ပႃႇတီႇၸၢဝ်းၶိူဝ်း ၼႂ်းမိူင်းတႆး LSSEP ( 11 ပႃႇတီႇ ) ၸတ်းႁဵတ်း ပၢင်ၵုမ် ဢုပ်ႇဢူဝ်းၵၼ် ၵမ်းထူၼ်ႈ 6 ဝၢင်းၽႅၼ်တႃႇဢွင်ႇပေႉပၢင်လိူၵ်ႈတင်ႈ ပီ 2020 ဢၼ်တေထိုင်မႃးၼႆႉ။
ဝၼ်းတီႈ 19-21/06/2019 ယူႇတီႈၸုမ်းပႃႇတီႇၸၢဝ်းၶိူဝ်း ၼႂ်းမိူင်းတႆး ၸတ်းႁဵတ်းပၢင်ၵုမ် တီႈႁူင်းႁႅမ်း 21st TGI ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၊ ဢုပ်ႇဢူဝ်းဝၢင်းၽႅၼ်တႃႇပၢင်လိူၵ်ႈတင်ႈ ပီ 2020 ဢၼ်တေထိုင်မႃးၼႆႉ ။ ၽူႈၶဝ်ႈႁူမ်ႈပၢင်ၵုမ် ယူႇတီႈ 11 ပႃႇတီႇ သေသူင်ႇတူဝ်တႅၼ်းၽႂ်မၼ်း မႃးၶဝ်ႈႁူမ်ႈ 32 ၵေႃႉ ဝႃႈၼႆ။
ၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP လၢတ်ႈတီႈၽူႈတွႆႇႁွၵ်ႈဝႃႈ “ ပီ 2020 ၼႆႉ မၼ်းလမ်ႇလွင်ႈတႄႉ ႁဝ်းမႃး တူၺ်းၼႆႉ မိူဝ်ႈပီ 2015 ၼၼ်ႉ လူင်ပွင်ၸိုင်ႈမိူင်းတႆး မၼ်းဢမ်ႇၸႂ်ႈပႃႇတီႇၼႂ်းမိူင်းတႆးႁဝ်း လႆႈပဵၼ်လူင်ပွင်ၸိုင်ႈ။ ပဵၼ် ပႃႇတီႇမိူင်းမၢၼ်ႈသေ မႃးပဵၼ်လူင်ပွင်ၸိုင်ႈမိူင်းတႆးႁဝ်း။ ပေႃးတီႈတႄႉမၼ်းၼႆႉ ပႃႇတီႇတႆး ၵူၼ်း မိူင်းတႆး၊ ၵူၼ်းၸၢဝ်းၶိူဝ်းတႆး ဢၼ်ယူႇမိူင်းတႆးၼႆႉ မီးသုၼ်ႇလႆႈသုၼ်ႇပဵၼ်ပုၼ်ႈတႃႇတေဢုပ်ႉမိူင်းႁဝ်းဢိူဝ်ႈ။ ႁူဝ်ၵူၼ်း ၼႂ်းမိူင်းတႆးႁဝ်း မီး 5 လၢၼ်ႉပၢႆၼႆႉ ႁူဝ်ၵူၼ်းတႆးႁဝ်း 2 လၢၼ်ႉပၢႆၶိုင်ႈ ဢမ်ႇမီးလူး။ ၵွပ်ႈပိူဝ်ႈၼႆ ၵူၼ်းၸၢဝ်းၶိူဝ်း ဢွၼ်ႇႁဝ်း ၸိူဝ်းၼႆႉ ႁဝ်းလူဝ်ႇႁူမ်ႈႁွမ်းၵၼ်ဢိူဝ်ႈၼႆ ႁဝ်းၸင်ႇတေသူၼ်းတုမ်ပႃႇတီႇၸၢဝ်းၶိူဝ်းဢွၼ်ႇ ၼႂ်းမိူင်းတႆးႁဝ်း တင်းမူတ်း 11 ပႃႇတီႇ” ဝႃႈၼႆ။
