ပၢင်တိုၵ်း ဝူင်ႈၵၢင်ၸုမ်းဢူၺ်းလီပွတ်းႁွင်ႇ တင်းသိုၵ်းလူင်ပွင်ၸိုင်ႈမၢၼ်ႈ ထပ်းၵၼ်ႁၢဝ်ႇႁႅင်း လိူဝ်ႇၵဝ်ႇ မၢၵ်ႇလူင်တူၵ်းသႂ်ႇ ၼႂ်းဝၢၼ်ႈမႂ်ႇဢွင်ႇသႅတ်ႉၸႃႇ ပွၵ်ႉ 12 ၊ တူၵ်းသႂ်ႇၼႂ်းဝၢၼ်ႈၵုင်းသႃႇ ၵူၼ်းဝၢၼ်ႈတၢႆၵေႃႉၼိုင်ႈ။
ဝၼ်းတီႈ 18 /8/2019 ယၢမ်းၵၢင်ၶမ်ႈ 8 မူင်း မၢၵ်ႇလူင်တူၵ်းၼႂ်းဝၢၼ်ႈၵုင်းသႃႇ ဢိူင်ႇၵုင်းသႃႇ ၸဵင်ႇႁွင်ႇဝၼ်းဢွၵ်ႇဝဵင်းလႃႈသဵဝ်ႈ ယၢၼ်မွၵ်ႈ 15 လၵ်း၊ ၸၢၵ်ႇမၢၵ်ႇတိူဝ်ႉၺႃးလုင်းဢေး ဢႃယု 50 ပၢႆ(ၽူဝ်ပႃႈၵဵင်) ဝၢၼ်ႈၵုင်းသႃႇၼၼ်ႉ လုတၢႆထင်တီႈ။
ဢၢႆႈၸၢႆး ၵူၼ်းၵုင်းသႃႇလၢတ်ႈတီႈၽူႈတွႆႇႁွၵ်ႈဝႃႈ – ယၢမ်းႁူဝ်ၵၢင်ၶမ်ႈ 6 မူင်း သဵင်ၵွင်ႈတႅၵ်ႇ။ ၵူၼ်း ဝၢၼ်ႈ ဢမ်ႇႁတ်းယူႇတီႈႁိူၼ်းယဝ်ႉလႄႈ ၼၢင်းယိင်းလႄႈလုၵ်ႈဢွၼ်ႇ ဢွၼ်ၵၼ် ပၢႆႈယူႇတီႈ ၵျွင်းမုၼ်ၸဝ်ႈ။ ၵူၼ်းၸၢႆးၵမ်ႈၽွင်ႈ ပႂ်ႉႁိူၼ်းပႂ်ႉဝၢၼ်ႈ။ ၶိင်းၵၢင်ႉသမ်ႉ ၺႃးသိုၵ်းမၢၼ်ႈႁွင်ႉၵႂႃႇ တၢင်း ၶိုၼ်း။ ၽွင်း 8 မူင်းၼၼ်ႉ မၢၵ်ႇလူင်တူၵ်းသႂ်ႇၼႃႈႁိူၼ်းလုင်းတိင်းၶဝ်။ ၸၢၵ်ႇမၢၵ်ႇတိူဝ်ႉသႂ်ႇလုင်းဢေး လူမ်ႉတၢႆတီႈပၢၵ်ႇၽၵ်းတူတၢင်းၶဝ်ႁိူၼ်းလုင်းတိင်းၼၼ်ႉ။ ၶမ်ႈဝႃးတႄႉ ႁူႉယူႇဝႃႈလုင်းဢေးတၢႆ။ ဢမ်ႇမီးၽႂ်ႁတ်းၵႂႃႇတူၺ်းၶႃႈလႃႇ။ ၼႂ်ၼႆႉၸင်ႇဢွၼ်ၵၼ်ၵႂႃႇတူၺ်းသေ ဢဝ်မႃးလုမ်းလႃးတူဝ်မၼ်း။ – ဝႃႈၼႆ။
