ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ တေလူင်းလဵပ်ႈယၢမ်း ၸွမ်းသၢပ်ႇၸႄႈဝဵင်းမိူင်းပၼ်ႇ တွၼ်ႈတႃႇလွင်ႈႁူမ်ႇလူမ်ႈ သင်ၵူၼ်းမိူင်းထူပ်းၺႃး ယႃႇပေတူၵ်းၸႂ်ၵူဝ်ႁႄသေလႅၼ်ႈပၢႆႈ ဝႃႈၼႆ။

ဝၼ်းတီႈ 16/8/2019 ယၢမ်းၵၢင်ၼႂ် 9 မူင်း ႁွင်ႈၵၢၼ်ၾၢႆႇဢုပ်ႉပိူင်ႇၸႄႈဝဵင်းမိူင်းပၼ်ႇ ႁွင်ႉၽူႈယႂ်ႇၵူၼ်းလူင် ၼႂ်းပွၵ်ႉ/ ဢိူင်ႇ၊ ပႃႇတီႇၵၢၼ်မိူင်းလႄႈ ၵူၼ်းမိူင်းၵမ်ႈၽွင်ႈ ႁဵတ်းပၢင်ၵုမ် တီႈလုမ်းၾၢႆႇဢုပ်ႉပိူင်ႇ ၵူႈလွင်ႈလွင်ႈတီႈၸႄႈဝဵင်းမိူင်း ပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ဢုပ်ႇဢူဝ်းၸႅင်ႈၼႄ လွင်ႈၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ပွင်ႇလႅင်းလူင်းမႃး လွင်ႈတေလဵပ်ႈယၢမ်း ဢဝ်ႁူမ်ႇလူမ်ႈၸွမ်းသၢပ်ႇဝဵင်းမိူင်းပၼ်ႇ ဝႃႈၼႆ။

ၸၢႆးၼွင်ႉ ၽူႈတႅၼ်းသၽႃး ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၸၵၶ 17 လၢတ်ႈမႃးတီႈၽူႈၵွၼ်း ၸႄႈဝဵင်းမိူင်းပၼ်ႇ လွင်ႈတပ်ႉသိုၵ်းမၢၼ်ႈ တေၶဵင်ႈၶႅင်လွင်ႈႁူမ်ႇလူမ်ႈ ၸွမ်းၸႄႈဝဵင်းမိူင်းပၼ်ႇ။ သင်ၸိူဝ်ႉဝႃႈ ႁူပ်ႉမႅၼ်ႈ ၺႃးၵူၼ်းမိူင်း ဢမ်ႇၼၼ် ၸႂ်ႉၵိုတ်းၼႆၸိုင် ယႃႇပေတူၵ်းၸႂ်သေလႅၼ်ႈပၢႆႈ။ ၾၢႆႇၶႃႈတႄႉ လႆႈဢုပ်ႇလၢတ်ႈဝႆႉဝႃႈ သင်ၸိူဝ်ႉ ဝႃႈ ၾၢႆႇၸုမ်းၵူတ်ႇထတ်းၶဝ် ထၢင်ႇထိူမ်သေ တီႉၵူၼ်းမိူင်းၼၼ်ႉ ယႃႇပေၵိုင်ႉၵၢင်ႉပၼ်တၢမ်ႇ၊ မိူဝ်ႈထဵတ်ႈထၢမ်ၵေႃႈ ယႃႇ ပေလူင်း မႆႉလူင်းမိုဝ်းသေထၢမ် ႁႂ်ႈထၢမ်တူၺ်းလီလီၵွၼ်ႇ ၸႂ်ႈၵူၼ်းဝၢၼ်ႈတႄႉႁႃႉ ဢမ်ႇတႄႉႁႃႉ ၼႆၼၼ်ႉ။ လူဝ်ႇလႆႈဢဝ် ၶေႃႈတႅပ်း တတ်းတီႈပူႇၵႄႇ ၽူႈၵွၼ်းပွၵ်ႉဢိူင်ႇဝၢၼ်ႈႁဝ်း တႅပ်းတတ်းပၼ်” ဝႃႈၼႆ။

