ၼႂ်ၼႆႉ ၸုမ်းၵူၼ်းၼုမ်ႇလႃႈသဵဝ်ႈၶွၼ်ႈႁႅင်းၵၼ် ၶိုင်ၵႂႃႇၸွႆႈထႅမ် ၵူၼ်းၺႃးၽေးသိုၵ်း တၢင်းႁွင်ႇဝဵင်း လႃႈသဵဝ်ႈ ဝူင်ႈၵၢင်သႅၼ်ဝီၼၼ်ႉ ထႅဝ်ရူတ်ႉၵႃးၶဝ် ၺႃးၸုမ်းယိပ်းၵွင်ႈ ယိုဝ်းသႂ်ႇလႄႈ ၵေႃႉပဵၼ်ႁူဝ်ပဝ်ႈၸုမ်းၵူၼ်းၼုမ်ႇ  တၢႆထင်တီႈ ၵူၼ်းၸွမ်းၼႂ်းလူတ်ႉမၢတ်ႇၸဵပ်း 3 ၵေႃႉ။

ဝၼ်းတီႈ 17/8/2019 ယၢမ်းၵၢင်ၼႂ် ပႅတ်ႇမူင်း သဵင်ၵွင်ႈတႅၵ်ႇတီႈ ပၢမ်ႉၼမ်ႉမၼ်းတဵင်ႇၽိဝ်ႇ ဢၼ်မီး ၼႂ်းဢိူင်ႇၼမ်ႉတူၼ်း ယၢၼ်လႃႈသဵဝ်ႈ 12 လၵ်း တၢင်းၵႂႃႇသႅၼ်ဝီၼၼ်ႉ မီးၶၢဝ်ႇဝႃႈ မီးၵူၼ်းမၢတ်ႇ ၸဵပ်း ၼႆလႄႈ ၸုမ်းၵူၼ်းၼုမ်ႇ လႃႈသဵဝ်ႈ ဢဝ်လူတ်ႉၵႃး 8 လမ်းသေ မုင်ႈၸူးတီႈၼၼ်ႈ။

မိူဝ်ႈႁဝ်းၶႃႈၵႂႃႇထိုင်ၼၼ်ႉ သဵင်ၵွင်ႈတိုၵ်ႉတႅၵ်ႇတီႈ ပၢမ်ႉၼမ်ႉမၼ်းယူႇ။ ဢမ်ႇၸၢင်ႈၶဝ်ႈ။ ၽိူဝ်ႇသဵင်ၵွင် ယဵၼ်ယဝ်ႉ ႁဝ်းၶႃႈ ၽိုတ်ႉၶဝ်ႈတူၺ်း။ ၵႃးႁူဝ်ပဝ်ႈ ထုၼ်းမိၼ်ႉ  သမ်ႉထူဝ်းၼႃႈ လႄႈ မၼ်းယင်းၵပ်း ၾူၼ်းလၢတ်ႈၵူၼ်းတၢင်းလင်ဝႃႈ ယႃႇၽူမ်ႈၶဝ်ႈမႃးၼႆ။ မိူဝ်ႈၼၼ်ႉၵမ်းလဵဝ် သဵင်ၵွင်ႈတႅၵ်ႇ။ ယိုဝ်းသႂ်ႇၵႃးၶဝ်။  ဢဝ်မၢၵ်ႇလူင်လိုင်ႈပႃးထႅင်ႈ လူတ်ႉၵႃးၶဝ်ပိၼ်ႈ  ။ ႁူဝ်ပဝ်ႈမၢတ်ႇမၢၵ်ႇၵွင်ႈတၢႆထင်တီႈ  – ၼႆ ႁူဝ်ၼႃႈၸုမ်းၵူၼ်းၼုမ်ႇတႆး TYO လႃႈသဵဝ်ႈ ၸၢႆးႁၢၼ်ႇလၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႇ။

ၵေႃႈလူႉတၢႆ ၼႆႉ ပဵၼ်ႁူဝ်ပဝ်ႈၵူၼ်းၼုမ်ႇ ပရႁိတ လႃႈသဵဝ်ႈ၊ ၸိုဝ်ႈႁွင်ႉ ဢူးထုၼ်းမိၼ်ႉ၊ တီႈၵိူဝ်းယမ် ပဵၼ် သႃသၼႃဢိတ်ႉသလမ်း(မူႇသလိမ်ႊ) ။မၼ်းၸၢႆးယူႇပွၵ်ႉ 7 လႃႈသဵဝ်ႈ ။ ပဵၼ်ၽူႈတူင်ႉတိုၼ်ႇၸွႆႈထႅမ်ၵၢၼ်ပရႁိတၵေႃႉၼိုင်ႈ။

