သင်ၶၸဝ်ႈလႄႈၵူၼ်းမိူင်း မိူင်းၵိုင် ႁူမ်ႈၵၼ်ၼႄၵၢင်ၸႂ်တေႃႇၶွမ်ႊပၼီႊ တုၵ်းယွၼ်းႁႂ်ႈၵိုတ်းၵၢၼ်ၶုတ်းထၢၼ်ႇႁိၼ် ဢၼ်မီးတီႈၼႂ်းဢိူင်ႇဝၢၼ်ႈယၢတ်ႇ ၶၢမ်းၼႃးၼၼ်ႉ ဝႃႈၼႆ။

ဝၼ်းတီႈ 7/7/2019 ယၢမ်းၵၢင်ၼႂ် 9 မူင်း သင်ၶၸဝ်ႈလႄႈ ၵူၼ်းမိူင်း မိူင်းၵိုင် ၵူၺ်းဢမ်ႇၵႃး ႁူမ်ႈပႃးပီႈၼွင်ႉၼမ်ႉမႃႉ၊ သီႇပေႃႉ၊ ၵျွၵ်ႉမႄး၊ ၼမ်ႉလၼ်ႈ၊ ၵေးသီး၊ မွၵ်ႇတွင်း လႄႈ လၢႆးၶႃႈ မႃးၶဝ်ႈႁူမ်ႈၸွမ်း ႁူဝ်ၵူၼ်းႁိမ်း 4,000 ၵေႃႉ။ ႁူမ်ႈၵၼ် ပႆတၢင်းၼႄၵၢင်ၸႂ် တေႃႇၶွမ်ႊပၼီႊဢူးဢၢႆႈသျူဝ်ႇ/ ၶဵဝ်ႇ ဢၼ်တိုၵ်ႉၶုတ်းထၢၼ်ႇႁိၼ်တီႈဢိူင်ႇဝၢၼ်ႈယၢတ်ႇ ၶၢမ်းၼႃး ၸႄႈဝဵင်းမိူင်းၵိုင်ၼၼ်ႉ ႁႂ်ႈၵိုတ်းပႅတ်ႈၵၢၼ်ၶုတ်းထၢၼ်ႇႁိၼ် ဝႃႈၼႆ။

ၸဝ်ႈၶူး သေႃးတေႇယ မိူင်းၵိုင် လုၵ်ႈႁဵၼ်းၸၼ်ႉၸွမ်မႁႃၸုလႃးလူင်းၵွၼ်း Ph.D မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၸဝ်ႈၶဝ်လႄႈ ၵူၼ်းမိူင်း ႁူမ်ႈၵၼ်ၼႄၵၢင်ၸႂ်ၼႆႉ ၵွပ်ႈပိူဝ်ႈဝႃႈ ပေႃးၶုတ်းထၢၼ်ႇႁိၼ်ၼႆ မိူင်းႁဝ်းၼႆႉ ပဵၼ်မိူင်း ႁဵတ်းၵိၼ်ႁႆႈသူၼ်ၼႃးၵူၺ်း ၸဵမ်မိူဝ်ႈပၢၼ်ပူႇမွၼ်ႇပူၼ်ႉမႃးယဝ်ႉ ဢၼ်တီႈၶဝ်ၶုတ်းထၢၼ်ႇႁိၼ်ၼႆႉသမ်ႉ ၺႃးတီႈႁူဝ် ၼမ်ႉမိူင် ပေႃးယဝ်ႉတီႈၼႆႈသေဢမ်ႇၵႃး ၶဝ်သမ်ႉတေၵႂႃႇၶုတ်းထႅင်ႈတီႈႁူဝ်ၼမ်ႉတဵင်း။ ပေႃးဝႃး ၶဝ်ၶုတ်းထၢၼ်ႇႁိၼ် တီႈႁူဝ်ၼမ်ႉမိူင်ၼႆႉၵူၺ်း ႁူဝ်ႁႆႈၶႅင်းၼႃး ၼပ်ႉႁူဝ်ႁဵင်ဢေႊၶိူဝ်ႊမၼ်းတေၵွႆမူတ်းယဝ်ႉ။ ဝၢႆးၼၼ်ႉမႃး ၶွမ်ႊပၼီႊသမ်ႉ တေၶဝ်ႈမႃးထႅင်ႈ ၸုမ်းၼိုင်ႈယဝ်ႉ ၸုမ်းၼိုင်ႈ ႁူဝ်ၼမ်ႉတဵင်းႁဝ်းၸိူဝ်းၼႆႉၵေႃႈတေၵွႆးမူတ်း ၸဝ်ႈႁႆႈၸဝ်ႈၼႃး ၼႂ်းမိူင်း ၵိုင်ႁဝ်းၵေႃႈ တေဢမ်ႇၸၢင်ႈႁဵတ်းၵိၼ်ၵၢၼ်သင်ယဝ်ႉ ၵွပ်ႈပိူဝ်ႈမိူင်းႁဝ်းၼႆႉ တေပဵၼ်ၵွင်ႉ ပဵၼ်ယၢင်ပႅတ်ႈ ၸႂ်ႉၵေႃႈ တေဢမ်ႇလႆႈသေ တေၸၢင်ႈထူပ်းၽေးၼႆလႄႈ ႁဝ်းၶႃႈ သင်ၶၸဝ်ႈလႄႈ ၵူၼ်းမိူင်းၵိုင် ႁၼ်ထိုင်ဝႃႈ မၼ်းတေၸၢင်ႈ ထူပ်းၽေးၼႆသေ ၸင်ႇႁူမ်ႈၵၼ်လုၵ်ႉၼႄၵၢင်ၸႂ်ၵႂႃႇ” ဝႃႈၼႆ။