ၵူၼ်းဝၢၼ်ႈၵုင်းသႃႇလၢတ်ႈဝႃႈ သဵင်ၵွင်ႈၶမ်ႈဝႃးၼႆႉ မီးသဵင်ၾၢႆႇလဵဝ်ၵူၺ်း။ ဢမ်ႇမီးသဵင်တုမ်ႉတွပ်ႇၶိုၼ်း။ သိုၵ်းမၢၼ်ႈၶဝ်ႈယူႇၼႂ်းဝတ်ႉၵျွင်းမုၼ်ၸဝ်ႈၵုင်းသႃႇသေ တင်ႈၵၢင်ႉၵွင်ႈလူင်လႄႈ ၵူၼ်းဝၢၼ်ႈ ဢမ်ႇႁတ်းပိုင်ႈယူႇသဝ်းတီႈဝတ်ႉ လႆႈသိုပ်ႇပၢႆႈၵႂႃႇယူႇတီႈၵျွင်းမိူင်းတဵမ် ဝႃႈၼႆ။
ဢၢႆႈၸၢႆးလၢတ်ႈဝႃႈ- “သိုၵ်းမၢၼ်ႈသမ်ႉမႃးယူႇၼႂ်းၵျွင်းမုၼ်ၸဝ်ႈထႅင်ႈ။ မႃးပၵ်းၵၢင်ႉၵွင်ႈလူင် ၶဝ်ၼႂ်း ဝၢင်းၵျွင်း။ ၵူၼ်းဝၢၼ်ႈ ဢွၼ်ၵၼ်ပၢႆႈ ထႅင်ႈ။ ၵမ်ႈၽွင်ႈၵႂႃႇယူႇႁိူၼ်းပီႈၼွင်ႉ ၵမ်ႈၽွင်ႈၵႂႃႇ မီးတီႈၵျွင်း မိူင်းတဵမ်”- ဝႃႈၼႆ။
ဝၼ်းတီႈ 17 သမ်ႉ တူၵ်းသႂ်ႇၼႂ်းဝၢၼ်ႈ ၵုင်းၸူင် ၊ ဝၢၼ်ႈမႂ်ႇ ဢွင်ႇတိတ်ႉၸႃႇ ဢိူင်ႇတႃႈပုင်ႈ ဝဵင်းလႃႈသဵဝ်ႈ။ မီးၵူၼ်းမၢတ်ႇၸဵပ်းၸွမ်း 2 ၵေႃႉ။ယၢမ်းလဵဝ်ယူတ်းယႃတူဝ်ဝႆႉတီႈႁူင်းယႃလႃႈသဵဝ်ႈ ဝႃႈၼႆ။
ပၢင်တိုၵ်းၼႆႉ ဝၢႆးသိုၵ်းဢူၺ်းလီ ပွတ်းႁွင်ႇသၢမ်ၸုမ်း သိုၵ်းလွႆ၊ သိုၵ်းရၶႅင်ႇ တင်း သိုၵ်းၶႄႇၵဝ်ႈၵၢင်ႉ ႁူမ်ႈၵုၼ်လေႃႇတိုၵ်းၼႂ်းၸႄႈဝဵင်းပၢင်ႁူႈ၊ ၼွင်ၶဵဝ်၊ ၵျွၵ်ႉမႄး – ၾၢႆႇသိုၵ်းလူင်ပွင်ၸိုင်ႈမၢၼ်ႈ၊ တပ်ႉပလိၵ်ႈမၢၼ်ႈ တၢႆ 10 ပၢႆ ၵူၼ်းမိူင်းတၢႆ ၵေႃႉၼိုင်ႈ။ ၾၢႆႇသိုၵ်းလူင်ပွင်ၸိုင်ႈၵေႃႈ ပိုၼ်ၽၢဝ်ႇ တေၵႂၢတ်ႇလၢင်ႉ ၵႂႃႇၼႆလႄႈ ႁဵတ်းႁႂ်ႈပၢင်တိုၵ်း ၽႄႈလၢမ်း ၼႂ်းၸႄႈဝဵင်းလႃႈသဵဝ်ႈ သႅၼ်ဝီ ၵူတ်ႉၶၢႆ – ၶူဝ် ဝူင်ႈၵၢင် သႅၼ်ဝီၵုၼ်လူင်ၵေႃႈ ၺႃးမၢၵ်ႇၵူၼ်ႇပင်းပႅတ်ႈဢမ်ႇယွမ်း သွင်လင်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