သင်ၶၸဝ်ႈလႄႈ ၵူၼ်းမိူင်းၵိုင် ႁူမ်ႈၵၼ် သၢၼ်ၶတ်း ၶွမ်ႊပၼီႊမႂ်ႇဢၼ်တေမႃးၶုတ်းထၢၼ်ႇႁိၼ်ထႅင်ႈ

သင်ၶၸဝ်ႈလႄႈ ၵူၼ်းမိူင်းၵိုင် ဢုပ်ႇဢူဝ်းတွင်ႈထၢမ်သဵင်ၵၢင်ၸႂ်ၵၼ်သေ ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇ သၢၼ်ၶတ်း ၶွမ်ႊပၼီႊမႂ်ႇဢၼ်တေမႃးၶုတ်းထၢၼ်ႇႁိၼ် တီႈၼႂ်းဢိူင်ႇဝၢၼ်ႈယၢတ်ႇ ၶၢမ်းၼႃးၼၼ်ႉ ဝႃႈၼႆ။

ဝၼ်းတီႈ 9/6/2019 ယၢမ်းဝၢႆးဝၼ်း 1:10 မူင်းထိုင် 2:49 မူင်း သင်ၶၸဝ်ႈလႄႈ ၵူၼ်းမိူင်းၵိုင် မွၵ်ႈ 500 ၵေႃႉ ႁူပ်ႉထူပ်း ဢုပ်ႇဢူဝ်းၵၼ် တီႈဝတ်ႉဢွင်ႇမင်ႇၵလႃႇ/ ၵျွင်းလွႆလႅင် ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ဢုပ်ႇဢူဝ်းၵၼ် လွင်ႈသၢၼ်ၶတ်း/ ဢမ်ႇႁၼ်လီ ဢၼ်တေမႃးၶုတ်းထၢၼ်ႇႁိၼ် တီႈဢိူင်ႇဝၢၼ်ႈယၢတ်ႇ ၶၢမ်းၼႃးၼၼ်ႉ။ ယွၼ်ႉ ဝႃႈ မၼ်းတေတုမ်ႉတိူဝ်ႉသူၼ်ႁႆႈၼႃးလႄႈ လွင်ႈယူႇသဝ်းၵိၼ်သၢင်ႈၵူၼ်းမိူင်း ၸဵမ်ၸိူဝ်းၼႆႉ။

ၸဝ်ႈၶူး သေႃးတေႇယ မိူင်းၵိုင် လုၵ်ႈႁဵၼ်းၸၼ်ႉၸွမ်မႁႃၸုလႃးလူင်းၵွၼ်း Ph.D မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၶဝ်ၶုတ်းထၢၼ်ႇႁိၼ်ၼႆႉ မၼ်းတုမ်ႉတိူဝ်ႉႁူဝ်ၼမ်ႉႁဝ်း ၼႃးၵေႃႈတေၵွႆမူတ်း ယွၼ်ႉဝႃႈ တၵ်ႉၵႃႇႁဝ်း တီႈမိူင်းၵိုင်ၼႆႉ ပဵၼ်ၵူၼ်းႁဵတ်းသူၼ်ႁဵတ်းၼႃး။ ပေႃးပွႆႇပႅတ်ႈၼႃးၵေႃႈ ၵူၼ်းမိူင်းၵိုင်ႁဝ်းၼႆႉ တေဢမ်ႇမီးဢၼ်လဵင်ႉတွင်ႉယဝ်ႉ။ ၵွပ်ႈၼႆ လႄႈ ႁဝ်းႁႃးသြႃႇတၵ်ႉၵႃႇၸင်ႇၽွမ်ႉလႆႈၸႂ်ၵၼ်သေ တေသၢၼ်ၶတ်းၵႂႃႇတိၵ်းတိၵ်း၊ တေဢမ်ႇပၼ်ၽႂ်မႃးၶုတ်း တီႈၼႂ်းဢိူင်ႇဝၢၼ်ႈယၢတ်ႇ ၶၢမ်းၼႃးႁဝ်းၼႆႉ” ဝႃႈၼႆ။

ၵဵဝ်ႇၵပ်းၵၢၼ်ၶုတ်းထၢၼ်ႇႁိၼ်တီႈဢိူင်ႇဝၢၼ်ႈယၢတ်ႇ ၶၢမ်းၼႃးၼႆႉ သင်ၶၸဝ်ႈတူင်ႇဝဵင်းမိူင်းၵိုင် တင်းၵူၼ်းမိူင်းၵိုင် ႁူမ်ႈ ၵၼ်သၢၼ်ၶတ်းမႃးတႃႇသေႇ။

