သင်ၶၸဝ်ႈလႄႈ ၸုမ်းတူင်ႉၼိုင်တူင်ႇဝူင်းပၢႆးပၺ်ၺႃတႆး ႁူပ်ႉထူပ်းဢုပ်ႇဢူဝ်းၵၼ်တႃႇ ႁူမ်ႈၵၼ် သၢင်ႈပၢႆးပၺ်ၺႃ ၸိူဝ်ႉ ၸၢတ်ႈတႆး ႁႂ်ႈပၢႆးပၺ် ၺႃတႆးပေႃးတေ ၵွင်ႉသၢၼ်ၵၼ် တၢင်းပၢႆးပၺ်ၺႃလူင်ပွင်ၸိုင်ႈမၢၼ်ႈလႄႈ ႁႂ်ႈလႆႈၸႂ်ႉလိၵ်ႈတႆး – ၵႂၢမ်းတႆး ၼႂ်း ႁူင်းႁဵၼ်း ဝႃႈၼႆ။

ဝၼ်းတီႈ 21-22/7/2019 ၼၼ်ႉ သင်ၶၸဝ်ႈလႄႈ ၸုမ်းတူင်ႉၼိုင်တူင်ႇဝူင်းၵူၼ်းတႆး ၾၢႆႇပၢႆးပၺ်ၺႃ လၢႆလၢႆတီႈ မႃးၵႂၢမ်း ၵၼ် ႁူမ်ႈသၢင်ႈတႃႇပၢႆးပၺ်ၺႃ ၸိူဝ်ႉၸၢတ်ႈတႆး။ ပၢင်ၵုမ်ၼႆႉ ၸတ်းႁဵတ်းတီႈဝတ်ႉဝေႇလုဝၼ်ႇ ၸႄႈဝဵင်း တူၼ်ႈတီး ၸိုင်ႈတႆးပွတ်းၸၢၼ်း။

ၶူးၸၢႆးၶမ်းမိူင်း လၢတ်ႈဝႃႈ “ ယွၼ်ႉပိူဝ်ႈဝႃႈ ႁဝ်းယူႇၼႂ်းမိူင်းႁူမ်ႈတုမ် ႁဝ်းတေၵၢင်းယၢၼ်လူင်ပွင်ၸိုင်ႈမၢၼ်ႈ ဢမ်ႇလႆႈ ပၢႆး ပၺ်ၺႃ မိူင်းမၢၼ်ႈဢမ်ႇလႆႈ။ ၶႂ်ႈႁႂ်ႈပၢႆးပၺ်ၺႃတႆးၼႆႉ ၵွင်ႉသၢၼ်ၵၼ်တင်း လူင်ပွင်ၸိုင်ႈမၢၼ်ႈ ၶႂ်ႈႁႂ်ႈၵၢၼ်ႁဵၼ်းပၢႆးပၺ် ၺႃတႆးၼႆႉ ႁႂ်ႈမီးၶွမ်ႊမတီႊၸိူဝ်ႉၸၢတ်ႈ ပၢႆးပၺ်ၺႃတႆး တွၼ်ႈတႃႇၸိူဝ်ႉၸၢတ်ႈတႆး တင်းမူတ်း၊ ယဝ်ႉၵေႃႈ ၼႂ်းမိူင်းတႆးၼႆႉ ႁႂ်ႈမီးပေႃႇလသီႇ ၵၢၼ်သွၼ်ႁဵၼ်းလိၵ်ႈ မူႇလဵဝ်၊ ပိူင်လဵဝ် ၼႂ်းၵၢၼ်တႅမ်ႈလိၵ်ႈ၊ မေႃ လိၵ်ႈလႄႈ ၵၢၼ်ပိုၼ်ႉႁူႉ ၸဵမ်ၸိူဝ်း ၼႆႉ” ဝႃႈၼႆ။

ၸဝ်ႈတူၼ်ၶူးလူင် ၻွၵ်ႊတိူဝ်ႊ ပၺ်ၺႃၼၼ်ႇတ ဝတ်ႉထၢတ်ႈတေႃႇလွႆလႅမ် လၢတ်ႈတီႈပၢင်ၵုမ်ၼၼ်ႉဝႃႈ“ ၶႂ်ႈႁႂ်ႈမိူၼ်ၼင်ႇ လၢႆးၸၼ်ႉၸွမ်ၶေႃႊလဵၵ်ႊ( သရိပုတ်ႉထၶေႃႊလဵၵ်ႊ) ၶႂ်ႈႁႂ်ႈဢဝ်လိၵ်ႈတႆးပဵၼ်ယႂ်ႇ” ဝႃႈၼႆ။

