သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇယိုဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢၼ် တူင်ႉ ၼိုင်ယူႇဝႆႉတၢင်းပွတ်းတၢင်ႉယၢၼ်း ၸိုင်ႈတႆးပွတ်းႁွင်ႇ။

ဝၼ်းတီႈ 6/8/2019 ယၢမ်းဝၢႆးဝၼ်း 2:00 မူင်း ထိုင် ႁိမ်း 4 မူင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 127 လႄႈ ၶ မယ 523 တႂ်ႈတိူင်းသိုၵ်းလႃႈသဵဝ်ႈ ႁူမ်ႈၵၼ်ဢဵၼ်ႁႅင်း မွၵ်ႈ 200 ၵေႃႉ ၶိုၼ်ႈလေႃႇယိုဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA ၼႂ်းၵႄႈဝၢၼ်ႈၼႃးပဵင်းလႄႈ ဝၢၼ်ႈၵုၼ်ဝႅတ်ႈ ဢိူင်ႇႁူဝ်မင်း ၸႄႈဝဵင်းတၢင်ႉယၢၼ်း ၸႄႈတွၼ်ႈ လႃႈသဵဝ်ႈ ၸိုင်ႈတႆးပွတ်းႁွင်ႇ။ မိူဝ်ႈၽွင်းတပ်ႉၵွင်မၢႆ 747 SSPP တိုၵ်ႉၵူတ်ႇထတ်းၽဵဝ်ႈမူၺ်ႉယႃႈမဝ်းၵမ် ၵူၼ်းမိူင်း ၼႂ်းပိုၼ်ႉတီႈယူႇၼၼ်ႉ။

ၸဝ်ႈသိုၵ်း ၸၢႆးသူႉ ၽူႈၼမ်းၼႂ်း (2)၊ ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA လၢတ်ႈတီႈ ၽူႈတွႆႇႁွၵ်ႈဝႃႈ “ ၵူၼ်းသိုၵ်းႁဝ်း လူင်းၵူတ်ႇထတ်းၽဵဝ်ႈမူၺ်ႉယႃႈမဝ်းၵမ် မိူဝ်ႈၽွင်းၼၼ်ႉ ၵူၼ်းႁဝ်းတိုၵ်ႉၵူတ်ႇထတ်း ယဵဝ်ႈ ၵူၼ်းၵႂႃႇၵူၼ်းမႃး၊ တီႉလႆႈဝႆႉၵူၼ်း 29 ၵေႃႉ။ တပ်ႉသိုၵ်းမၢၼ်ႈသမ်ႉႁၼ်ၽိတ်းသေ ႁႅၼ်းသိုၵ်းၶဝ်ႈယိုဝ်းႁဝ်းလႄႈ သွင်ၾၢႆႇၸင်ႇလႆႈပဵၼ်ပၢင်တိုၵ်းၵၼ်”ဝႃႈၼႆ။

မိူဝ်ႈဝၼ်းတီႈ 2/8/2019 ၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၵ်ႇၶေႃႈပိုၼ်ၽၢဝ်ႇဝႆႉ တင်းမူတ်း 7 ၶေႃႈ။ ၼႂ်းၼၼ်ႉ ၶေႃႈထီႉ 4 ဢွၵ်ႇဝႆႉဝႃႈ “ ယႃႈမဝ်းၵမ်ၼႆႉ မၼ်းပဵၼ်ၽေးၶဵၼ်လုမ်ႈၾႃႉလႄႈ ၵူႈၸိူဝ်ႉ ၸၢတ်ႈၸၢဝ်းၶိူဝ်း၊ တႃႇယႃႈမဝ်းၵမ်တေမူၺ်ႉႁၢႆၼၼ်ႉ တေသႂ်ႇႁႅင်းသေၽဵဝ်ႈမူၺ်ႉၵႂႃႇ ၵႂၢင်ႈၵႂၢင်ႈ ၶႂၢင်ၶႂၢင်” ဝႃႈၼႆ။

ၽူႈၸမ်ၸႂ်တပ်ႉပိဝ်ႇႁႃႇ တၢင်ႉယၢၼ်းဝႃႈ “ ၾၢႆႇသိုၵ်းမၢၼ်ႈတႄႉဝႃႈ သိုၵ်း SSPP လူင်းပိုၼ်ႉတီႈၶွၼ်ႈႁႅင်းၵူၼ်းမိူင်း ၵဵပ်းသိုၵ်းမႂ်ႇ ဢမ်ႇမႅၼ်ႈၸွမ်းပိူင်သိုၵ်း 6 ၶေႃႈလႄႈ ႁႅၼ်းသိုၵ်းလေႃႇတိုၵ်း” ဝႃႈၼႆ။

ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် မိူဝ်ႈ 21/12/2018 ၶၢဝ်းတၢင်း 4 လိူၼ်၊ လိူၼ်ဢေႊ ပရိူဝ်ႊ ယိုတ်ႈထႅင်ႈ 2 လိူၼ် လိူၼ်ၵျုၼ်ႊသဵင်ႈယိုတ်ႈထႅင်ႈ 2 လိူၼ် တေႃႇလိူၼ်ဢေႃႊၵတ်ႊသ်သဵင်ႈပဵၼ်ၵႂႃႇ 8 လိူၼ်။

တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် တွၼ်ႈတႃႇပိုၼ်ႉတီႈသိုၵ်း 5 တိူင်းသိုၵ်း မိူၼ်ၼင်ႇ တိူင်းသိုၵ်းပွတ်းႁွင်ႇ(ၸေႊၼႃး)၊ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ)၊ တိူင်းသိုၵ်းဝၼ်းဢွၵ်ႇ(တူၼ်ႈတီး)၊ တိူင်း သိုၵ်းဝၼ်းဢွၵ်ႇၵၢင် (ၶူဝ်လမ်) လႄႈ တိူင်းသိုၵ်းသၢမ်ၸဵင်ႇ (ၵဵင်းတုင်) ၸိူဝ်းၼႆႉ။