ၸဝ်ႈၶူးသေႃးတေႇယ သိုပ်ႇလၢတ်ႈဝႃႈ “ ၵူၼ်းမိူင်းႁဝ်းၵေႃႈ ၽွမ်ႉလႆႈၸႂ်တႃႇတေလုၵ်ႉၼႄၵၢင်ၸႂ်ထႅင်ႈ။ မိူဝ်ႈဢွၼ်တၢင်း ၼၼ်ႉၵေႃႈ ႁဵင်းမဵတ်ႉတႃႇၶွမ်ႊပၼီႊမႃးၶုတ်းယဝ်ႉၵမ်းၼိုင်ႈ ႁဝ်းၸဝ်ႈၶဝ် ပၼ်သတိၶဝ်လၢႆလၢႆၵမ်းယူႇ။ ၶဝ်ဢမ်ႇသႂၢင်းၵိၼ် လႄႈ ႁဝ်းၸဝ်ႈၶဝ် တင်းၵူၼ်းမိူင်းၵေႃႈလုၵ်ႉၼႄၵၢင်ၸႂ်ၼၼ်ႉၼႃႇ။ တီႈဢိူင်ႇဝၢၼ်ႈယၢတ်ႇၼႆႉတႄႉ ၸုမ်းလႂ်ၶႂ်ႈမႃးမႃး ပုၼ်ႈ တႃႇၵူၼ်းမိူင်းလႄႈ သင်ၶၸဝ်ႈတႄႉ တိုၼ်းတေသၢၼ်ၶတ်းၵႂႃႇတိၵ်းတိၵ်း လွင်ႈၶုတ်းထၢၼ်ႇၼႆႉ” ဝႃႈၼႆ။

လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ပေႃးဢဝ် သၽႃႇဝမၼ်းဝႃႈတႄႉ ဢမ်ႇလီပၼ်ၶုတ်း ၵူၺ်းၼႃႇ ပေႃးမၼ်းပဵၼ်ၽွၼ်းလီတႃႇမိူင်းတႆးယူႇ၊ ပေႃးမီးလၢႆးၵႄႈၶႆၽွၼ်းႁၢႆႉ မၼ်းယူႇၸိုင်၊ ပေႃးမီးၽွၼ်းလီၼမ်လိူဝ်ၽွၼ်းႁၢႆႉၸိုင်၊ တိူၵ်ႈၶမ်းႁဝ်းၼႆႉ ဢမ်ႇပိုတ်ႇဢမ်ႇဝႃႈ တေပိုတ်ႇယူႇ ၶႃႈလၢတ်ႈ ဝႆႉၸိူင်ႉၼၼ်။ ပေႃးပိုတ်ႇတေႃႈလဵဝ်ၼႆႉ တေၶဝ်ႈထွင်းပိူၼ်ႈၵူၺ်း။ တႆးႁဝ်းတေဢမ်ႇလႆႈၸၢမ်ႇပူၺ်ႈၼမ်” ဝႃႈၼႆ။

ၸဝ်ႈၶူး သေႃးတေႇယ လၢတ်ႈဝႃႈ “ ဝၢႆးလင်ႁဵင်းမဵတ်ႉတႃႇၵႂႃႇယဝ်ႉ ဢၼ်တေမႃးၶုတ်းယၢမ်းလဵဝ် ပဵၼ်ဢူးဢၢႆႈၶဵဝ်ႇ/ သျူဝ်ႇ” ဝႃႈၼႆ။

ဢိင်ၼိူဝ်ၵူၼ်းမိူင်းၵိုင်ဝႃႈ ပဵၼ်ၸုမ်းသိုၵ်းတႆးယူႇၵမ်ႉလင်ၸွႆႈထႅမ်ၼႆသေ လုင်းၸၢႆးလူင်လၢတ်ႈၼႄၼင်ႇၼႆ။

