သိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇသိုပ်ႇၵိုတ်းတိုၵ်းထႅင်ႈ တႃႇၶၢဝ်းတၢင်း 2 လိူၼ် တေႃႇထိုင်လိူၼ်ဢေႃႊၵတ်ႊသ် ဝၼ်းတီႈ 31 ။

ဝၼ်းတီႈ 30/6/2019 ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ(တပ်ႉမတေႃႇ) ပိုၼ်ၽၢဝ်ႇသိုပ်ႇၵိုတ်းတိုၵ်းထႅင်ႈၾၢႆႇလဵဝ် တႄႇ ဢဝ်လိူၼ်ၵျုႊလၢႆႊ ထိုင် လိူၼ်ဢေႃႊၵတ်ႊသ် ဝၼ်းတီႈ 31။ ၵဵဝ်ႇလူၺ်ႈလွင်ႈဢၼ်သိုပ်ႇၵိုတ်းတိုၵ်းထႅင်ႈ 2 လိူၼ်ၼႆႉ ယွၼ်ႉဝႃႈ မိူဝ်ႈၽွင်းပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်မႃးၼၼ်ႉ လႆႈႁၼ်ၶၵ်ႉၵၢၼ်လွင်ႈငမ်းယဵၼ် ဢမ်ႇၵိုတ်းဢမ်ႇယင်ႉသေ သိုပ်ႇတၢမ်ႁဵတ်းသၢင်ႈၶိုပ်ႈၼႃႈမႃးလႄႈ ဝႃႈၼႆ။

ၼႂ်းၶေႃႈပိုၼ်ၽၢဝ်ႇ တပ်ႉသိုၵ်းလူင်ပွင်ၸိုင်ႈမၢၼ်ႈတႄႉ ဢွၵ်ႇဝႆႉဝႃႈ “ ၼင်ႇႁိုဝ် တေႁဵတ်းသၢင်ႈလႆႈလွင်ႈငမ်းယဵၼ်ဢၼ် ၵူၼ်းမိူင်းမုင်ႈမွင်း၊ ဢၼ်ၸုမ်းယိပ်းၵွင်ႈၵၢင်ႇၸၢဝ်ၶိူဝ်းယုမ်ႇယမ်ၼၼ်ႉ တပ်ႉသိုၵ်းတပ်ႉမတေႃႇတေၵိုတ်းတိုၵ်းထႅင်ႈ ၾၢႆႇလဵဝ်ၼႂ်းၶၢဝ်းတၢင်း 2 လိူၼ်တေႃႇထိုင် 31 လိူၼ်ဢေႃႊၵတ်ႊသ်” ဝႃႈၼႆ။

ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်ၼႆႉ တႄႇဢဝ် လိူၼ်ၻီႊသႅမ်ႊပိူဝ်ႊ ဝၼ်းတီႈ 21 ပီ 2018 ထိုင် လိူၼ်ဢေႊပရိူဝ်ႊ ဝၼ်းတီႈ 30 ပီ 2019 ၵမ်းၼိုင်ႈ။ လိူဝ်ၼၼ်ႉ သိုပ်ႇပိုၼ်ၽၢဝ်ႇၵိုတ်းတိုၵ်း တႄႇဢဝ် လိူၼ် မေႊ 2019 ထိုင် လိူၼ်ၵျုၼ်ႊ 2019 ထႅင်ႈၵမ်းၼိုင်ႈ။ ယဝ်ႉၵေႃႈ ပိုၼ်ၽၢဝ်ႇ သိုပ်ႇၵိုတ်းတိုၵ်းထႅင်ႈ တႄႇဢဝ် လိူၼ်ၵျူႊ လၢႆႊ 2019 ထိုင် လိူၼ်ဢေႃႊၵတ်ႊသ် ဝၼ်းတီႈ 31 ပီ 2019 ၼႆႉထႅင်ႈၵမ်းၼိုင်ႈ ဝႃႈၼႆ။

တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်မႃးၼႆႉ တင်းမူတ်း မီး 5 တိူင်း မိူၼ်ၼင်ႇ တိူင်းသိုၵ်း ဝၼ်းႁွင်ႇ။ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ။ တိူင်းသိုၵ်းဝၼ်းဢွၵ်ႇ။ တိူင်းသိုၵ်းဝၼ်းဢွၵ်ႇၵၢင်လႄႈ တိူင်းသိုၵ်းသၢမ်ၸဵင် ၸိူဝ်းၼႆႉ။