ၵဵဝ်ႇလူၺ်ႈလွင်ႈ ႁူမ်ႇလူမ်ႈၼႆႉသေ မီးၶၢဝ်ႇလိုဝ်းဝႃႈ သိုၵ်းလူင်ပွင်ၸိုင်ႈမၢၼ်ႈ ႁၢမ်ႈၼုင်ႈသိူဝ်ႈၶူဝ်း မၢၵ်ႇႁူၺ်လၢႆးၼႆၼၼ်ႉ တႄႉ ၸၢႆးၼွင်ႉဝႃႈ တီႈၼႂ်းပၢင်ၵုမ်ၼၼ်ႉ ဢမ်ႇလႆႈဢုပ်ႇပႃး ဢမ်ႇလႆႈမီးလွင်ႈၸီႉသင်ႇႁၢမ်ႈတၢပ်ႈသင်လူင်းမႃး ဝႃႈၼႆ။

ၸၢႆးၼွင်ႉ သိုပ်ႇလၢတ်ႈဝႃႈ “ ၵဵဝ်ႇလူၺ်ႈလွင်ႈၼုင်ႈဝႆ သိူဝ်ႈၶူဝ်းလၢႆးၼၼ်ႉ ယူႇတီႈၶႃႈႁဝ်း လႆႈဢုပ်ႇၶဝ်ၵမ်းသိုဝ်ႈဝႃႈ ၵူၼ်း မိူင်း ပၼ်ႇႁဝ်းၶႃႈၼႆႉ သူင်ၼုင်ႈၶူဝ်းလၢႆး၊ ၵွပ်ႈပိူဝ်ႈသင်လႄႈၶူဝ်းလၢႆးၼႆ သီမၼ်းၶၢမ်ႇၶႆး၊ ဢမ်ႇႁၼ်ၶႆးငၢႆႈ။ မိူဝ်ႈၽွင်း ၸဝ်ႈ ၼႃႈတီႈ ပၼ်ႇလဵပ်ႈယၢမ်းၼၼ်ႉ ပေႃးႁၼ်ၵူၼ်းၼုင်ႈၶူဝ်းလၢႆးၵေႃႈ ယႃႇပေၵိုင်ႉၵၢင်ႉတႅပ်းတတ်းဝႃႈ ပဵၼ်သိုၵ်းတႆး ႁႂ်ႈမႃး ထၢမ်ပူႇၵၢင်ႉပူႇၵႄႇၵွၼ်ႇ ႁဝ်းၶႃႈလႆႈ တုၵ်း ယွၼ်း ဢုပ်ႇၶဝ်ဝႆႉၸိူင်ႉၼၼ်” ဝႃႈၼႆ။

ၵဵဝ်ႇၵပ်းလွင်ႈၼႆႉသေ ယူႇတီႈၽူႈယႂ်ႇၵူၼ်းလူင်ပွၵ်ႉ/ ဢိူင်ႇတႄႉ ပၼ်ၾၢင်ႉၵူၼ်းမိူင်းဝႃႈ ယႃႇပေၼုင်ႈၶူဝ်းလၢႆး၊ ပေႃးၵႂႃႇ ပႂ်ႉသူၼ်ပႂ်ႉႁႆႈ ႁႂ်ႈပွင်ႇၶၢဝ်ႇပၼ် ဝႃႈၼႆ။ လွင်ႈၼႆႉ ႁဵတ်းႁႂ်ႈၵူၼ်းမိူင်းမႆႈၸႂ်ဝႃႈ ၵႂႃႇႁဵတ်းႁႆႈသူၼ်ၵူၺ်းၵေႃႈ ထိုင်တီႈ တေလႆႈ ပွင်ႇၶၢဝ်ႇၼႆႉ တႃႇႁူမ်ႇလူမ်ႈၵူၼ်းမိူင်း ဢမ်ႇမီးယဝ်ႉႁိုဝ် ၸဵမ်ၸိူဝ်းၼႆႉ။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ လုမ်းၵပ်းသၢၼ် RCSS ဝဵင်းတူၼ်ႈတီး ပၼ်ၾၢင်ႉၽူႈတွႆႇႁွၵ်ႈဝႃႈ “လွင်ႈၼႆႉ ၵူၼ်းမိူင်း ယူႇယၢပ်ႇ ၵိၼ်ယၢပ်ႇ လွင်ႈၵႂႃႇမႃးပႆ။ တၢင်းပွတ်းၼႆႉ မၼ်းဢမ်ႇမီးၽေးသိုၵ်းသင်၊ ဢၼ်မီးသိုၵ်းယူႇဝႆႉၵေႃႈ မီးၸုမ်းႁဝ်း လႄႈ သိုၵ်းမၢၼ်ႈၵူၺ်း။ ဢၼ်ပဵၼ်ပၼ်ႁႃတၢင်းပွတ်းႁွင်ႇၸိူဝ်းၼၼ်ႉ မၼ်းဢမ်ႇၵပ်းၵၢႆႇသင်တၢင်းၼႆႉ။ ၼႆႉတႄႉ မၼ်း ပဵၼ်ၾၢႆႇသိုၵ်းမၢၼ်ႈၶဝ် ႁၢင်ႈႁႅၼ်းပူၼ်ႉၼႃႇဢႃးလႃး”ဝႃႈၼႆ။