ပၢင်ၼႄၵၢင်ၸႂ်ၼႆႉ လုၵ်ႉဢဝ်တီႈ ပၢင်ႇထၢတ်ႈၵွင်းမူးမူၺ်ႇတေႃႇမိူင်းၵိုင် ပႆတၢင်းၼႄၵၢင်ၸႂ် တေႃႇထိုင်ႁူဝ်ၶူဝ်ၼမ်ႉတဵင်း လွႆပူႇတၢဝ်ႉ တၢင်းၵႆတေမီးမွၵ်ႈ 2 လၵ်း။ တုၵ်းယွၼ်းႁႂ်ႈၵိုတ်းၵၢၼ်ၶုတ်း ထၢၼ်ႇႁိၼ်။ လိူဝ်ၼၼ်ႉ ယိုၼ်ႈလိၵ်ႈတီႈလုမ်း ၾၢႆႇပႃႇမႆႉထႅင်ႈ ဝႃႈၼႆ။

ၸၢႆးလူင် ၵူၼ်းမိူင်းၵိုင် ၽူႈဢွၼ်ႁူဝ်တူင်ႉၼိုင်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈဢၼ်ႁဝ်းၶႃႈ သၢၼ်ၶတ်း ၵၢၼ် ၶုတ်းထၢၼ်ႇႁိၼ်ၼႆႉ ယွၼ်ႉဝႃႈမၼ်းတေပဵၼ်ၽေး မိူၼ်ၼင်ႇ လုၵ်းထၢၼ်ႇႁိၼ်ၼႆႉ လုၵ်းမၼ်းတေလိုၵ်ႉၵႂႃႇၵႂၢင်ႈၵႂႃႇ။ ၼမ်ႉတေႁႅင်ႈ ၵွပ်ႈပိူဝ်ႈဝႃႈ တီႈလုၵ်းဢၼ်ၶဝ်ၶုတ်းထၢၼ်ႇႁိၼ်ၼႆႉ ယၢၼ်ၵၼ်တင်းဝဵင်းမွၵ်ႈ 3 လၵ်းၵူၺ်း မၼ်းသမ်ႉ ပဵၼ်ၾၢႆႇၼိူဝ်ၼႃး၊ ၼိူဝ်ၼမ်ႉတဵင်းႁဝ်း ၸိူဝ်းၼႆႉသေ ၵူဝ်ၼမ်ႉၸႂ်ႉၼႂ်းၼႃး၊ ၼႂ်းသူၼ်ႁႅင်ႈၵႂႃႇသေ ၵူဝ်ႇၽုၵ်ႇဢမ်ႇလႆႈ ၼမ်ႉၵေႃႈတေပဵၼ်ၵွင်ႉၵႂႃႇ ၸဵမ်ၸိူဝ်းၼႆႉ။ ၵူဝ်ၵွင်ႉထၢၼ်ႇႁိၼ်ၼႆႉ ၶဝ်ႈၵႂႃႇၼႂ်းတူဝ်ၵူၼ်းႁဝ်း ၵူဝ်ၵူၼ်းမိူင်းႁဝ်း လႆႈပဵၼ် မိူၼ်ၼင်ႇ ပီႈၼွင်ႉသီႇၵိပ်ႇ ပၢင်လွင်းလႄႈ ၼမ်ႉမႃႉမွၵ်ႇ တွင်း တီႈသီႇပေႃႉလႃႈသဵဝ်ႈၼၼ်ႉ တီႈၼၼ်ႈ ၵူၼ်းထဝ်ႈ ဢႃယု 50 ၶိုၼ်ႈၼိူဝ် ပေႃးၵႂႃႇယူႇႁိမ်းၸမ်မေႃႇၶုတ်း ထၢၼ်ႇႁိၼ် ၶဝ်ၼၼ်ႉၸိုင် ထူၺ်ႈၸႂ်ယၢပ်ႇ၊ ၸႂ်ၵပ်ႉ ၸဵမ်ၸိူဝ်းၼႆႉ။ ယွၼ်ႉ ၼၼ်လႄႈ ႁဝ်းၶႃႈ ၵူၼ်းမိူင်း ၸင်ႇႁူမ်ႈၵၼ် သၢၼ်ၶတ်း ၶွမ်ႊပၼီႊ ယႃႇႁႂ်ႈၶုတ်း ႁႂ်ႈၵိုတ်းယင်ႉပႅတ်ႈသေၵမ်း” ဝႃႈၼႆ။

