တီႈပၢင်ပွႆးဝၼ်းဢဝ်ငမ်းယဵၼ် ၶွပ်ႈတဵမ် 30 ပီၼၼ်ႉ ႁူဝ်ပဝ်ႈတပ်ႉသိုၵ်းမိူင်းလႃး ၸဝ်ႈၸၢႆးလိုၼ်းလၢတ်ႈဝႃႈ ၼႃႈလိၼ် ၶိုၵ်ႉတွၼ်းမၢႆ 4 ၼႆႉ တေတုၵ်းယွၼ်းႁႂ်ႈပဵၼ်ၼႃႈလိၼ်ၽွင်းငမ်းတူဝ်ၵဝ်ႇ ၸၢဝ်းၶိူဝ်း ဝႃႈၼႆ။
ပၢင်ပွႆးဝၼ်းဢဝ်ငမ်းယဵၼ်ၶွပ်ႈတဵမ် 30 ပီၼႆႉ ၸတ်းႁဵတ်းၼႂ်းဝၼ်းတီႈ 30/6/2019 မီးၽူႈတၢင်တူဝ် ပႃႇတီႇၵၢၼ်မိူင်း၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ လူင်ပွင်ၸိုင်ႈ၊ တပ်ႉမတေႃႇ လႄႈ ၸုမ်းတူင်ႉၼိုင်တူင်ႇဝူင်းၵူၼ်းဢိၵ်ႇပႃး ၵူၼ်းမိူင်းတႆး တီႈၸမ်ၵႆ ၶဝ်ႈႁူမ်ႈတင်းၼမ်။
ၸဝ်ႈၸၢႆးလိုၼ်း ႁူဝ်ပဝ်ႈလူင် ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး မွၵ်ႇလၢတ်ႈၶေႃႈၵႂၢမ်းတီႈပၢင်ၵႅဝ်ႈၼၼ်ႉဝႃႈ “ ၼႂ်းၶၵ်ႉ ၵၢၼ်လွင်ႈငမ်းယဵၼ်လႄႈ မႄးလီၶိုၼ်းၼႂ်းၸိူဝ်ႉၸၢတ်ႈၼႆႉ ဢိင်ၼိူဝ်ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 သေ ပေႃးလႆႈ ၶေႃႈတူၵ်းလူင်း NCA ယဝ်ႉ ၸင်ႇလုၵ်ႉဢဝ်တီႈပၢင်ဢုပ်ႇဢူဝ်းၵၢၼ်မိူင်းသေ တေပႆၸွမ်းသဵၼ်ႈတၢင်းလွင်ႈငမ်းယဵၼ် ဢၼ်မၼ်ႈၵိုမ်းယိုၼ်းယၢဝ်းၵႂႃႇ တေဝူၼ်ႉသွၼ်ႇပႃး ငဝ်းလၢႆးၵူႈၸုမ်းၸုမ်း တေဢုပ်ႇဢူဝ်း ၸွမ်းၵူႈၾၢႆႇၾၢႆႇသေ တေၶဝ်ႈ ပႃးၼႂ်းၶၵ်ႉၵၢၼ်လွင်ႈငမ်းယဵၼ်လႄႈ တေႁဵတ်းသၢင်ႈၵႂႃႇတႃႇၼႃႈလိၼ်ႁဝ်းၶႃႈ ႁႂ်ႈလႆႈလွင်ႈငမ်းယဵၼ် ဢၼ်မၼ်ႈၵိုမ်း ဢၼ်မီးလွင်ႈႁပ်ႉႁွင်း တေၶတ်းၸႂ်ႁႂ်ႈၼႃႈလိၼ်ၶိုၵ်ႉတွၼ်းမၢႆ 4 ၼႆႉ ႁႂ်ႈပဵၼ်ၼႃႈလိၼ် ၽွင်းငမ်းတူဝ်ၵဝ်ႇၸၢဝ်းၶိူဝ်း ဢၼ် ၶိုၼ်ႈယႂ်ႇမႂ်ႇသုင်ၵတ်းယဵၼ်၊ တေၶတ်းၸႂ်ႁႂ်ႈပဵၼ်မႃးၼႃႈလိၼ် လူင်ပွင်ၸိုင်ႈလႄႈ ၵူႈမိူင်းမိူင်းမၵ်းမၼ်ႈၼၼ်ႉၶႃႈဢေႃႈ” ဝႃႈၼႆ။
ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃးၼႆႉ လႆႈဢဝ်ငမ်းယဵၼ်ၵၼ်တင်း တပ်ႉသိုၵ်းလူင်ပွင်ၸိုင်ႈမၢၼ်ႈ မိူဝ်ႈဝၼ်းတီႈ 30/6/1989 မႃး တေႃႇထိုင် ဝၼ်းတီႈ 30/6/2019 ၼႆႉ ၶွပ်ႈတဵမ် 30 ပီ။