“တၢင်းပွတ်း ၼမ်ႉၸလၢပ်ႈ ၵုၼ်လူင်သမ်ႉပဵၼ် ပၢင်တိုၵ်းၵၼ်၊ ၶူဝ်ၵေႃႈ ၺႃးမၢၵ်ႇ ပွႆႇၵွႆသွင်လင်။ ပေႃးလူဝ်ႇထႅမ်ႁႅင်းသိုၵ်း သိုၵ်းလူင်ပွင်ၸိုင်ႈမၢၼ်ႈသမ်ႉ ၵႆႉပွမ်တူဝ် ႁဵတ်းၵူၼ်းမိူင်းသေ ၵႂႃႇလႄႈ ၊ ၵႃးၵူၼ်းၼုမ်ႇသမ်ႉ 7-8 လမ်းပဵၼ်ထႅဝ်လူင်ဝႆႉလႄႈ ထၢင်ႇၺႃးယိုဝ်းၽိတ်းၵူၺ်း” – ၼႆ လုင်းၸၢႆးမွၵ်ႇ ပေႃႈၾႃႉမႄႈမိူင်း ဝဵင်းလႃႈသဵဝ်ႈလၢတ်ႈ။

ၵူဝ်ႇဢွင်ႇၵျေႃႇဢူး လုၵ်ႈၸုမ်း ၸုမ်းၵုၼ်းၼုမ်ႇလႃႈသဵဝ်ႈ လၢတ်ႈဝႃႈ ၽိူဝ်ႇသဵင်ၵွင်ႈယဵၼ်ၸင်ႇၸၢင်ႈၵႂႃႇဢဝ်လူတ်ႉၵႃးလႄႈ ၵူၼ်းပဵၼ်ၵူၼ်းတၢႆၼၼ်ႉဢွၵ်ႇမႃးလႆႈ ဝႃႈၼႆ။

 မွၵ်ႈ 11 မူင်းၶိုင်ႈၼႆႉ ႁဝ်းၶႃႈၸင်ႇၸၢင်ႈၵႂႃႇဢဝ်တူဝ်တၢႆၶဝ်မႃးလႆႈဢေႃႈ။ ယၢမ်းလဵဝ် တူဝ်တၢႆႁူဝ်ပဝ်ႈႁဝ်းလႄႈ ၵူၼ်းမၢတ်ႇၸဵပ်း 3 ၵေႃႉၼၼ်ႉမီးတီႈႁူင်းယႃလႃႈသဵဝ်ႈယဝ်ႉ။ ဢၼ်မၢတ်ႇၸဵပ်းၼၼ်ႉပဵၼ်ၸွမ်းၶေႃး ၸွမ်းၶႅၼ် ၊ ႁူဝ်၊  ဝႂ်ႁူ ၸိူဝ်းၼႆႉ။ ၸၢၵ်ႇမၢၵ်ႇၶဝ်ႈတူဝ်ၶဝ်ၼမ်ဝႆႉၶႃႈဢေႃႈ။ တႃႇသွင်ၵေႃႉၼၼ်ႉ ထိုင်တီႈလီမႆႈၸႂ်ယူႇဢေႃႈ။ – ၵူဝ်ႇဢွင်ႇၵျေႃႇဢူးလၢတ်ႈတီႈၽူႈတွႆႇႁွၵ်ႈ ၼင်ႇၼႆ။

ဝၼ်းတီႈ 17 /8/2019 မိူဝ်ႈၼႆႉၵၢင်ၼႂ်ငဝ်းလၢႆးၼႂ်းၵႄႈလႃႈသဵဝ်ႈ – သႅၼ်ဝီ- ၵူတ်ႉၶၢႆ ငဝ်းလၢႆးပၢင်တိုၵ်းၶဵင်ႈၶႅင်ၵၼ်။ ၵူၼ်းမိူင်းဢမ်ႇႁတ်းဢွၵ်ႇတၢင်းၵႂႃႇမႃး။ ပဵၼ်ဢၼ်မႆႈၸႂ်လွင်ႈႁူမ်ႇလူမ်ႈ။

ဝၼ်းတီႈ 15/8/2019 ၸၼ်ႉၸွမ်ပၢႆးသိုၵ်း ဝဵင်းပၢင်ႁူႇ ၊ ၶူဝ်ႁူၺ်ႈၵိုတ်ႇ၊ လၢၼ်ႇထထ်း ဢေႊသျိူဝ်ႊဝိူဝ်ႊ ၼႂ်းၵႄႈ ၼွင်ႉၶဵဝ်ၵျွၵ်ႉမႄး ၺႃးၸုမ်းဢူၺ်းလီပွတ်းႁွင်ႇလူမ်ႇယိုဝ်း 5 တီႈ။ သိုၵ်း ပလိၵ်ႈ ဢမ်ႇၵႃး ပႃးၵူၼ်းမိူင်းလူႉတၢႆမၢတ်ႇၸဵပ်းၼမ်။ ၾၢႆႇသိုၵ်းလူင်ပွင်ၸိုင်ႈၵေႃႈ ပိုၼ်ၽၢဝ်ႇဝႆႉ တေၵႂၢတ်ႇလၢင်ႉၵႂႃႇ ၼႆလႄႈ ပၢင်တိုၵ်းတေၸၢင်ႈယႂ်ႇၶိုၼ်ႈမႃး ၼႂ်းၸိုင်ႈတႆးပွတ်းႁွင်ႇထႅင်ႈ – ၽူႈလဵပ်ႈႁဵၼ်းၵၢၼ်သိုၵ်း ထတ်းသၢင်ၼင်ႇၼႆ။