“ပၢႆးပၺ်ၺႃၼႆႉ မၼ်းၵႂၢင်ႈၶႂၢင် တႄႉတႄႉ မိူင်းတႆးၼႆႉ ယွၼ်ႉမၼ်းပဵၼ်ၸႄႈမိူင်းဢၼ်ၼိုင်ႈလႄႈ ႁူဝ်ၵူၼ်းတႆးႁဝ်းၵေႃႈ သမ်ႉၼမ်သေပိူၼ်ႈ ႁဝ်းလူဝ်ႇ လႆႈမီးၵၢၼ်သွၼ်လိၵ်ႈတႆးလႄႈ တင်းလိၵ်ႈပိူၼ်ႈ ႁႂ်ႈမၼ်းပေႃးငၢမ်ႇမႅၼ်ႈ လွင်ႈဝႃႈႁဝ်းပဵၼ် ၸဝ်ႈၶွင်မိူင်း ၸူးၸႂ်တႄႉ ဢဝ်လိၵ်ႈတႆးပဵၼ်ယႂ်ႇ။ ၸွမ်းပိူင်တၢမ်းဝၢၵ်ႈ(ပိူဝ်ႊသႅၼ်ႊ) မၼ်း မိူၼ်ၼင်ႇ လိၵ်ႈမၢၼ်ႈ၊ ဢင်း ၵိတ်းၸိူဝ်းၼႆႉၵေႃႈ သွၼ်ၵႂႃႇ တမ်း ၵႂႃႇ ပေႃးၸၼ်ႉမၼ်းယႂ်ႇမႃးယဝ်ႉ ဝၢႆးမႃးၵေႃႈတေၵိုတ်းဝႆႉလိၵ်ႈဢင်းၵိတ်း။ ယဝ်ႉၵေႃႈ ႁႂ်ႈမီးၵၢၼ်ၵွင်ႉသၢၼ်ၵၼ် တင်း ငဝ်ႈငုၼ်းပၢႆးပၺ်ၺႃ ဢၼ်ႁူင်းႁဵၼ်းတႆး မီးၼႂ်းမိူင်းတႆး ၸိူဝ်းၼၼ်ႉတင်းမူတ်း”ဝႃႈၼႆ။

ပၢင်ၵုမ်ႁူမ်ႈသၢင်ႈတႃႇပၢႆးပၺ်ၺႃ ၸိူဝ်ႉၸၢတ်ႈတႆးၼႆႉ ဢုပ်ႇဢူဝ်းလႆႈၸႂ်ၶေႃႈမၵ်းမၼ်ႈၵၼ်ဝႆႉ မိူၼ်ၼင်ႇ – တေတင်ႈ ၸိုဝ်ႈ မုၵ်ႉၸုမ်း ဢၼ်ဝႃႈ ၵေႃႁူမ်ႈသၢင်ႈပၢႆးပၺ်ၺႃ ၸိူဝ်ႉၸၢတ်ႈတႆး၊ ၼႂ်းၵၢၼ်ပၢႆးပၺ်ၺႃ ၸိူဝ်ႉၸၢတ်ႈတႆးၼႆႉ ၽူႈၶဝ်ႈ ႁူမ်ႈပၢင်ၵုမ် လႆႈၸႂ်ႁႂ်ႈသင်ၶၸဝ်ႈဢွၼ်ႁူဝ်ၼမ်းၼႃႈၵႂႃႇ၊ ပေႃးထိုင်ပၢင်ၵုမ်လူင်ပွၵ်ႈၵမ်းသွင်မႃး ၸင်ႇတေၶွတ်ႇၽွတ်ႈ မုၵ်ႉၸုမ်းတႄႉတႄႉ။ ၵဵဝ်ႇၵပ်းလူၺ်ႈလၵ်းသုတ်ႇၵၢၼ်သွၼ်ႁဵၼ်းၼၼ်ႉ ၵူၼ်းမိူင်းတင်း သင်ၶၸဝ်ႈ တေႁူမ်ႈ ၵၼ်သေ ႁဵတ်းသၢင်ႈၵႂႃႇ ဝႃႈၼႆ။