“ၵဵဝ်ႇၵပ်းလွင်ႈၶုတ်းထၢၼ်ႇႁိၼ်တီႈမိူင်းၵိုင်ၼႆႉ ၵၢင်ၸႂ်ၼိူဝ်လွႆ ၶႂ်ႈမီးၶႂ်ႈပဵၼ်ၼၼ်ႉ ဢမ်ႇလူဝ်ႇပွႆႇႁဵတ်းႁႂ်ႈမၼ်းသုၵ်ႉၸိူင်ႉၼႆ။ ၶဝ်လူဝ်ႇပၢင်းသင်ၶၸဝ်ႈႁဝ်းၶဝ် လီလီငၢမ်းငၢမ်းသေ ၵႂႃႇသပ်းလႅင်းၼႄၵၼ်လီလီငၢမ်းငၢမ်းၼိူဝ်လွႆၼၼ်ႉ။ ၵႂၢမ်းတႆးၼင်ႇၵၼ် ၶႃႈထၢင်ႇတႄႉ မၼ်းပွင်ႇၸႂ်ၼင်ႇၵၼ်ယူႇၶႃႈ။ ပေႃးဢမ်ႇၼၼ် သင်ၶၸဝ်ႈလႄႈ ၵူၼ်းမိူင်း တင်းတပ်ႉသိုၵ်းႁဝ်းၼႆႉ တေၸႂ်ပိူင်ႈၼိူဝ်ၵၼ် ႁၼ်ၽိတ်းၵၼ် ၸင်းၵၼ်ၵႂႃႇတိၵ်းတိၵ်းၼႆ မၼ်းဢမ်ႇလီ” ဝႃႈၼႆ။

ဝၼ်းတီႈ 11/6/2019 ၼၼ်ႉ ယူႇတီႈသင်ၶၸဝ်ႈလႄႈ ၵူၼ်းမိူင်းၵိုင် ႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ ႁႄႉႁၢမ်ႈသၢၼ်ၶတ်း ၵူၼ်းၶုတ်းထၢၼ်ႇႁိၼ် တီႈၼႂ်းဢိူင်ႇဝၢၼ်ႈယၢတ်ႇ ၶၢမ်းၼႃး 3 ၶေႃႈ။

“မူႇလႂ်ၸုမ်းလႂ် ၽႂ်သေဢမ်ႇဝႃႈ ပေႃးမႃးယႃႉလူႉ သၽႃႇဝၼမ်ႉလိၼ်ႁိၼ်ၽႃ တိူၵ်ႇႁႆႈသူၼ်ၼႃးလႄႈ မႃးၶုတ်းထၢၼ်ႇႁိၼ် ပေႃးၼႆၸိုင် သင်ၶၸဝ်ႈလႄႈ ၵူၼ်းမိူင်း တိုၼ်းတေသၢၼ်ၶတ်းႁႄႉႁၢမ်ႈၵႂႃႇၶိူဝ်းၶိူဝ်းယႂ်းယႂ်း”။

“သင်ဝႃႈ ဢမ်ႇႁၼ်ထိုင်ၵၢင်ၸႂ် သင်ၶၸဝ်ႈလႄႈ ၵူၼ်းမိူင်းသေ သိုပ်ႇၶုတ်းထၢၼ်ႇႁိၼ်ၵႂႃႇပေႃးၼႆ သင်ၶၸဝ်ႈလႄႈ ၵူၼ်းမိူင်း တိုၼ်းတေဢမ်ႇယွမ်းႁပ်ႉလႆႈ တိုၼ်းတေယူႇၼႂ်းၶႂၢင်ႇပၵ်းပိူင်သေ သိုပ်ႇႁႄႉႁၢမ်ႈသၢၼ်ၶတ်းၵႂႃႇယူႇ”။

မိူဝ်ႈဝၼ်းတီႈ 11/4/2017 ၼၼ်ႉ သင်ၶၸဝ်ႈတင်းၵူၼ်းမိူင်း ၼပ်ႉႁူဝ်ႁဵင် ႁူမ်ႈၵၼ် လုၵ်ႉႁိုၼ်ႇၼႄၵၢင်ၸႂ် သၢၼ်ၶတ်း လွင်ႈၶုတ်းထၢၼ်ႇႁိၼ် ၼႂ်းၸႄႈဝဵင်းမိူင်းၵိုင် ဢၼ်ၶွမ်ႊပၼီႊပျေႉဢွင်ႇႁဵင်းလႄႈ ႁဵင်းမဵတ်ႉတႃႇ လႆႈၶႂၢင်ႉၶုတ်း တီႈလူင်ပွင် ၸိုင်ႈၼေႇပျီႇတေႃႇ တႃႇတၢင်းၵႂၢင်ႈမွၵ်ႈ 1,000 ဢေႊၶိူဝ်ႊၼၼ်ႉ။ ယွၼ်ႉဝႃႈ တုမ်ႉတိူဝ်ႉသိင်ႇဝႅတ်ႉလွမ်ႉၵူၺ်းဢမ်ႇၵႃး တုမ်ႉတိူဝ်ႉပႃးပၢႆးယူႇလီၵူၼ်းမိူင်း ဝႃႈၼႆ။