ၵေႃႉပဵၼ်ပေႃႈ ၼွင်ႉဢွၼ်ႇ ဝိၵ်ႉထူဝ်ႊရီႊယႃႊ ( Victoria)  ဢႃယု 3 ၶူပ်ႇ (ဢၼ်ၺႃးၵၼ်ႉၸၼ်တီႈႁူင်းႁဵၼ်း ၸၼ်ႉဢွၼ် Wisdom Hill ၼေႇပီႇတေႃႇ) ၼၼ်ႉ မိူဝ်ႈၼႆႉလႆႈဢဝ်ႁၢင်ႈၶလိပ်ႉ ဝီႊတီႊဢူဝ်ႊ ဢၼ်လုၵ်ႈယိင်းၸိၼေႁၢင်ႈၵူၼ်းႁၢႆႉ ၼၼ်ႉတၢင်ႇတီႈလုမ်းတြႃးလႄႈ ၾၢႆႇတၢင်းလုမ်းတြႃးလႆႈႁပ်ႉဝႆႉပဵၼ်လၵ်းထၢၼ်လမ်ႇလွင်ႈတႃႇတိလႆႈၵူၼ်းႁၢႆႉတူဝ်တႄႉ ဝႃႈၼႆ။

မိူဝ်ႈၼႆႉဝၼ်းတီႈ 14/8/2019 လုမ်းတြႃးႁွင်ႉဢဝ်ပေႃႈ လႄႈ မႄႈထဝ်ႈ  ၼွင်ႉ Victoria ၵႂႃႇတွင်ႈထၢမ်ၵူတ်ႇထတ်းၵဵဝ်ႇၵပ်းဢမု ၶတီႊ ၼွင်ႉVictoria ဢၼ်ၺႃးၵၼ်ႉၸၼ်တီႈႁူင်းႁဵၼ်း မိူဝ်ႈဝၼ်းတီႈ 16 လိူၼ်မေႊပူၼ်ႉမႃး  ၼၼ်ႉ။

တေႃႇသုတႃႇလီႇ ၽူႈတၢင်လၢတ်ႈ သၽႃးၾၢႆႇတဵင်ႈထမ်း (တရားလွှတ်တော်ရှေ့နေ) ၾၢႆႇၼွင်ႉ Victoria  လၢတ်ႈတီႈ ၼၵ်းၶၢဝ်ႇ ၽွင်းမၼ်းၼၢင်းဢွၵ်ႇလုမ်းတြႃးမႃး  ၼၼ်ႉဝႃႈ- မိူဝ်ႈၼႆႉပေႃႈလုၵ်ႈဢွၼ်ႇဢဝ် ၶလိပ်ႉဝီႊတီႊဢူဝ်ႊ ဢၼ်ထၢမ်လုၵ်ႈယိင်းမၼ်း ( ၼွင်ႉ Victoria) ဝႆႉဝႃႈ ၽူႈႁဵတ်းႁၢႆႉၼွင်ႉၼၼ်ႉပဵၼ်ၽႂ် ၼႆၼၼ်ႉမႃးတၢင်ႇတီႈလုမ်းတြႃး တႃႇပဵၼ်လၵ်းထၢၼ်ၶႃႈဢေႃႈ။ ၼႂ်းၶလိပ်ႉဝီႊတီႊဢူဝ်ႊၼၼ်ႉ ၼွင်ႉဢွၼ်ႇၸိၼေၶႅပ်းႁၢင်ႈၵူၼ်းႁၢႆႉ ဢၼ်ႁဵတ်းႁၢႆႉမၼ်း ။   ဝီႊတီႊဢူဝ်ႊ ဢၼ်ၼၼ်ႉ လုမ်းတြႃးႁပ်ႉဝႆႉယဝ်ႉ ။   လၢမ်းၶၢတ်ႈဝႃႈ ၼႂ်းဢမ်ႇႁိုင်ဢမ်ႇၼၢၼ်းၼႆႉ တေႁႃၽူႈႁဵတ်းၽိတ်းတူဝ်တႄႉမၼ်းလႆႈယူႇ- ဝႃႈၼႆ။

