ၽွင်းၾၢႆႇၵဵပ်းသၢႆမၢႆႁူဝ်ၵူၼ်း လူင်းထတ်း သဵၼ်ႈၸိုဝ်ႈ ၽူႈမီးသိတ်ႇသဵင် တွတ်ႈၶႅပ်းၵၢင်ၸႂ် ၼၼ်ႉ ပႃႇတီႇယၢင်း ( KPP ) တုၵ်းယွၼ်းယႃႇပေၸႂ်ႉ ၸိုဝ်ႈ “ဢူး” ၊ “တေႃႇ” ၼမ်းၼႃႈ ၸိုဝ်ႈသဵင် ၶိူဝ်းယၢင်း ဝႃႈၼႆ။
ၸေႃးၸေးဝႃး ၽူႈၼမ်းၼႂ်းပႃႇတီႇၵူၼ်းမိူင်းယၢင်း KPP လၢတ်ႈဝႃႈ – ဢၼ်လူင်ပွင်ၸိုင်ႈမၢၼ်ႈ တဵၵ်းသႂ်ႇပၼ်တူဝ်ၼမ်းၸိုဝ်ႈ ၸၢဝ်ၶိူဝ်း ဢၼ်ဝႃႈ ဢူး – တေႃႇ ၸိူဝ်းၼႆႉ မၼ်းမိူၼ်ၶႂ်ႈတဵၵ်း၊ ၶႂ်ႈပေႉ ပုၼ်ႈၸၢဝ်းၶိူဝ်းဝႆႉလႄႈ ႁဝ်းၶႃႈတႄႉတိုၼ်းဢမ်ႇၵျိုၵ်ႈ ဢမ်ႇလႆႈၸႂ်သေဢိတ်း။ ၶႂ်ႈႁႂ်ႈၶဝ်သႂ်ႇပၼ် ၸိုဝ်ႈႁဝ်းလူၺ်ႈမီးတူဝ်ၼမ်းၼင်ႇၾိင်ႈၸၢဝ်းၶိူဝ်းယၢင်းႁဝ်းၵူၺ်း – ဝႃႈၼႆ။
တူဝ်ၼမ်းၼႃႈၸိုဝ်ႈပီႈၼွင်ႉယၢင်းတႄႉ ပေႃးပဵၼ်ၽူႈၸၢႆးၼႆ သႂ်ႇ ၸေႃး ၊ ၸ ၊ မၢၼ်း၊ ပေႃးပဵၼ်ၼၢင်းယိင်းၼႆ ၼေႃႇ၊ ၼၢၼ်ႉ၊ ၵႃႉ ၸဵမ်ၸိူဝ်းၼႆႉ။
လိူဝ်ၼၼ်ႉပႃႇတီႇယၢင်း ယင်းတူၵ်ႇတၵ်ႉဝႃႈ ၽွင်းၶၢဝ်းၵေႃႇသၢင်ႈလွင်ႈယုမ်ႇယမ်၊ လွင်ႈၽဵင်ႇပဵင်း၊ လွင်ႈငမ်းယဵၼ်၊ လွင်ႈၸမ်ၸႂ်ၸိူဝ်ႉၸၢတ်ႈၼႆႉ ယႃႇႁႂ်ႈလူင်ပွင်ၸိုင်ႈလႆႈၸႂ်ႉၶေႃႈၵႂၢမ်း ဢၼ် ၸၢဝ်းၶိူဝ်းတေၸၢင်ႈထၢင်ႇထိူမ်- ဝႃႈၼႆဝႆႉ။
ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈ တိူင်းၼမ်ႉၵဵဝ်လၢတ်ႈဝႆႉဝႃႈ ပေႃးဢႃယုတဵမ် 18 ၊ တိုၼ်းတေလႆႈသႂ်ႇၸိုဝ်ႈဢဝ် ဢူး- တေႃႇ ပေႃးပႆႇတဵမ် 18 တေလႆႈသႂ်ႇ မွင်ႇ- မ ၼမ်းၼႃႈဝႃႈၼႆ။
ပၢၼ်ပၢင်လိူၵ်ႈတင်ႈပူၼ်ႉမႃးၼၼ်ႉ မၢင်ၸႄႈမိူင်း မၢင်တိူင်း မီးႁူဝ်ၵူၼ်း ၸၢဝ်းၶိူဝ်းတဵမ်ထူၼ်ႈယူႇၵေႃႈ ဢမ်ႇမီးသုၼ်ႇလႆႈ လိူၵ်ႈတင်ႈၽွင်းလိူဝ်ၾၢႆႇၸၢဝ်းၶိူဝ်းၽႂ်မၼ်း။ ပိူဝ်ႈတႃႇႁူႉလႆႈႁူဝ်ၵူၼ်း ၽူႈမီးသုၼ်ႇလႆႈ တွတ်ႈၶႅပ်းၵၢင်ၸႂ်ၼၼ်ႉ ၶွမ်ႊမသျိၼ်ပၢင်လိူၵ်ႈတင်ႈ၊ သူင်ႇၵေႃၽႄ လူင်းၵဵပ်းသဵၼ်ႈၸိုဝ်ႈ ပတ်းပိုၼ်ႉတူဝ်ႈမိူင်း ႁႂ်ႈယဝ်ႉၼႂ်းၶၢဝ်းတၢင်း 3 လိူၼ်။
ၶေႃႈမုၼ်း- Irrawaddy
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