ဝၢႆးသေ ပၢင်ၵုမ်ဢုပ်ႇဢူဝ်းၵၼ် လႆႈမႃး 2-3 ဝၼ်းယဝ်ႉၼၼ်ႉ ယူႇတီႈပလိၵ်ႈတင်း သိုၵ်းလူင်ပွင်ၸိုင်ႈမၢၼ်ႈ ႁူမ်ႈၵၼ် တင်ႈလၢၼ်ႇ ၵူတ်ႇထတ်းၵူၼ်းမိူင်းၵႂႃႇမႃး တၢင်းၶဝ်ႈဢွၵ်ႇ ၼိူဝ်သဵၼ်ႈတၢင်း မိူင်းပၼ်ႇ – လၢင်းၶိူဝ်း ဝႃႈၼႆ။

ပေႃႈၾႃႉမႄႈမိူင်း မိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈပူၼ်ႉမႃး 2-3 ဝၼ်း ယၢမ်းၵၢင်ၶိုၼ်းၼၼ်ႉ ပလိၵ်ႈတင်း သိုၵ်း မၢၼ်ႈႁူမ်ႈၵၼ် တင်ႈလၢၼ်ႇၵူတ်ႇထတ်း တၢင်းၶဝ်ႈဝဵင်းမိူင်းပၼ်ႇ – လၢင်းၶိူဝ်း။ လွင်ႈသွၵ်ႈတဝ်ထိူၼ်ႇတႄႉ ဢမ်ႇပႆႇလႆႈ ငိၼ်းၶၢဝ်ႇငၢဝ်းသင်” ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ “ ၽွင်းယၢမ်းၼႆႉ မၼ်း ပဵၼ်ၶၢဝ်းၵေႃႇသၢင်ႈလွင်ႈငမ်းယဵၼ်လႄႈ လၢႆၾၢႆႇဢုပ်ႇဢူဝ်းၵၼ် ၶိုင်သၢင်ႈလွင်ႈငမ်းယဵၼ်ယူႇၼၼ်ႉ လွင်ႈၸိူဝ်းၼႆႉ ပေႃးပဵၼ်လႆႈတႄႉ ၶႂ်ႈႁႂ်ႈၵူၼ်းမိူင်းၵႂႃႇမႃးထၢင်ႇႁၢင်ႈလွတ်ႈလႅဝ်း” ဝႃႈၼႆ။

ၵဵဝ်ႇလူၺ်ႈလွင်ႈပၢင်ၵုမ်ၼႆႉသေ ယူႇတီႈၾၢႆႇသိုၵ်းလူင်ပွင်ၸိုင်ႈမၢၼ်ႈ တေမီးလွင်ႈလဵပ်ႈယၢမ်း ၵူတ်ႇထတ်း တႃႇႁႂ်ႈမီးလွင်ႈ ႁူမ်ႇလူမ်ႈလႄႈ တွၼ်ႈတႃႇ ၵူၼ်းမိူင်း ပေႃးတေလႆႈၾၢင်ႉၵၼ်ၼၼ်ႉ ၸင်ႇလႆႈႁွင်ႉႁဵတ်းပၢင်ၵုမ်သေ သပ်းလႅင်းၼႄၵႂႃႇ ဝႃႈၼႆ။