တပ်ႉသိုၵ်းလူင်ပွင်ၸိုင်ႈ ဢၼ်ပၵ်းတပ်ႉတၢင်းမိူင်းၵႅတ်ႈ ၸေႈဝဵင်းလႃႈသဵဝ်ႈ ဢမ်ႇပၼ်လူတ်ႉၵႃးတၢင်ႇၶဝ်ႈသၢၼ် လတ်းၶၢမ်ႈၶူင်းၶိုၼ်ႈၸူး ၵုၼ်လူင်ႁူဝ်ပၢင်ႇ ၵူၼ်းၵႃႉ ယၢပ်ႇၽိုတ်ႇ။

ၸၢႆးသၢမ်ၵူၼ်းမိူင်းၵႅတ်ႈလၢတ်ႈၽူႈတွႆႇႁွၵ်ႈဝႃႈ – “ၶဝ်ဢမ်ႇပၼ်တၢင်ႇၶဝ်ႈသၢၼ်ၶိုၼ်ႈလႆႈမွၵ်ႈ 3-4 ဝၼ်းယဝ်ႉၶႃႈ။ ၵူၼ်းၵႃႉၵေႃႈယၢပ်ႇၽိုတ်ႇၶႃႈဢေႃႈ။ ပေႃးၶႆႈတၢင်ႇၶိုၼ်ႈတေလႆႈဢဝ်ဝႂ် ၵမ်ႉတီႈၽူႈၵွၼ်းဝၢၼ်ႈဢိူင်ႇလႄႈ တီႈၽူႈၵွၼ်းတပ်ႉ။ ပေႃးၵႂႃႇဢဝ်ဝႂ်သမ်ႉ ၶဝ်ဢမ်ႇႁဵတ်းပၼ်ငၢႆႈငၢႆႈတေဢမ်ႇလႆႈဢဝ်ၵႂႃႇ မွၵ်ႈၼၼ်ႉမွၵ်ႈၼႆႉၼႆသေ ႁၢမ်ႈတၢပ်ႈလႄႈ ယၢမ်းလဵဝ်လူတ်ႉၶဝ်ႈသၢၼ်မႃးၶမ်ဝႆႉတီႈမိူင်းၵႅတ်ႈၼႆႉၼမ်ႉတႄႉတႄႉၶႃႈ။  တင်းၵူၼ်းၵႃႉ တင်းၸဝ်ႈၼႃး ယၢပ်ႇၽိုတ်ႇၵိၼ်းၸႂ်ၶႃႈဢေႃႈ။” – ဝႃႈၼႆ။

လိူဝ်သေႁၢမ်ႈၵူၼ်းၵႃႉတၢင်ႇၶဝ်ႈသၢၼ်ယဝ်ႉ ယၢမ်းလဵဝ် တီႈႁိူၼ်းယေးၵူၼ်းဝၢႈၼ်ၵေႃႈ  ၾၢႆႇသိုၵ်းပူင်ဝႆႉဝႃႈ တေဢမ်ႇလႆႈၵဵပ်းၶဝ်ႈသၢၼ်ဝႆႉၼမ် ။ တေလႆႈဝႆႉပဵင်းၼင်ႇ ၵူၼ်းႁိူၼ်းၵိၼ်လႆႈၵူၺ်း ၼႆလႄႈ ပႃးၸဵမ်ၵူၼ်းမိူင်းၵေႃႈ ႁူပ်ႉတၢင်းယၢပ်ႇၽိုတ်ႇဝႃႈၼႆ။

မိူင်းၵႅတ်ႈၼႆႉမီးၸဵင်ႇႁွင်ႇဝၼ်းဢွၵ်ႇဝဵင်းလႃႈသဵဝ်ႈမွၵ်ႈ 50 လၵ်း။ မီးၸပ်းၾင်ႇၾၢႆႇတူၵ်းၶူင်း။

လုင်းၸၢႆး လၢတ်ႈဝႃႈ “တပ်ႉသိုပ်းလၢတ်ႈဝႃႈ ၵူဝ်ဢဝ်ၵႂႃႇသူင်ႇပၼ်ၵူၼ်းထိူၼ်ႇၼႆဝႃႇ။ တၢင်းႁဝ်းၶႃႈၼႆႉ ငဝ်းလၢႆးၵေႃႈဢမ်ႇသုၵ်ႉသၵ်ႉမိူၼ်တၢင်ႇတီႈ ။ ၶဝ်မႃးပိၵ်ႉၵူၼ်းမိူင်းၸိူင်ႉၼႆ ႁႃၵိၼ်လဵင်ႉတွင်ႉယၢပ်ႇၽိုတ်ႇယဝ်ႉၼႃႇ ။ ၼႂ်းဝၼ်းသွင်ဝၼ်းၼႆႉၵႃႈၶဝ်ႈၵေႃႈၶိုၼ်ႈ ။ ထူင် 4 မိုၼ်ႇပၢႆယဝ်ႉလူး။ပဵၼ်သင်ၵေႃႈၵူၼ်းမိူင်းႁဝ်းၵူၺ်းယၢပ်ႇယူႇတိၵ်းတိၵ်း” – ဝႃႈၼႆ။

ၵူၼ်းၵႃႉၶဝ်ႈသၢၼ်ၼႆႉ  ၵမ်ႈၼမ်ပဵၼ်ပီႈၼွင်ႉမိူင်းၵႅတ်ႈ။ ၵႂႃႇဢဝ်ၶဝ်ႈသၢၼ်တၢင်းလႃႈသဵဝ်ႈ ၶိုၼ်ႈမႃး။ ပူၼ်ႉၵႂႃႇၶၢႆပွတ်းၵုၼ်လူင် ႁူဝ်ပၢင်ႇ ၵူႈဝူင်ႈ။

တီႈမိူင်းၵႅတ်ႈၼႆႉ မီးသိုၵ်းလူင်ပွင်ၸိုင်ႈမၢၼ်ႈ၊ ပလိၵ်ႈမၢၼ်ႈလႄႈ သိုၵ်းပျီႇတူႉၸိတ်ႉမၢၼ်ႈပၢင်ႇ တူင်ႉၼိုင်ယူႇသဝ်း။ တပ်ႉမ 99 ၼႆႉမႃးပၵ်းတီႈမိူင်းၵႅတ်ႈ မိူဝ်ႈၽွင်းပီ 2014 ပုၼ်ႉဝႃႈၼႆ။