ဢူးသၢၼ်းပိူဝ်ႊ ၵႅမ်ႁူဝ်ပဝ်ႈ ၼႃႈလိၼ်ၶိုၵ်ႉတွၼ်းမၢႆ 4 လၢတ်ႈဝႃႈ “ ၸဵမ်မိူဝ်ႈဢဝ်လွင်ႈငမ်းယဵၼ်ယဝ်ႉ ၸုမ်းမိူင်းလႃးၼႆႉ ႁူမ်ႈႁွမ်းသၢင်ႈၸွမ်းလူင်ပွင်ၸိုင်ႈမႃး မိူၼ်ၼင်ႇ ၽႅၼ်ၵၢၼ်ၽဵဝ်ႈမူၺ်ႉယႃႈမဝ်းၵမ် တႃႇ 6 ပီၼႆႉၵေႃႈ လႆႈႁဵတ်းသၢင်ႈမႃး ၸဵမ်မိူဝ်ႈပီ 1989 လႄႈ ယူႇတီႈလူင်ပွင်ၸိုင်ႈသေ ပၼ်သူးရၢင်းဝလ်း ၸဝ်ႈၸၢႆးလိုၼ်းၵေႃႈ မီးမႃးယူႇ။ ႁဵတ်းသၢင်ႈႁႂ်ႈယႃႈ မဝ်းၵမ် မူၺ်ႉႁၢႆၵႂႃႇသေဢမ်ႇၵႃး မၼ်းၸဝ်ႈၼႆႉ ႁဵတ်းသၢင်ႈပၼ် တႃႇႁုၼ်ႈမုၼ်းၶိုၼ်ႈယႂ်ႇ မိူၼ်ၼင်ႇၵၢၼ်ၽုၵ်ႇသွမ်ႈ ၼႆၵေႃႈ မၢၵ်ႇၶဝ်ႈတဝ်ႈၼမ်ႉ ဢၼ်ၽုၵ်ႇတႅၼ်းယႃႈ မိူၼ်ၼင်ႇ ဢွႆႈ၊ သူၼ်ယၢင်ၸိူဝ်းၼႆႉ မၼ်းၸဝ်ႈၶတ်းၸႂ်မႃးၼင်ႇၵႃႈ ပွင်ပဵၼ်လႆႈ။ တႃႇလႆႈၾႆးၾႃႉၼႆၵေႃႈ ႁဵတ်းသၢင်ႈမႃးႁူင်းၾႆးၾႃႉတူဝ်ၵဝ်ႇ မိူဝ်ႈလဵဝ်ၼႆႉ လႅၵ်ႈလၢႆႈမႃးတႄႉတႄႉ” ဝႃႈၼႆ။
သိုပ်ႇလၢတ်ႈဝႃႈ “ မိူဝ်ႈတႄႇ ဢဝ်လွင်ႈငမ်းယဵၼ်ၼႆႉ တီႈၼႆႈပဵၼ်ဝၢၼ်ႈဢွၼ်ႇၵူၺ်း မိူဝ်ႈလဵဝ်ၼႆႉ မိူၼ်ၼင်ႇ ၵူႈၵေႃႉ လႆႈ ႁၼ်ၵၼ်ၼႆႉၶႃႈယဝ်ႉ။ ၼႂ်းၶၢဝ်းတၢင်း 30 ပီၼႆႉ ယွၼ်ႉလွင်ႈငမ်းယဵၼ်လႄႈ ၶိုၼ်ႈယႂ်ႇမႂ်ႇသုင်မႃးၵႃႈၼႆႉ လီယွင်ႈယေႃးဢဝ် ၵုင်ႇမုၼ်တႄႉတႄႉၶႃႈ” ဝႃႈၼႆ။
ဝၢႆးသေ ဢဝ်လွင်ႈငမ်းယဵၼ် ၸွမ်းတပ်ႉသိုၵ်းလူင်ပွင်ၸိုင်ႈမၢၼ်ႈယဝ်ႉ လူင်ပွင်ၸိုင်ႈသိုၵ်းမၢၼ်ႈ ဢဝ်ၸႄႈဝဵင်းမိူင်းလႃး ထုင်ႉၸႄႈဝဵင်းမိူင်းယၢင်း တွၼ်ႈၸဵင်ႇၸၢၼ်းဝၼ်းဢွၵ်ႇတင်း ထုင်ႉၸႄႈဝဵင်းမိူင်းယွင်း တွၼ်ႈၾၢႆႇဢွၵ်ႇၼၼ်ႉ မၵ်းမၼ်ႈ ပဵၼ်ၼႃႈလိၼ်ၶိုၵ်ႉတွၼ်းမၢႆ 4 ။
ၼႂ်းၼႃႈလိၼ်ၶိုၵ်ႉတွၼ်းမၢႆ 4 ၼႆႉ မီးၸၢဝ်းၶိူဝ်း 13 ၸၢဝ်းၶိူဝ်းယူႇႁူမ်ႈၸွမ်းၵၼ် ၵမ်ႈၼမ် ၸၢဝ်းၶိူဝ်းတႆးလႄႈ ၸၢဝ်းၶိူဝ်း ဢႃးၶႃႇ ယူႇသဝ်းဝႆႉတင်းၼမ် ဝႃႈၼႆ။