လုင်းၸၢႆးဢၢႆႈပဝ်းလၢတ်ႈဝႃႈ ဢုပ်ႇဢူဝ်းတႃႇႁႃၽူႈတၢင်တူဝ်ပႃႇတီႇတႆးသေ ၶဝ်ႈႁႃႁူၺ်းသူၼ်း ၸၢဝ်းၶိူဝ်းၼႂ်းမိူင်းတႆး မိူၼ်ၼင်ႇ တႆး၊ ပဢူဝ်း၊ ထၼု၊ ဢၢင်းသႃး၊ ၵူဝ်းၵၢင်ႉသေ ႁႂ်ႈလႆႈသဵင် လႆႈၶႅပ်းမႄး ။ ၼႂ်းပီ 2020 ၼႆႉတႃႇတွတ်ႈၶႅပ်းၵၢင်ၸႂ်သေလႅၵ်ႈလၢႆႈၾၢင်ႁၢင်ႈမိူင်းႁူမ်ႈတုမ်ၼႆႉ ပဵၼ်ပုၼ်ႈၽွၼ်းၵူၼ်းမိူင်းတႆးယဝ်ႉ ဝႃႈၼႆ။
“ 2020 ဢၼ်တေထိုင်မႃးၼႆႉ မၼ်းလမ်ႇလွင်ႈတႄႉတႄႉ ၊ ၽဝႃႉ ၵၢမ်ႇၵျမ်ႇမႃႇ ၸၢဝ်းၶိူဝ်းတႆး မိူင်းတႆးၼႆႉ မၼ်းတေလႅၵ်ႈလၢႆႈ မိူဝ်ႈ 2020 ယဝ်ႉ၊ ၸၢဝ်းၶိူဝ်းတႆးႁဝ်း၊ ၵူၼ်းမိူင်းတႆးႁဝ်း တင်းသဵင်ႈ ဢႃယု 18 ပီ ၶိုၼ်ႈၼိူဝ် ၸိူဝ်းမီးဝႂ်ၵပ်းတူဝ် လူဝ်ႇမႃး တွတ်ႈၶႅပ်းၵၢင်ၸႂ် ပၼ်ပႃႇတီႇဢိူဝ်ႈ။ ၼင်ႇႁိုဝ် တေပဵၼ်လူင်ပွင်ၸိုင်ႈမိူင်းတႆး။ လူင်ပွင်ၸိုင်ႈတႆးဢၼ်ဝႃႈၼၼ်ႉ ဢမ်ႇၸႂ်ႈ တႆးၵေႃႉလဵဝ်သေႁဵတ်းလႆႈ။ မၼ်းလူဝ်ႇလႆႈပႃးပီႈၼွင်ႉၸၢဝ်းၶိူဝ်းႁဝ်းၵွၼ်ႇ ႁဝ်းၸင်ႇၶိုၼ်းမႃးဢဝ်မိူင်းႁဝ်းလႆႈ။ မိူဝ်ႈပၢၼ် ၸဝ်ႈၾႃႉႁဝ်းၵေႃႈ ၶဝ်ႁူမ်ႈၵၼ်သေ ဢုပ်ႉပိူင်ၽွင်းငမ်းမႃးၵူၺ်းၶႃႈလူး ၵမ်းၼႆႉၵေႃႈႁဝ်းၶႃႈၶႂ်ႈႁႂ်ႈမၼ်းပဵၼ်ၸိူင်ႉၼၼ်ႉ” ဝႃႈၼႆ။
ဝၢႆးပၢင်ၵုမ်ယဝ်ႉ ၼႂ်းဝၼ်းတီႈ 20 ၼႆႉ ႁူမ်ႈၵၼ် ဢွၵ်ႇလိၵ်ႈၶေႃႈပိုၼ်ၽၢဝ်ႇ ၽိုၼ်ၼိုင်ႈသေ ၼႂ်းၼၼ်ႉပႃးဝႆႉဝႃႈ တႃႇ ၸႅၵ်ႇပၼ်ၼႃႈတီႈလိူၵ်ႈတင်ႈ ၼေႃႇၽူႈတႅၼ်းၼႂ်းပၢင်လိူၵ်ႈ ပီ 2020။ တႃႇမၵ်းမၼ်ႈပၼ် ပုၼ်ႈၽွၼ်းတူဝ်တႅၼ်း ၸႄႈ မိူင်းပၼ်ၶေႃၶေႃၵေႃႉၼိုင်ႈလႄႈ ၼႂ်းၶွမ်ႊမတီႊပၢင်လိူၵ်ႈတင်ႈလႄႈ တိုၵ်းသူၼ်းတႃႇမူၼ်ႉမႄးပိူင်ငဝ်ႈပိုၼ်းမိူင်း 2008 ႁႂ်ႈၸဵဝ်းယဝ်ႉတူဝ်ႈ ၸဵမ်ၸိူဝ်းၼႆႉ။
ပႃႇတီႇၸၢဝ်းၶိူဝ်းၼႂ်းမိူင်းတႆး LSSEP League for Shan State Ethnic Political Parties ၼႆႉ ယူႇတီႈ ပႃႇတီႇသိူဝ်ၽိူၵ်ႇ၊ လီႈသေႃး၊ ဝႃႉ၊ ဢၢင်းသႃး၊ တဢၢင်း၊ တၼု၊ တႆးလႅင် လႄႈ ဢိၵ်ႇထႅင်ႈလၢႆပႃႇတီႇ ႁူမ်ႈၵၼ်ၶွတ်ႇၽွတ်ႈဝႆႉဝႃႈၼႆ။