ၼႂ်းၶလိပ်ႉဝီႊတီႊဢူဝ်ႊၼၼ်ႉ  မီးၶႅပ်းႁၢင်ႈမႃးၼေၼွင်ႉ ဝိၵ်ႉထူဝ်ႊရီႊယႃႊ 5 ဢၼ်။ မီးႁၢင်ႈမေႃသွၼ်ၼိၼ်းၼု (မေႃသွၼ်ဢၼ်ႁၼ်ၽူႈၵၼ်ႉၸၼ်ၼွင်ႉဢွၼ်ႇ)၊   မီးႁၢင်ႈ   ၵူဝ်ႇၵူဝ်ႇ လႄႈ ၺီႇၺီႇ လုၵ်ႈၸၢႆးၽူႈၵွၼ်းႁူင်းႁဵၼ်း၊ မီးႁၢင်ႈ ဢွင်ႇၵျီး ၵူၼ်းၶပ်းလူတ်ႉႁူင်းႁဵၼ်း (ၵေႃႉဢၼ်ၺႃးတိဝႆႉယၢမ်းလဵဝ်) လႄႈႁၢင်ႈဢၼ်မီးၵူၼ်းလၢႆလၢႆၵေႃႉ ဢၼ်ပႃးႁၢင်ႈ   ၵူဝ်ႇၵူဝ်ႇ လႄႈ ၺီႇၺီႇ သွင်ပီႈၼွင်ႉ။ ၼွင်ႉဢွၼ်ႇ Victoria ၸိၶႅပ်းႁၢင်ႈ ၵူဝ်ႇၵူဝ်ႇ သေဝႃႈ ၵေႃႉၼႆႉ ပဵၼ်ၵေႃႉႁဵတ်းႁၢႆႉ(ၵၼ်ႉၸၼ်) ။  ၸိႁၢင်ႈမေႃသွၼ်ၼိၼ်းၼုသေ လၢတ်ႈဝႃႈ ၼႆႉပဵၼ်မေႃသွၼ်ၼိၼ်းၼု ဢၼ်ပွင်ႉထႃႉ ၵူဝ်ႇၵူဝ်ႇ။ ၵူၺ်းၵႃႈ မိူဝ်ႈၸိၼေ ဢွင်ႇၵျီး ဢၼ်ၺႃးတိၺွပ်းဝႆႉၼၼ်ႉ ၼွင်ႉ Victoria လၢတ်ႈဝႃႈဢမ်ႇႁူႉၸၵ်း  – ၼႆ တေႃႇသုတႃႇလီႇလၢတ်ႈ။

ၵူၺ်းၵႃႈဝၼ်းမိူဝ်ႈၼႆႉ လုမ်းတြႃးယင်းပႆႇတႅပ်းတတ်းသင်သေပိူင်။ၵဵဝ်ႇၵပ်းဢမု ၶတီႊလွင်ႈၼႆႉ ၵူၼ်းမိူင်းၵမ်းၵမ်းဢွၵ်ႇၼေၵၢင်ၸႂ်ႁႂ်ႈ ပလိၵ်ႈၾၢႆႇၸွပ်ႇၶၢဝ်ႇလႄႈၽူႈမီးပုၼ်ႈၽွၼ်း ၶိုင်သၢင်ႈပၼ်တႃႇလွင်ႈၽဵင်ႇပဵင်းၶၼ်ၶၼ်ဝႆးဝႆး- ဝႃႈၼႆ။

ယိင်းဢွၼ်ႇ ဝိၵ်ႉထူဝ်ႊရီႊယႃႊ Victoria ဢႃယု 3 ၶူပ်ႇ ၺႃးၵၼ်ႉၸၼ်တီႈႁူင်းႁဵၼ်းၸၼ်ႉဢွၼ် Wisdom Hill ၼေႇပီႇတေႃႇမိူဝ်ႈဝၼ်းတီႈ 16 လိူၼ်မေႊ။ ယၢမ်းလဵဝ်ႁိုင် 3 လိူၼ်ယဝ်ႉသေတႃႉ ပႆႇတိလႆႈၵူၼ်းႁၢႆႉ။ ၸွမ်းၼင်ႇၸဝ်ႈႁူင်းႁဵၼ်းၸႅင်ႈၵႂၢမ်းသေ ပလိၵ်ႈတိဝႆႉ ဢွင်ႇၵျီး (ၵူၼ်းႁေႃႈလူတ်ႉႁူင်းႁဵၼ်း) သေၵုမ်းၶင်ဝႆႉၼႂ်းၶွၵ်ႈ။ တင်ႈတႄႇပဵၼ်လိူင်ႈမႃး ၼွင်ႉဢွၼ်ႇတိုၼ်းလၢတ်ႈဝႃႈ ပဵၼ်သွင်ပီႈၼွင်ႉ ၵူဝ်ႇၵူဝ်ႇလႄႈ ၺီႇၺီႇဢၼ်ပဵၼ်လုၵ်ႈၸၢႆး ၽူႈၵွၼ်းႁူင်းႁဵၼ်း ၼၼ်ႉႁဵတ်းႁၢႆႉ ၼႆၵေႃႈ ယႃႇဝႃႈတေတိၺွပ်း ယင်းဢမ်ႇမီးလွင်ႈႁွင်ႉထၢမ်သွင်ပီႈၼွင်ႉၼၼ်ႉသေၵမ်း။

ၵူဝ်ႇၵူဝ်ႇလႄႈၺီႇၺီႇၼႆႉ ပဵၼ်လုၵ်ႈၸၢႆး တေႃႇဢူင်ႇမႃႇ (ၽူႈၵွၼ်းႁူင်းႁဵၼ်း  Wisdom Hill ) လႄႈ ၽူႈၵွၼ်းပလိၵ်ႈ ဢူးယႄးၼွင်ႇ။ ၸဝ်ႈၶွင်ႁူင်းႁဵၼ်းတႄႉလႆႈႁူႉဝႃႈ ပဵၼ်ၽွင်းလူင်ၵဝ်ႇ မိူင်းႁူမ်ႈတုမ်၊ ၸိၵ်းၸွမ်ၽူႈၵွၼ်းၾၢႆႇပလိၵ်ႈၵေႃႉၼိုင်ႈ သိုဝ်ႇၶၢဝ်ႇလၢႆလၢႆဢၼ်ဢွၵ်ႇဝႆႉၼင်ႇၼႆ။