ရူတ်ႉၵႃး ၵရုၼႃႇ ၸွႆႈထႅမ်ၵူၼ်းမၢတ်ႇၸဵပ်းၼႂ်းပၢင်တိုၵ်း ပၵ်းတုင်းၶဝ် ဢၢင်ႈၵႂႃႇၸွႆႈၵူၼ်းမၢတ်ႇၸဵပ်းမၢၵ်ႇၵွင်ႈၼႂ်းၸေႈဝဵင်းၵူတ်ႉၶၢႆ ၺႃးၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ယိုဝ်းၵွင်ႈလွၵ်ႇ ဢမ်ႇပၼ်ၶဝ်ႈႁပ်ႉၵူၼ်းပဵၼ် ။
ဝၼ်းတီႈ 20/8/2019 ဝၼ်းမိူဝ်ႈၼႆႉ ယၢမ်းၵၢင်ၼႂ် တပ်ႉသိုပ်းလူင်ပွင်ၸိုင်ႈလႄႈ ၸုမ်းဢူၺ်းလီပွတ်းႁွင်ႇ ပိုတ်းယိုဝ်းၵၼ်ၼႂ်ႈၵႄႈ ၵူတ်ႉၶၢႆလႄႈ ၼမ်ႉၽၵ်းၵႃ ။ ၵူၼ်းဝၢၼ်ႈၽႃၽိုင်ႈ ၊ ၵုင်းၸူင် တိူဝ်ႉမၢတ်ႇမၢၵ်ႇၵွင်ႈ 2 ၵေႃႉ။ ၽွင်းလူတ်ႉၵႃးၸွႆႈထႅမ် ၸုမ်းၵရုၼႃႇ မူႇၸေႈ ၶိုၼ်ႈၵႂႃႇတႃႇႁပ်ႉၵူၼ်းမၢတ်ႇမၢၵ်ႇၵွင်ႈၼၼ်ႉ ၺႃးယိုဝ်းလွၵ်ႇ တီႈဝၢၼ်ႈၶူဝ်မုင်း လႄႈ ရူတ်ႉဢမ်ႇၸၢင်ႈၶဝ်ႈၵႂႃႇ ႁပ်ႉၵူၼ်းပဵၼ်ၼႂ်းဝၢၼ်ႈဝႃႈၼႆ။
ဢူးတွင်းထုၼ်း ႁူဝ်ပဝ်ႈၸုမ်း ၵရုၼႃႇ ၸွႆႈထႅမ်ၵူၼ်းမၢတ်ႇၸဵပ်းလုတၢႆ မူႇၸေႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းဝၢၼ်ႈသိုပ်ႇၾူၼ်းမႃးၸူးႁဝ်းၶႃႈဝႃႈ ႁႂ်ႈမႃးၸွႆႈထႅမ်ၵူၼ်းမၢတ်ႇၸဵပ်းမၢၵ်ႇၵွင်ႈ။ ႁဝ်းၶႃႈၵေႃႈ ယင်းပၵ်းတုင်းၶၢဝ် တီႈရူတ်ႉႁဝ်းသေၶဝ်ႈမႃး။ ၵူၺ်းၵႃႈ ၺႃးယိုဝ်းတၢင်းၶဝ်ႈဝၢၼ်ႈၶူဝ်မုင်း ။ ၶဝ်ယိုဝ်းၵွင်ႈလွၵ်ႇႁဝ်းၶႃႈ မွၵ်ႈ 20- 30 ၵမ်း။ ၵူၺ်းၵႃႈ ဢမ်ႇတိူဝ်ႉရူတ်ႉတိူဝ်ႉၵူၼ်း ၼင်ႇၵဝ်ႇ။ၶဝ်လွၵ်ႇႁဝ်းယႃႇႁႂ်ႈႁဝ်းၶႃႈၶဝ်ႈၵႂႃႇၼၼ်ႉၵူၺ်း။ ပဵၼ်ၸုမ်းလႂ်တႄႉဢမ်ႇႁူႉ”- ဝႃႈၼႆ။
ၵူၼ်းဝၢၼ်ႈဢၼ်မၢတ်ႇၸဵပ်းမၢၵ်ႇၵွင်ႈ 2 ၵေႃႉၼၼ်ႉ မၢတ်ႇတီႈၶႅၼ်၊ၶႃလႄႈမိုဝ်း ၸိူဝ်းၼႆႉ။ တေႃႇထိုင်ဝၢႆးဝၼ်း ဢမ်ႇမီးၽႂ်ႁတ်းၶဝ်ႈၵႂႃႇဢဝ်မႃးလႄႈ မၢၵ်ႇၵွင်ႈၵေႃႈ ယင်းတိုၵ်ႉၶမ်ဝႆႉယူႇ ပဵၼ်ဢၼ်လီမႆႈၸႂ်ဝႆႉၼႆဢူးတွင်းထုၼ်းလၢတ်ႈ။
ယွၼ်ႉပိူဝ်ႈၺႃးယိုဝ်းလွၵ်ႇလႄႈ ရူတ်ႉၵႃးတၢင်ႇၵူၼ်းပဵၼ် ၵရုၼႃႇၵေႃႈ လႆႈဝၢႆႇႁူဝ်ပွၵ်ႈမိူဝ်းမူႇၸေႈ ၶိုၼ်းဝႃႈၼႆ။
ပူၼ်ႉမႃးဝၼ်းတီႈ 17 /8/2019 ယၢမ်းၵၢင်ၼႂ်မွၵ်ႈ 9 မူင်းၼၼ်ႉၵေႃႈ ရူတ်ႉၵႃးၸုမ်းၵူၼ်းၼုမ်ႇလႃႈသဵဝ်ႈ ၶိုၼ်ႈၵႂႃႇတၢင်းဝၢၼ်ႈတူၼ်း တႃႇၸွႆႈထႅမ်ၵူၼ်းမၢတ်ႇၸဵပ်း/ ပၢႆႈၽေးၼၼ်ႉ ၺႃးၸုမ်းယိပ်းၵွင်ႈၵၢင်ႇ ယိုဝ်းသႂ်ႇတီႈပၢမ်ႉၼမ်ႉမၼ်းတဵင်ႇၽိဝ်ႇ။ လူတ်ႉၵႃးၸုမ်းၵူၼ်းၼုမ်ႇလႃႈသဵဝ်ႈပိၼ်ႈ ႁူဝ်ပဝ်ႈၸုမ်းၵူၼ်း ၼုမ်ႇလႃႈသဵဝ်ႈ တၢႆထင်တီႈ။လုၵ်ႈၸုမ်း မၢတ်ႇၸဵပ်း 3 ၵေႃႉ။
