ၼႂ်းၸိုင်ႈတႆးပွတ်းႁွင်ႇ ပဵၼ်ပၢင်တိုၵ်းၵၼ်ၶိူဝ်းယႂ်းသေ ၵူၼ်းမိူင်း 2,000 ပၢႆ လႆႈဢွၼ်ၵၼ်ပၢႆႈၽေးသိုၵ်းဝႆႉ ဝႃႈၼႆ။
တႄႇဢဝ်ဝၼ်းတီႈ 15/8/2019 ၼႆႉမႃး ၸုမ်းဢူၺ်းလီပွတ်းႁွင်ႇ 3 ၸုမ်း တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင် တိုၵ်းၶိူဝ်းယႂ်း ၼႂ်းၸိုင်ႈတႆးပွတ်းႁွင်ႇ ၵူၼ်းမိူင်း 1,000 ပၢႆ လႆႈဢွၼ်ၵၼ်ပၢႆယၢၼ်ႁိူၼ်းယေး။ လိူဝ်ၼၼ်ႉ ဢၼ်ၵိုတ်းၶမ် ၼႂ်းၵႄႈပၢင်တိုၵ်းၵေႃႈ တိုၵ်ႉမီးထႅင်ႈတင်းၼမ် ဝႃႈၼႆ။
ၵဵဝ်ႇလူၺ်ႈလွင်ႈပၢင်တိုၵ်းၼႆႉသေ ၵူၼ်းမိူင်းပၢႆႈၽေးသိုၵ်း ၼႂ်းၸႄႈဝဵင်းလႃႈသဵဝ်ႈမီးတီႈဝတ်ႉမိူင်းတဵမ် 800 ပၢႆ၊ ဝတ်ႉ မၢၼ်ႈသူႈ ၸမ် 1000 ၵေႃႉ။ ဝတ်ႉမၢၵ်ႇၶီႈၼူ 400 ပၢႆလႄႈ ဝတ်ႉတႃႈယၢဝ် 700 ပၢႆ။ လိူဝ်ၼၼ်ႉ တီႈဝတ်ႉမႁႃႇသီႇ ၸႄႈဝဵင်း ၵူတ်ႉၶၢႆသမ်ႉ 230 ပၢႆလႄႈ တီႈႁူင်းႁေႃး ၼမ်ႉၸ လၢပ်ႈ ၸႄႈဝဵင်းသႅၼ်ဝီသမ်ႉ 300 ပၢႆ ဝႃႈၼႆ။
မၢႆးမၢႆႇ ၸုမ်းၵူၼ်းၼုမ်ႇၶၢင် ၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်း တီႈဝတ်ႉမႁႃႇသီႇ ၵူတ်ႉၶၢႆတႄႉ တင်း မူတ်းလႆႈသဵၼ်ႈမၢႆဝႆႉ 230 ၵေႃႉ။ ဢၼ်ပွၵ်ႈၶိုၼ်းႁိူၼ်းယေးၵေႃႈမီးၵမ်ႈၽွင်ႈယူႇ။ ဢၼ်ပၢႆႈမႃးယူႇၸွမ်းႁိူၼ်းပီႈၼွင်ႉၶဝ် ၸိူဝ်းၼႆႉၵေႃႈမီး။ ၵူၺ်းၵႃႈ သဵၼ်ႈမၢႆမၼ်းဢမ်ႇလႆႈႁူႉတႅတ်ႈတေႃး။ တေႃႈလဵဝ် ၵူၼ်းပၢႆႈၽေးသိုၵ်း ႁွတ်ႈၽႅဝ်မႃးထႅင်ႈ ၼပ်ႉႁူဝ်ပၢၵ်ႇ” ဝႃႈၼႆ။
ၼွၵ်ႈလိူဝ်ၼၼ်ႉ တၢင်းပွတ်းမူႇၸေႊၵေႃႈ တိုၵ်ႉပဵၼ်ပၢင်တိုၵ်းၵၼ်ယူႇလႄႈ လွင်ႈၶဵင်ႈၶႅင် ၵၢၼ်သိုၵ်းၵၼ်ၵေႃႈ တိုၵ်ႉမီး ယူႇ။ ၵူၼ်းမိူင်းဢၼ် ဢမ်ႇၸၢင်ႈပၢႆႈဢွၵ်ႇမႃး တိုၵ်ႉၶမ်ဝႆႉၼႂ်းၵႄႈ ၵူတ်ႉၶၢႆ လႄႈ သႅၼ်ဝီ ၸိူဝ်းၼႆႉၵေႃႈတိုၵ်ႉမီးထႅင်ႈတင်း ၼမ်။
