သိုၵ်း RCSS တင်း ၸုမ်းဢူၺ်းလီပွတ်းႁွင်ႇၶဵင်ႈၶႅင်ၵၢၼ်သိုၵ်းတေႃႇၵၼ် မၢင်ပိုၼ်ႉတီႈ ငဝ်းလၢႆးယဵၼ်ဝႆႉလႄႈ ၸိူဝ်း ပၢႆႈၽေးသိုၵ်းၵမ်ႈၽွင်ႈ ပွၵ်ႈႁိူၼ်းၶိုၼ်း၊ မၢင်ဝၢၼ်ႈသမ်ႉ တိုၵ်ႉပၢႆႈၶဝ်ႈဝဵင်းသီႇပေႃႉမႃးထႅင်ႈၵေႃႈမီး ဝႃႈၼႆ။
ဝၼ်းတီႈ 11/03/2019 ယၢမ်းႁူဝ်ၶမ်ႈ မွၵ်ႈ 7 မူင်း ၵူၼ်းဝၢၼ်ႈတူၼ်ႈၵႅင်း၊ ဝၢၼ်ႈတႃႈလူင်၊ ဝၢၼ်ႈႁူဝ်ၼႃးလႄႈ မၢၼ်ႈ ႁူမ်ႈ ဢၼ်ပၢႆႈမႃးသွၼ်ႈဝႆႉတီႈဝတ်ႉဝိႁၢရ် ၼႃးမၢၵ်ႇၶေႃ ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၼႂ်းၸိုင်ႈတႆး ၶိုၼ်းဢွၼ်ၵၼ်ပွၵ်ႈႁိူၼ်းယေးၽႂ်မၼ်းၵႂႃႇ 83 ၵေႃႉ။ ၵူၺ်းၵႃႈ ၵူၼ်းဝၢၼ်ႈတၢင်းပၢင်လူင် တႃႈတေႈသမ်ႉ ၸိူဝ်းပၢႆႈၶဝ်ႈဝဵင်းသီႇပေႃႉမႃးထႅင်ႈၵေႃႈမီး ဝႃႈၼႆ။
မိူဝ်ႈဝၼ်းတီႈ 11 ယၢမ်းၵၢင်ၶမ်ႈ 7 မူင်းၶိုင်ႈၼၼ်ႉ ၵူၼ်းဝၢၼ်ႈတႃႈတေႈ ဢိူင်ႇတႃႈတေႈ ႁူဝ်ၵူၼ်း 48 ၵေႃႉ ဢွၼ်ၵၼ်ပၢႆႈမႃးသွၼ်ႈတီႈဝတ်ႉၽူဝ်းတေႃႇ ပွၵ်ႉၸၢင်ႈၶမ်းၸၢၼ်း ၸႄႈဝဵင်းသီႇပေႃႉထႅင်ႈ။
ၶွမ်ႊမတီႊၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝၼ်း သွင်ဝၼ်းၼႆႉမႃး ၵူၼ်း ပၢႆႈၽေးသိုၵ်း ၶိုၼ်းဢွၼ်ၵၼ်ပွၵ်ႈမိူဝ်းၶိုၼ်းႁိူၼ်းၽႂ်မၼ်းၵမ်ႈၽွင်ႈ။ ၵူၺ်းၵႃႈ ၵူၼ်းပၢႆႈၽေးသိုၵ်းတႄႉ မိူဝ်းမိူဝ်း မႃး မႃး ႁဵတ်းၼၼ်ၶႃႈ။ ဢဝ်ငဝ်းလၢႆးၼႂ်းပိုၼ်ႉတီႈဝႃႈၶႃႈဢေႃႈ” ဝႃႈၼႆ။
တေႃႈလဵဝ် ၵူၼ်းဝၢၼ်ႈဢၼ်ပၢႆႈမႃးသွၼ်ႈဝႆႉတီႈၸႄႈဝဵင်းသီႇပေႃႉ တီႈဝတ်ႉၼမ်ႉသိမ်ႇ ႁူဝ်ၵူၼ်း 52 ၵေႃႉ ပဵၼ် ၵူၼ်းဝၢၼ်ႈ ပၢင်ႇလေႃႉ ဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး။ ဝတ်ႉမၢၼ်ႈလီႈ 1,354 ၵေႃႉ ပဵၼ်ၵူၼ်းဝၢၼ်ႈပႃႇၵၢင်း၊ လွႆ ငိုၼ်း။ ဝိႁၢရ်သွင်ႁဵင်ႁႃႈ ဝဵင်းၸၢၼ်း မီးႁူဝ်ၵူၼ်း 198 ၵေႃႉ ပဵၼ်ၵူၼ်းဝၢၼ်ႈမၢၼ်ႈလီႈ ၸႄႈဝဵင်းၼမ်ႉတူႈ။ တီႈႁူင်း ႁဵၼ်းၸၼ်ႉဢွၼ် တူင်ႈ ၸၢင်ႉ 234 ၵေႃႉ ပဵၼ်ၵူၼ်းဝၢၼ်ႈမၢၼ်ႈလီႈ ၸႄႈဝဵင်းၼမ်ႉတူႈ။ ဝတ်ႉၼႃးမၢၵ်ႇၶေႃ 93 ၵေႃႉ ပဵၼ်ၵူၼ်းဝၢၼ်ႈတူၼ်ႈ ၵႅင်း၊ တႃႈလူင်၊ ႁူဝ်ၼႃး။ ဝတ်ႉၵုင်းၸၢင်ႈလဵၵ်း 60 ၵေႃႉ ပဵၼ်ၵူၼ်းဝၢၼ်ႈမၢၼ်ႈလီႈ ၸႄႈဝဵင်း ၼမ်ႈတူႈ။ သိုင်ႇလုင်းလႃႉၽူၼ်း ဝၢၼ်ႈၼႃးလွႆ 59 ၵေႃႉ ၵူၼ်းဝၢၼ်ႈလွႆမွၵ်ႇလႄႈ ဝတ်ႉၽူဝ်းတေႃႇ ပွၵ်ႉၸၢင်ႈၶမ်း ၸၢၼ်း 48 ၵေႃႉ ပဵၼ်ၵူၼ်း ဝၢၼ်ႈတႃႈတေႈ ၸိူဝ်းၼႆႉ တင်းမူတ်း ႁူဝ်ၵူၼ်း 2,098 ၵေႃႉ ဝႃႈၼႆ။
