သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်းပဵၼ်ပၢင်တိုၵ်းၵၼ် ႁိမ်းဝၢၼ်ႈမိူင်းၸီး ဝဵင်းတႃႈမိူင်းငႅၼ်း ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။ တိူဝ်ႉၺႃးၵူၼ်းမိူင်းတၢႆၼိုင်ႈၵေႃႉ၊ ၶူးသွၼ် ႁူင်းႁဵၼ်း လႆႈမၢတ်ႇၸဵပ်း ၼိုင်ႈၵေႃႉ။
ဢူးၼေႃႇသၢၼ်ႉ ၽူႈၵွၼ်းႁူင်းႁဵၼ်း ၸၼ်ႉသုင် တႃႈမိူင်းငႅၼ်း လၢတ်ႈတီႈၽူႈတွႆႇႁွၵ်ႈဝႃႈ “ပၢင်တိုၵ်းပဵၼ် ဝၼ်းတီႈ 13/8/2019 ယၢမ်းၵၢင်ဝၼ်း ဢွၼ်ႇၸၢႆး ဢႃယု 19 ပီ တိူဝ်ႉၺႃးတီႈႁူဝ်သေ လႆႈလူႉတၢႆထင်တီႈ ထိုင်မႃး ဝၼ်းတီႈ 14 ၸင်ႇၵႂႃႇဢဝ်ၶၢပ်ႈတူဝ်တၢႆ မၼ်းၸၢႆးမႃးလုမ်းလႃးသၢင်းၵျူဝ်ႇ ။ မိူဝ်ႈၽွင်းပဵၼ်ၼၼ်ႉ ၶႃသွင်ၵေႃႉပီႈၼွင်ႉၵႂႃႇၼႃးပွၵ်ႈမႃး ယၢမ်းဝၢႆး ဝၼ်း 3 မူင်းၶိုင်ႈ တီႈဢၼ်ၶႃပီႈၼွင်ႉမႃးပဵမ်ႇမႅပ်ႉၼႂ်းၵႄႈပၢင်တိုၵ်းၼၼ်ႉ ၽူႈၵွၼ်းႁူင်းႁဵၼ်းၸၼ်ႉသုင်မိူင်းၸီး ၵေႃႈမႃးပဵမ်ႇၸွမ်းၶဝ်။ ၺႃးမၢတ်ႇၸဵပ်းၼင်ႇၵဝ်ႇ။” ဝႃႈၼႆ။
ၽူႈၸၢႆးဢၼ်လူႉတၢႆၵႂႃႇၼၼ်ႉ ဢႃယု 19 ပီ ၶူးသွၼ်ဢၼ်လႆႈမၢတ်ႇၸဵပ်းၼၼ်ႉ တေႃႈလဵဝ် လႆႈသူင်ႇယူတ်းယႃတူဝ်ဝႆႉတီႈႁူင်းယႃ ၵူတ်ႉၶၢႆယဝ်ႉ ဝႃႈၼႆ။
တီႈၼႂ်းႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်း TNLA ပိုၼ်ၽၢဝ်ႇဝႆႉဝႃႈ ၼႂ်းလိူၼ်ဢေႃႊၵတ်ႊသ် 2019 ၼႆႉမႃး သိုၵ်း လူင်ပွင်ၸိုင်ႈမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် 14 ပွၵ်ႈယဝ်ႉ ဝႃႈၼႆ။
ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ မိူဝ်ႈ 21/12/2018 ၼၼ်ႉဝႃႈ ၵိုတ်းတိုၵ်းၾၢႆႇလဵဝ် ၶၢဝ်းတၢင်း 4 လိူၼ်၊ ထိုင်လိူၼ်ဢေႊပရိူဝ်ႊ ယိုတ်ႈထႅင်ႈ 2 လိူၼ် လိူၼ်ၵျုၼ်ႊသဵင်ႈယိုတ်ႈထႅင်ႈ 2 လိူၼ်တေႃႇလိူၼ်ဢေႃႊၵတ်ႊသ် သဵင်ႈ ပဵၼ် ၵႂႃႇ 8 လိူၼ်။ ပိုၼ်ၽၢဝ်ႇၸီႉသင်ႇဝႆႉၼႂ်း 5 တိူင်းသိုၵ်း မိူၼ်ၼင်ႇ တိူင်းသိုၵ်းပွတ်းႁွင်ႇ(ၸေႊၼႃး)၊ တိူင်းသိုၵ်း ၸဵင်ႇႁွင်ႇ ဝၼ်းဢွၵ်ႇ (လႃႈသဵဝ်ႈ)၊ တိူင်းသိုၵ်းဝၼ်းဢွၵ်ႇ(တူၼ်ႈတီး)၊ တိူင်း သိုၵ်းဝၼ်းဢွၵ်ႇၵၢင် (ၶူဝ်လမ်) လႄႈ တိူင်း သိုၵ်းသၢမ်ၸဵင်ႇ (ၵဵင်းတုင်) ၸိူဝ်းၼႆႉ ႁႂ်ႈၵိုတ်းၵၢၼ်တူင်ႉၼိုင်သိုၵ်းဝႆႉ ဝႃႈၼႆသေတႃႉ ပၢင်တိုၵ်းၼႂ်းၸိုင်ႈတႆး ပွတ်းႁွင်ႇ တႄႉ ၵိူတ်ႇၶိုၼ်ႈၶိူဝ်းယႂ်းမႃး။