မၢႆးမၢႆႇ သိုပ်ႇလၢတ်ႈဝႃႈ “ တွၼ်ႈတႃႇၵူၼ်းပၢႆႈၽေးသိုၵ်းတီႈႁဝ်းၼႆႉ ဢၼ်လူဝ်ႇတီႈသုတ်းယၢမ်းလဵဝ် တႃႇလုမ်းလႃးလွင်ႈ ပၢႆးယူႇလီလႄႈ လွင်ႈၶဝ်ႈၼမ်ႉတၢင်းၵိၼ် တီႈယူႇတၼ်းသဝ်း ၸဵမ်ၸိူဝ်းၼႆႉယဝ်ႉ” ဝႃႈၼႆ။
ၸၢႆးႁၢၼ်ႇ ႁူဝ်ပဝ်ႈၸုမ်းၵူၼ်းၼုမ်ႇ TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ယၢမ်းၵၢင်ၶမ်ႈမွၵ်ႈ 8 မူင်း ၼၼ်ႉ မၢၵ်ႇလူင်တူၵ်းသႂ်ႇၼႂ်းဝၢၼ်ႈၵုင်းသႃႇသေ ၵူၼ်းဝၢၼ်ႈ လႆႈဢွၼ်ၵၼ်ပၢႆႈမႃးသွၼ်ႈဝႆႉတီႈဝတ်ႉမိူင်းတဵမ် တေႃႈလဵဝ် လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ်ၶႃႈဢေႃႈ။ ယၢမ်းလဵဝ် ၵူၼ်းပၢႆႈၽေးသိုၵ်း တီႈမိူင်းတဵမ်ၼႆႉ မီးႁူဝ်ၵူၼ်း 800 ပၢႆ” ဝႃႈၼႆ။
ၸၢႆးဢၢႆႈ ၵူၼ်းပၢႆႈၽေးသိုၵ်း တီႈလႃႈသဵဝ်ႈၵေႃႈလၢတ်ႈဝႃႈ ၼႂ်းထုင်ႉလႃႈသဵဝ်ႈၼႆႉ ၼႂ်းဝၼ်း 2 ဝၼ်းၼႆႉ ဢၼ်ပဵၼ်ပၢင် တိုၵ်း ယႂ်ႇလူင် 2 ၾၢႆႇပိုတ်းယိုဝ်းၵၼ်တႄႉ ဢမ်ႇမီး။ သဵင်ၵွင်ႈသဵင်မၢၵ်ႇဢၼ်လႆႈငိၼ်းယူႇၼႆႉ ပဵၼ်ဢၼ်ယိုဝ်းၾၢႆႇလဵဝ်။ ၵူၺ်းၵႃႈ ပေႃးဢမ်ႇပၢႆႈၵေႃႈသမ်ႉၵူဝ်မၢၵ်ႇလူင်တူၵ်းသႂ်ႇၼႂ်းဝၢၼ်ႈလႄႈ ၸင်ႇလႆႈဢွၼ်ၵၼ်ပၢႆႈ ဝႃႈၼႆ။
ၸၢႆးလၢဝ် ၵူၼ်းၼုမ်ႇ လႃႈသဵဝ်ႈ လၢတ်ႈဝႃႈ “ တေႃႇထိုင်ဝၢႆးဝၼ်း 4 မူင်း မိူဝ်ႈၼႆႉ 19/8/2019 တႄႉ ၵူၼ်းပၢႆႈၽေးသိုၵ်း တီႈဝတ်ႉမၢၼ်ႈသူႈ မီး 1,000 ပၢႆ။ တီႈၼႆႈၵေႃႈ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ်ၶႃႈယဝ်ႉ” ဝႃႈၼႆ။
ၸုမ်းဢူၺ်းလီပွတ်းႁွင်ႇ ဢၼ်ပဵၼ် သိုၵ်းတဢၢင်း TNLA၊ သိုၵ်းၵဝ်ႈၵၢင်ႉ(MNDAA)၊ သိုၵ်းရၶႅင်ႇ (AA) လႄႈ တင်းသိုၵ်း လူင်ပွင်ၸိုင်ႈမၢၼ်ႈၼႆႉ လႆႈပဵၼ်ပၢင်တိုၵ်းၵၼ်မႃး ၶိူဝ်းယႂ်းသေ တေႃႇထိုင်တေႃႈလဵဝ် ယင်းတိုၵ်ႉၶဵင်ႈၶႅင် ၵၢၼ်သိုၵ်းတေႃႇ ၵၼ်ယူႇလႄႈ ၵူၼ်းပၢႆႈၽေးသိုၵ်းၵေႃႈလႅပ်ႈတေတိူဝ်းၼမ်မႃးထႅင်ႈယူႇ ဝႃႈၼႆ။
