ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃ ႁူဝ်ၵူၼ်း 500 ပၢႆၼၼ်ႉ တႃႇႁူဝ်ၵူၼ်း 142 ၵေႃႉ ၶိုၼ်း ဢွၼ်ပွၵ်ႈၶိုၼ်းမိူဝ်းႁိူၼ်းယေးၽႂ်မၼ်းယဝ်ႉ။
ဝၼ်းတီႈ 30/01/2019 ယၢမ်းၵၢင်ဝၼ်း မွၵ်ႈ11:30 မူင်းၼၼ်ႉ ၵူၼ်းဝၢၼ်ႈတူၼ်ႈၵႅင်း၊ တႃႈလူင်၊ ႁူဝ်ၼႃး၊ ၸိူဝ်းပၢႆႈ ၽေးသိုၵ်း မႃးသွၼ်ႈဝႆႉတီႈဝတ်ႉၼႃးမၢၵ်ႇၶေႃ ၸႄႈဝဵင်းသီႇပေႃႉ ၼႂ်းၼၼ်ႉၵူၼ်း 142 ၵေႃႉ ၶိုၼ်းဢွၼ်ၵၼ်ပွၵ်ႈႁိူၼ်း ယေးယဝ်ႉ ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈၼႃးမၢၵ်ႇၶေႃၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈမႃးယူႇတီႈဝတ်ႉၼႆႉ ၶႂ်ႈမီးႁိမ်းလိူၼ်ယဝ်ႉ မႃးတင်ႈတႄႇႁူဝ်လိူၼ်ၼႆႉၶႃႈယဝ်ႉ။ ပၢင်တိုၵ်းၵေႃႈ ၵမ်ႉတိုၵ်း၊ ၵမ်ႉယဵၼ်၊ ၵမ်ႉၶဵင်ႈၶႅင်ၵၼ်။ ၶူဝ်း ၼႂ်းႁႆႈၼႂ်းသူၼ်တႄႉ ပွႆႇပႅတ်ႈႁဵတ်းၼၼ်သေမႃး။ ၶူဝ်းႁိူၼ်းယေးၵေႃႈ ပွႆႇပႅတ်ႈႁဵတ်းၼၼ်သေမႃး မႆႈၸႂ်ၶႃႈဢေႃႈ” ဝႃႈၼႆ။
ၵူၼ်းပၢႆႈၽေးသိုၵ်း ယၢမ်းလဵဝ်ၵိုတ်းဝႆႉတီႈၼႃးမၢၵ်ႇၶေႃ မီးၵူၼ်း 439 ၵေႃႉ ပဵၼ်ၵူၼ်းဝၢၼ်ႈၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈႁူမ်ႈ၊ တႃႈလူင်လႄႈ ဝၢၼ်ႈၵဵတ်းၽူၼ် ၸိူဝ်းၼႆႉ။
ဢိူင်ႇမေႃႇၵိူဝ် ဝၢၼ်ႈတူၼ်ႈၵႃႈသမ်ႉ မီးၵူၼ်းဝၢၼ်ႈၶၢႆးႁဵဝ်းယူႇဝႆႉ 19 ၵေႃႉ။ ပွၵ်ႉၸၢင်ႈၶမ်း ၵျွင်းၶရိတ်ႊယၼ်ႇလီသူး သမ်ႉ ပဵၼ်ၵူၼ်းဝၢၼ်ႈလွႆမွၵ်ႇ တင်း သၢႆးၶၢဝ် ယူႇဝႆႉ 98 ၵေႃႉ၊ တီႈဝတ်ႉၼွင်ဢၢင်ႈသမ်ႉ ၵူၼ်းဝၢၼ်ႈလူင်ဝၢႆ ပၢႆႈယူႇဝႆႉ 137 ၵေႃႉ ႁူမ်ႈတင်းမူတ်း 693 ၵေႃႉ။