ၸဝ်ႈသိုၵ်းလူင် လႅင်းသႂ် လၢတ်ႈဝႃႈ “ တွၼ်ႈတႃႇတွင်ႉၸဝ်ႈၵဝ်ႇတႄႉဢမ်ႇမႆႈၸႂ် ၵူၺ်းၵႃႈဢၼ်ပဵၼ်တွၼ်ႈတႃႇၵူၼ်းတင်း ၼမ်တႄႉ ပဵၼ်ဢၼ်မႆႈၸႂ် လွင်ႈဢၼ်ၼႆႉတႄႉ ၵွပ်ႈႁဝ်းမီးလၢႆမူႇလၢႆၸုမ်း ၸႅၵ်ႇၵၼ်ပဵၼ်ၸိူင်ႉၼႆမႃး ၽိူဝ်ႇႁဝ်းဢေႇ ႁဝ်း သမ်ႉၸႅၵ်ႇၵၼ် ပဵၼ်ၸႂ်ဢမ်ႇလီတႄႉ ဢၼ်ႁဝ်းၸႅၵ်ႇၵၼ်ၼႆႉ ယွၼ်ႉပိူဝ်ႈတၢင်းႁၼ်ထိုင်ႁဝ်းဢမ်ႇမိူၼ်ၵၼ်၊ ယွၼ်ႉပိူဝ်ႈ ပၢႆးပၺ်ၺႃႁဝ်း ဢမ်ႇၶဝ်ႈၵၼ်၊ ပၢႆးမၢၵ်ႈမီးႁဝ်းၵေႃႈ ဢမ်ႇၶဝ်ႈၵၼ်ၸိူဝ်းၼႆႉ မိူဝ်းၼႃႈမႃး ဢမ်ႇၶႂ်ႈႁႂ်ႈမၼ်းပဵၼ်ၸိူင်ႉၼႆ။ ၶႂ်ႈႁႂ်ႈပၢႆးပၺ်ၺႃႁဝ်းမိူၼ်ၵၼ်၊ တၢင်းႁၼ်ထိုင်ႁဝ်းမိူၼ်ၵၼ်၊ ပၢႆးမၢၵ်ႈမီးႁဝ်းၵေႃႈႁႂ်ႈလႆႈၶဝ်ႈဢွၵ်ႇၵၼ် ၸဵမ်ၸိူဝ်းၼႆႉ” ဝႃႈၼႆ။

ယိူင်းဢၢၼ်းတႃႇၸုမ်းပၢႆးပၺ်ၺႃ ၸိူဝ်ႉၸၢတ်ႈတႆးဢၼ်မုင်ႈမွင်းမိူဝ်းၼႃႈ တင်းမူတ်းမီးဝႆႉ 3 ၶေႃႈ – 1) ငဝ်ႈငုၼ်းပၢႆးပၺ် ၺႃ ဢၼ်ၵွင်ႉ သၢၼ်ၵူႈမူႇၵူႈၸုမ်း၊ 2) ငဝ်ႈငုၼ်းပၢႆးပၺ်ၺႃ ဢၼ်တၢင်တူဝ်ၸိူဝ်ႉၸၢတ်ႈတႆး၊ 3) ႁႂ်ႈပဵၼ်တီႈတမ်းပိူင်ပၢႆး ပၺ်ၺႃ ၸိူဝ်ႉၸၢတ်ႈ တေႃႇထိုင်ၵၢၼ်ပူၵ်းပွင်ၵူႈၾၢႆႇၾၢႆႇ ၸဵမ်ၸိူဝ်းၼႆႉ။

ပၢင်ၵုမ် ႁူမ်ႈသၢင်ႈတႃႇပၢႆးပၺ်ၺႃ ၸိူဝ်ႉၸၢတ်ႈတႆး တေၸတ်းႁဵတ်းထႅင်ႈပွၵ်ႈၵမ်း 2 ၼႂ်းဝၼ်း 24-25/8/2019 တီႈဝတ်ႉ ဝေႇလုဝၼ်ႇ ဝဵင်းတူၼ်ႈတီး ဝႃႈၼႆ။