း 21 ဝၼ်း။

ဝၼ်းတီႈ 31/8/2019 ၼႆႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇသိုပ်ႇၵိုတ်းတိုၵ်းထႅင်ႈ 21 ဝၼ်း ဢိင်ၼိူဝ် လွင်ႈ ၸုမ်းဢူၺ်းလီ 4 ၸုမ်း တပ်ႉသိုၵ်းတဢၢင်း TNLA၊ ၵဝ်ႈၵၢင်ႉ MNDAA၊ ရၶႅင်ႇ AA လႄႈ ၶၢင် KIA/KIO တင်း သုၼ်ၵၢၼ် မႄးလီ ၼႂ်းၸိူဝ်ႉၸၢတ်ႈ NRPC ႁူပ်ႉဢုပ်ႇဢူဝ်းငူပ်ႉငီႉၵၼ် တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။

ၸဝ်ႈၶိုၼ်းသႂ်ၸႂ်ယဵၼ် ၽူႈၵွၼ်းႁွင်ႈၵၢၼ်လုမ်း PI လၢတ်ႈဝႃႈ “ သိုၵ်းလူင်ပွင်ၸိုင်ႈ သိုပ်ႇၵိုတ်းထိုင်ဝၼ်းတီႈ 21 ။ မိူဝ်ႈၵူႈ ပွၵ်ႈၼႆႉ ၶဝ်ပိုၼ်ၽၢဝ်ႇၵိုတ်းတိုၵ်း ၼိုင်ႈပွၵ်ႈလႂ် 2 လိူၼ်။ ၵမ်းၼႆႉသမ်ႉ ပဵၼ် 21 ဝၼ်း။ ၼႆႉၵေႃႈ ပေႃးၵုမ်ႇသိုပ်ႇၵိုတ်းတိုၵ်း ယူႇတိၵ်းတိၵ်းမၼ်းၵေႃႈ တေၵႄႉပႅတ်ႈၼၼ်ႉၼႃႇ လႅပ်ႈပဵၼ်ၸိူင်ႉၼၼ်။ ၵွပ်ႈၼႆလႄႈ ပၼ်ဝႆႉ တေႃႇထိုင်ဝၼ်းတီႈ 21 ၵွပ်ႈပိူဝ်ႈဝႃႈ သိုၵ်းမၢၼ်ႈၶဝ် တႄႇၵိုတ်းတိုၵ်းမႃးၼၼ်ႉ မိူဝ်ႈဝၼ်းတီႈ 21/12/2018 ၶဝ်ၵေႃႈၶိုၼ်းမႄးယဝ်ႉ ၼႂ်းဝၼ်းတီႈ 21 လိူၼ်ၼႆႉ တႃႇ 9 လိူၼ်တဵမ် တဵမ်” ဝႃႈၼႆ။

ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်ၼႆႉ တႄႇဢဝ် လိူၼ်ၻီႊသႅမ်ႊပိူဝ်ႊ ဝၼ်းတီႈ 21 ပီ 2018 ထိုင် လိူၼ်ဢေႊပရိူဝ်ႊ ဝၼ်းတီႈ 30 ပီ 2019 ၵမ်းၼိုင်ႈ။ လိူဝ်ၼၼ်ႉ သိုပ်ႇပိုၼ်ၽၢဝ်ႇၵိုတ်းတိုၵ်း တႄႇဢဝ် လိူၼ် မေႊ 2019 ထိုင် လိူၼ်ၵျုၼ်ႊ 2019 ထႅင်ႈၵမ်းၼိုင်ႈ။ ယဝ်ႉၵေႃႈ ပိုၼ်ၽၢဝ်ႇ သိုပ်ႇၵိုတ်းတိုၵ်းထႅင်ႈ တႄႇဢဝ် လိူၼ်ၵျူႊ လၢႆႊ 2019 ထိုင် လိူၼ်ဢေႃႊၵတ်ႊသ် ဝၼ်းတီႈ 31 ပီ 2019 ၼႆႉထႅင်ႈၵမ်းၼိုင်ႈ။ ၵမ်းၼႆႉ တႄႇဢဝ် ဝၼ်းတီႈ 31 လိူၼ် ဢေႃႊၵတ်ႊသ် တေႃႇထိုင် ဝၼ်းတီႈ 21 လိူၼ်သႅပ်ႊထႅမ်ႊပိူဝ်ႊ 2019 ထႅင်ႈၵမ်းၼိုင်ႈတင်းမူတ်း ၶၢဝ်းယၢမ်းဢၼ်ပိုၼ် ၽၢဝ်ႇၵိုတ်းတိုၵ်းမႃးၼႆႉ တေမီးယူႇ 9 လိူၼ် ဝႃႈၼႆ။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ RCSS/SSA ၼင်ႈလုမ်းၵပ်းသၢၼ် တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈ မိူဝ်ႈ ဝၼ်းတီႈ 27/6/2019 ၼၼ်ႉဝႃႈ“ ၾၢႆႇတပ်ႉမတေႃႇ သိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် ဢၼ်ဝႃႈၼၼ်ႉ မၼ်းပဵၼ် ၵၢၼ်လဵၼ်ႈဢၼ်ၼိုင်ႈၵူၺ်း။ တီႈတႄႉမၼ်း ၶဝ်ၵိုတ်းတိုၵ်းၾၢႆႇလဵဝ်ၼႆသေတႃႉ လၢႆးႁဵတ်းလၢႆးသၢင်ႈ လွင်ႈတူင်ႉၼိုင်ၶဝ် မၼ်းဢမ်ႇၵိုတ်း၊ လွင်ႈႁႃသွၵ်ႈ တဝ်ၶဝ်ၸိူဝ်းၼႆႉၵေႃႈ ဢမ်ႇၵိုတ်း၊ ၶဝ်ၼႄၼႃႈတိူဝ်ႈဝႃႈ (နယ်မြေစိုးမိုးရေး) သေ သွၵ်ႈတဝ် ၸွမ်းၼႂ်းထိူၼ်ႇ။ လွင်ႈသိုၵ်းၶဝ် တူင်ႉၼိုင်ၵေႃႈ ၶဝ်ဢမ်ႇယွမ်း။ ၾၢႆႇၼိုင်ႈၼႆႉတႄႉ ဢၼ်ၶဝ်ပိုၼ်ၽၢဝ်ႇၸိူင်ႉၼႆၼႆႉ ဢဝ် ၾၢႆႇၵၢၼ်မိူင်းသေဝႃႈဢဝ်ၵူၺ်း ၵၢၼ်သိုၵ်းၶဝ်တႄႉ ၶဝ်ၶိုၼ်းပၢႆထႅမ်ႁႅင်း/ ၽိူမ်ႉထႅမ်မႃးၵွၼ်ႇ ႁဝ်းၶႃႈတႄႉ ႁၼ်ထိုင်ၸိူင်ႉ ၼႆ”။

ၵဵဝ်ႇၵပ်းလွင်ႈပၢင်ၵုမ်တီႈၵဵင်းတုင်ၼႆႉသေၸဝ်ႈၶိုၼ်းသႂ် ၸႂ်ယဵၼ် သိုပ်ႇလၢတ်ႈဝႃႈ “ ပၢင်ၵုမ်တီႈၵဵင်းတုင်ၼႆႉ ဢၼ်တၢင်း ၾၢႆႇၸုမ်းဢူၺ်းလီၶဝ်တၢင်ႇမႃးၸိူဝ်းၼၼ်ႉ တၢင်းၾၢႆႇလူင်ပွင်ၸိုင်ႈ ဢုပ်ႇဢူဝ်း တူၵ်းလူင်းၵၼ်လႆႈ 70 ပိူဝ်ႊသႅၼ်ႊ။ ၵိုတ်း ယူႇ 30 ပိူဝ်ႊသႅၼ်ႊတႄႉ ၶဝ်လူဝ်ႇမိူဝ်းငူပ်ႉငီႉၵၼ်ႁင်းၽႂ်ႁင်းမၼ်းၵူၺ်း။ တၢင်းၾၢႆႇ NRPC ၵေႃႈၶဝ်လူဝ်ႇမိူဝ်းငူပ်ႉငီႉ ၵၼ်ၶိုၼ်း။ ၵွပ်ႈၸိူင်ႉၼၼ် ဝၼ်းတီႈ 16-17 ၼႆႉ ၶဝ်တေႁူပ်ႉၵၼ် မၢင်ၽဝ်ႇတေလီ။ ဢၼ်တပ်ႉသိုၵ်းမၢၼ်ႈ လႆႈသိုပ်ႇ ၵိုတ်းထႅင်ႈတေႃႇထိုင်ဝၼ်းတီႈ 21 ၼႆႉ မၼ်း ၵေႃႈၸၢင်ႈပဵၼ်ယွၼ်ႉၼႆႉ” ဝႃႈၼႆ။

တိူင်းသိုၵ်း ဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းမႃးၾၢႆႇလဵဝ်ၼၼ်ႉ ပဵၼ်တိူင်းသိုၵ်း ၸဵင်ႇႁွင်ႇဝၼ်း ဢွၵ်ႇ၊ တိူင်းသိုၵ်း ပွတ်း ႁွင်ႇ၊ တိူင်းသိုၵ်းဝၼ်းဢွၵ်ႇၵၢင်၊ တိူင်းသိုၵ်းဝၼ်းဢွၵ်ႇလႄႈ တိူင်းသိုၵ်းသၢမ်ၸဵင်ႇ ၸဵမ်ၸိူဝ်းၼႆႉ။