ၸဝ်ႈၶူး သေႃးတေႇယ မိူင်းၵိုင် လုၵ်ႈႁဵၼ်းၸၼ်ႉၸွမ်မႁႃၸူးလႃးလူင်းၵွၼ်း Ph.D မိူင်းၵွၵ်ႇ လၢတ်ႈဝႃႈ “ ၶႂ်ႈႁႂ်ႈၾၢႆႇဢုပ်ႉ ပိူင်ႇလူင်ပွင်ၸိုင်ႈလႄႈသင်၊ ၾၢႆႇသိုၵ်းတႆး လႄႈသင် ႁႂ်ႈၸီႉသင်ႇပၼ်တူတ်ႈတၢမ်ႇၶွမ်ႊပၼီႊ ဢၼ်တေၶိုင်ဢၢင်ႈၶုတ်း ထၢၼ်ႇႁိၼ်ၸိူဝ်းၼႆႉဝႆးဝႆး ၶူဝ်းၶဝ်ၵေႃႈႁႂ်ႈသိမ်းဢဝ်ၵႂႃႇမူတ်းမူတ်း” ဝႃႈၼႆ။
လိူဝ်ၼၼ်ႉ မိူဝ်ႈဝၼ်းတီႈ 7/7/2019 ၼၼ်ႉ ပီႈၼွင်ႉတႆးႁွတ်ႈမိူင်းၵွၵ်ႇ (ၵုင်းထဵပ်ႈ) ၸိုင်ႈထႆးၵေႃႈ ႁူမ်ႈၵၼ်ဢွၵ်ႇၼႄၵၢင် ၸႂ် သၢၼ်ၶတ်းၵၢၼ်ၶုတ်းထၢၼ်ႇႁိၼ် တီႈမိူင်းၵိုင်ၼႆႉၼင်ႇၵဝ်ႇ ဝႃႈၼႆ။

ၾၢႆႇၶွမ်ႊမၼီႊ Nobel Global ဢူးဢၢႆႈသျူဝ်ႇ တႄႉလၢတ်ႈဝႃႈ “ၵူၼ်းပိုၼ်ႉတီႈၼႂ်းဢိူင်ႇဝၢၼ်ႈယၢတ်ႇ ၶၢမ်းၼႃး လူင်းလၢႆးမို ဝ်းတူၵ်းလူင်း ပၼ်တႃႇတေၶုတ်း ထၢၼ်ႇႁိၼ်။ လိူဝ်ၼၼ်ႉ လူင်ပွင်ၸိုင်ႈၵေႃႈ ပၼ်ဢၼုၺၢတ်ႈၶႂၢင်ႉတႃႇတေၶုတ်းထၢၼ်ႇ ႁိၼ်ယဝ်ႉ တေဢၢင်ႈၶုတ်းထၢၼ်ႇႁိၼ်မွၵ်ႈ 200 ဢေႊၶိူဝ်ႊ မိူဝ်ႈလဵဝ်လႆႈၶုတ်းဝႆႉ ၼွင်သၢမ်ဢၼ် တႃႇတေ ၸႅတ်ႈၼမ်ႉ” ဝႃႈၼႆ။

တီႈမိူင်းၵိုင်ၼႆႉ မိူဝ်ႈပူၼ်ႉမႃး 2017 ၼၼ်ႉ ၶွမ်ႊမၼီႊပျေႉဢွင်ႇႁဵင်းလႄႈႁဵင်းမဵတ်ႉတႃႇ မႃးၶိုင်ဢၢင်ႈ ၶုတ်းထၢၼ်ႇႁိၼ် ၼႂ်းပႃႇပႅၵ်ႇၵူၼ်းမိူင်း ဢၼ်ၵႂၢင်ႈမွၵ်ႈ 1000 ဢေႊၶိူဝ်ႊ။ သင်ႇၶၸဝ်ႈလႄႈ ၵူၼ်းမိူင်း မိူင်းၵိုင် ႁူမ်ႈၵၼ်ၼႄၵၢင်ၸႂ်သၢၼ် ၶတ်းသေ ၶွမ်ႊပၼီႊၵိုတ်းၵၢၼ်ၶုတ်းထၢၼ်ႇႁိၼ်ၵႂႃႇမိူဝ်ႈပီ 2018 ။ ၵူၺ်းၵႃႈပီ 2019 ၼႆႉ ၶွမ်ႊမၼီႊပျေႉဢွင်ႇႁဵင်း၊ ႁဵင်း မဵတ်ႉတႃႇလႄႈ Nobel Global ႁူမ်ႈၵၼ်သေ ၶိုင်ဢၢင်ႈမႃးၶုတ်းထႅင်ႈ။