ၼႃႈလိၼ်ၶိုၵ်ႉတွၼ်းမၢႆ (4) ႁိုဝ် တပ်ႉသိုၵ်းမိူင်းလႃး တေၸတ်းႁဵတ်းပၢင်ပွႆးယွင်ႈယေႃးဝၼ်းဢဝ်ငမ်းယဵၼ် ၶွပ်ႈတဵမ် 30 ပီ ၼႂ်းႁၢင်လိူၼ်ၼႆႉ။
ဝၼ်းတီႈ 30/06/2019 ယူႇတီႈတပ်ႉသိုၵ်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၸိုင်ႈတႆးပွတ်းဢွၵ်ႇၶူင်း တေၸတ်းႁဵတ်း ပၢင်ပွႆးယွင်ႈယေႃးဝၼ်းဢဝ်ငမ်းယဵၼ် ၶွပ်ႈတဵမ် 30 ပီ။ ၼႂ်းပၢင်ပွႆးၼႆႉ မွၵ်ႇထိုင်လူင်ပွင်ၸိုင်ႈ၊ တပ်ႉမတေႃႇ၊ ၸုမ်းယိပ်းၵွင်ႈ ၵၢင်ႇၸၢဝ်းၶိူဝ်းလႄႈ ၸုမ်းတူင်ႉၼိုင်တူင်ႇဝူင်းၵူၼ်း ၸဵမ်ၸိူဝ်းၼႆႉ။
သိုဝ်ႇၶၢဝ်ႇ Mongla News ဢွၵ်ႇဝႆႉဝႃႈ ၸဝ်ႈၸၢႆးလိုၼ်း ႁူဝ်ပဝ်ႈလူင် ၼႃႈလိၼ်ၶိုၵ်ႉတွၼ်းမၢႆ 4 တပ်ႉသိုၵ်းမိူင်းလႃးလၢတ်ႈ ဝႃႈ “ သင်ႇလၢတ်ႈၽူႈမီးပုၼ်းၽွၼ်း ၵူႈႁွင်ႈၵၢၼ်။ ပႃးၸဵမ်ၵေႃႉသိုၵ်း/ ၵေႃႉႁၢၼ် လွင်ႈၽိုၵ်းၽွၼ်ႉ တႃႇၼႄ ၾၢင်ႁၢင်ႈသို ၵ်းၵေႃႈ ႁႂ်ႈဝႆႉၵၢၼ်လမ်ႇလွင်ႈ။ ၽူႈမီးၼႃႈၵၢၼ်ပုၼ်းၽွၼ်းတင်းမူတ်း ႁႂ်ႈဢွၼ်ၵၼ်ႁူႉၼႃႈတီႈ ၽႂ် မၼ်းသေ ႁဵတ်းသၢင်ႈ ၵႂႃႇ။ ယဝ်ႉၵေႃႈ မိူဝ်ႈၽွင်းၶၢဝ်းပွႆးၼၼ်ႉ ၵၢၼ်ႁပ်ႉတွၼ်ႈၶႅၵ်ႇ၊ ၵၢၼ်ႁူမ်ႇလူမ်ႈ၊ ၵၢၼ်ၶၢႆၶူဝ်းလႄႈ ၵၢၼ်ၼမ်ႉ/ ၵၢၼ်ၾႆး၊ လွင်ႈသဵၼ်ႈတႃႈသၢႆတၢင်း ၸဵမ်ၸိူဝ်းၼႆႉ ယႃႇပေႁႂ်ႈမီးတီႈယူပ်ႈယွမ်းသင် ႁႂ်ႈဢွၼ်ၵၼ် သႂ်ႇၸႂ်ဝႆႉ ၼမ်ႉၼၵ်း ႁဵတ်းသၢင်ႈ ၵႂႃႇၶႅမ်ႉလႅပ်ႈလီငၢမ်း“ ဝႃႈၼႆ။
တေႃႈလဵဝ် ယူႇတီႈၽူႈမီးပုၼ်ႈၽွၼ်း ၼႂ်းၼႃႈလိၼ်ၶိုၵ်ႉတွၼ်း မၢႆ 4 ၸႄႈဝဵင်းမိူင်းလႃး ဢွၼ်ၵၼ်ႁၢင်ႈႁႅၼ်း တႃႇႁဵတ်းပွႆး ဝၼ်းၵေႃႇတင်ႈငမ်းယဵၼ် ၶွပ်ႈတဵမ် 30 ပီ။ တီႈၼႂ်းပၢင်ပွႆး ၶွပ်ႈတဵမ် 30 ပီၼႆႉ တေၼႄၾၢင်ႁၢင်ႈသိုၵ်း၊ တၢင်းၵႃႈ၊ ႁွင်ႉၵႂၢမ်း လႄႈ လဵၼ်ႈဢဵၼ်ႁႅင်း ၸိူဝ်းၼႆႉ ဝႃႈၼႆ။
တပ်ႉသိုၵ်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းတင်းတပ်ႉသိုၵ်းလူင်ပွင်ၸိုင်ႈ မၢၼ်ႈမႃး ၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ်။
ၸုမ်းမိူင်းလႃးၼႆႉ တႄႇၵိုတ်းသိုၵ်းဢဝ်ငမ်းယဵၼ် ၸွမ်းလူင်ပွင်ၸိုင်ႈသိုၵ်းမၢၼ်ႈ မိူဝ်ႈ 30/06/1989 ။ တပ်ႉၶႄႇၵဝ်ႈ ၵၢင်ႉ (ၵူဝ်းၵၢင်ႉ) ၵိုတ်းဢွၼ်တၢင်းလႄႈ လႆႈၼႃႈလိၼ်ၶိုၵ်ႉတွၼ်းမၢႆ (1)၊ ဝႃႉတၢမ်းမႃးလႄႈ လႆႈမၢႆ (2) ၊ တႆး (SSPP) လႆႈမၢႆ (3)၊ မိူင်းလႃး လႆႈပဵၼ်ၵႂႃႇၼႃႈလိၼ်ၶိုၵ်ႉတွၼ်း မၢႆ (4) ။
မိူဝ်ႈပီ 1989 ၼၼ်ႉ တပ်ႉၸုမ်းၼႂ်းပႃႇတီႇၶွမ်ႊမိဝ်ႊၼိတ်ႊမၢၼ်ႈ CPB ၽိုၼ်ႉဝၢႆႇၽၢတ်ႇဢွၵ်ႇ ၵေႃႇတင်ႈတပ်ႉၽႂ်တပ်ႉ မၼ်း။ ပဵၼ်မႃးၸုမ်းၶႄႇၵဝ်ႈၵၢင်ႉ MNDAA၊ ဝႃႉ UWSA၊ ၶၢင် NDAK ၸုမ်းမိူင်းလႃး NDAA – ESS။
