ႁူင်းႁဵၼ်းတဢၢင်း TEC ဢၼ်ပိုတ်ႇဝႆႉ တၢင်းၶဝ်ႈဝဵင်းၵူတ်ႉၶၢႆၼၼ်ႉ ၺႃးသိုၵ်းလူင်ပွင်ၸိုင်ႈမၢၼ်ႈ ၶဝ်ႈ သွၵ်ႈသေ ယဝ်ႉ ၵေႃႈ ႁွင်ႉထဵတ်ႈထၢမ် ၶူးသွၼ် တီႈႁူင်းႁဵၼ်းၼၼ်ႉထႅင်ႈ 2 ၵေႃႉ။

ဝၼ်းတီႈ 24/8/2019 ယၢမ်းၵၢင်ၶမ်ႈ တပ်ႉသိုၵ်းလူင်ပွင်ၸိုင်ႈမၢၼ်ႈ ယႃႉၽၵ်းတူ ႁွင်ႈႁူင်းႁဵၼ်း TEC ၶဝ်ႈသွၵ်ႈ ၼႂ်းႁွင်ႈႁဵၼ်းသေ ႁွင်ႉဢဝ်ၶူးသွၼ်ၵႂႃႇထဵတ်ႈထၢမ် 2 ၵေႃႉ ဝႃႈၼႆ။

မၢႆးဢၢႆႈမူၼ်း ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတဢၢင်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 24 ၼၼ်ႉ ယွၼ်ႉ ပၢင်တိုၵ်းယဵၼ်သေ ၶူးသွၼ် 2 ၵေႃႉ မႆႈၸႂ်ဢွၼ်ၵၼ်ပွၵ်ႈမိူဝ်းတူၺ်းႁူင်းႁဵၼ်း။ မိူဝ်ႈၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ ယႃႉသေႃးၽၵ်းတူဢၼ်ၶတ်းဝႆႉၼၼ်ႉသေ ၶဝ်ႈသွၵ်ႈတဝ် ၸွမ်းၼႂ်းႁူင်းႁဵၼ်း” ဝႃႈၼႆ။

လိူဝ်ၼၼ်ႉ ယူႇတီႈၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ႁွင်ႉၶူးသွၼ် 2 ၵေႃႉ ၵႂႃႇထဵတ်ႈထၢမ်ဝႆႉၵမ်းၼိုင်ႈ ဝႃႈၼႆ။

မၢႆးဢၢႆႈမူၼ်း လၢတ်ႈဝႃႈ “ ႁဝ်းၶႃႈ ၸုမ်းၵေႃလိၵ်ႈလၢႆးလႄႈ ၸုမ်းတူင်ႉၼိုင်တူင်ႇဝူင်းၵူၼ်း ႁွတ်ႈၽႅဝ်ၵႂႃႇတီႈႁူင်းႁေႃး ၼၼ်ႉသေ ယွၼ်ႉဝႃႈ မၼ်းပဵၼ်ႁူင်းႁဵၼ်းပရႁိတႁဝ်းၶႃႈ။ ဝၢႆးၼၼ်ႉ ၶူးသွၼ် 2 ၵေႃႉ ဢၼ်ၶဝ်ႁွင်ႉၵႂႃႇထဵတ်ႈထၢမ်ၼၼ်ႉ ၵေႃႈပွႆႇပၼ်တူဝ်ၶိုၼ်းမႃး။ သိုၵ်းမၢၼ်ႈၶဝ် လႆႈငိၼ်းၶၢဝ်ႇဝႃႈ တီႈႁိမ်းႁွမ်းၼႆႉ မီးၵၢၼ် လၵ်ႉသိူင်ႇသိမ်းၶိူင်ႈၵွင်ႈၵၢင်ႇလၢၵ်ႈ ၼၢၵ်ႈဝႆႉ။ ၵဵဝ်ႇလူၺ်ႈလွင်ႈသိုၵ်းမၢၼ်ႈ ၶဝ်ႈၵူတ်ႇထတ်းၼႆႉ တီႈတႄႉမၼ်း ၶဝ်လူဝ်ႇပွင်ႇၶၢဝ်ႇၸူး တီႈၽူႈမီးပုၼ်ႈၽွၼ်း တီႈႁူင်းႁဵၼ်း လွင်ႈဢၼ်ၶဝ်ႁဵတ်းၼႆႉ ပဵၼ်ဢၼ်ဝူၺ်ႇႁၢင်ႈလူင်ဝႆႉ” ဝႃႈၼႆ။

သိုပ်ႇလၢတ်ႈဝႃႈ “ သိုၵ်းၸုမ်းလႂ်ၵေႃႈယဝ်ႉ သင်ဝႃႈ ဢမ်ႇမီးၸဝ်ႈၶွင်ယူႇၼႆၸိုင် တေဢမ်ႇမီးသုၼ်ႇၶႂၢင်ႉၶဝ်ႈသွၵ်ႈတဝ်။ သင်ဝႃႈ ၶဝ်လႆႈၶၢဝ်ႇ ထၢင်ႇထိူမ်သေဢၼ်ဢၼ်ၸိုင် ၶဝ်လူဝ်ႇလႆႈယွၼ်းၶႂၢင်ႉတီႈၽူႈမီးပုၼ်ႈၽွၼ်းတီႈၼၼ်ႈ။ ယဝ်ႉၵေႃႈ မိူဝ်ႈၽွင်းၵူတ်ႇထတ်းၼၼ်ႉ ၽူႈမီးပုၼ်ႈၽွၼ်းတီႈၼႆႈ တေလႆႈၵႂႃႇတူၺ်းၸွမ်း” ဝႃႈၼႆ။

လုၵ်ႈႁဵၼ်း ဢၼ်ယူႇတီႈႁူင်းႁဵၼ်းပရႁိတ TEC ၼႆႉ တေႃႈလဵဝ် လႆႈၶၢႆႉၵႂႃႇယူႇဝႆႉ တီႈႁူင်းႁေႃး ရတၼႃႇထုၼ်း ပွၵ်ႉ 2 ၸႄႈဝဵင်းၵူတ်ႉၶၢႆ ဝႃႈၼႆ။

ပၢင်တိုၵ်းဢၼ်ပဵၼ်ယူႇၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇၼႆႉ ၸုမ်းဢူၺ်းလီပွတ်းႁွင်ႇ 3 ၸုမ်းလႄႈ တပ်ႉသိုၵ်း လူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းမိူင်းၵူတ်ႉၶၢႆ 2,000 ပၢႆ လႆႈဢွၼ်ၵၼ်ပၢႆႈၽေးသိုၵ်း ဝႃႈၼႆ။