တွၼ်ႈတႃႇဝၼ်းၵိူတ်ႇ ဢွင်ႇသၢၼ်းၸုၵျီႇၼႆသေ ၽွင်းမိူင်းလူင် ဝဵင်းတႃႈလိူဝ်ႇ ႁၢင်ႈႁႅၼ်း တေပၼ် ၸိုဝ်ႈသဵၼ်ႈတၢင်း 38 ဢၼ်ပိုတ်ႇမႂ်ႇၼႆႉဝႃႈ သဵၼ်ႈတၢင်း ဢွင်ႇသၢၼ်းၸုၵျီႇ ဝႃႈၼႆ။

သဵၼ်ႈတၢင်းလူင် သဵၼ်ႈ 38 (ၼႂ်းၵႄႈ 73 လႄႈ 78 )  ဢၼ်မီးၼႂ်းၸေႈဝဵင်း မႁႃႇဢွင်ႇမျေႇ ဝဵင်းတႃႈလိူဝ်ႇ ၼၼ်ႉ တေၸတ်းပွႆးပိုတ်ႇသဵၼ်ႈတၢင်းသေ တေတၢင်ႇၸိုဝ်ႈတၢင်းဝႃႈ သဵၼ်ႈတၢင်း ဢွင်ႇသၢၼ်းၸုၵျီႇ။ တႃႇမၢႆတွင်းဝၼ်းၵိူတ်ႇမၼ်းၼၢင်း ၼႂ်းဝၼ်းတီႈ 19/6/2019 ၼႆႉဝႃႈၼႆ။

တီႈပၢင်ပိုတ်ႇသဵၼ်ႈတၢင်းၼၼ်ႉ တေႁဵတ်းႁၢင်ႈမၼ်းၼၢင်းသႂ်ႇပႃး တီႈသဝ်ၽၵ်းတူသဵၼ်ႈတၢင်းၼၼ်ႉ ၼႆ ၽွင်းမိူင်းလူင် တူင်းတႃႈလိူဝ်ႇ ဢူးယႄးလုၼ်ႇ တႅမ်ႈတၢင်ႇဝႆႉတီႈ ၾေႉသ်ပုၵ်ႉမၼ်းမိူဝ်ႈဝၼ်းတီႈ 16 လိူၼ်ၵျုၼ်ႊ မိူဝ်ႈဝႃး။

မၼ်းၸၢႆးတႅမ်ႈဝႆႉပႃးထႅင်ႈဝႃႈ – သဵၼ်ႈတၢင်း မၢႆတွင်းဝၼ်း ၵိူတ်ႇၼႆလႄႈ တေလႆႈၸတ်းၶႅမ်ႉၶႅမ်ႉ။ ယွၼ်ႉပိူဝ်ႈဝႃႈ ဢၼ်ဢဝ်ၵုင်ႇမုၼ်မၼ်းၼၢင်းသေ သႂ်ႇဝႆႉပၼ်ၸိုဝ်ႈသဵၼ်ႈတၢင်းၸိူင်ႉၼႆ ပႆႇယၢမ်ႈမီးသေပွၵ်ႈ။ ၼႆႉတေပဵၼ်ပွၵ်ႈဢွၼ်တၢင်းသုတ်း ။ သဵၼ်ႈတၢင်းမႂ်ႇၼႆႉ ပႃးၸဵမ်လွင်ႈယုၵ်းယၵ်းၸိူဝ်းၼႆႉ တေဢမ်ႇလႆႈပၼ်မီး။ ႁွင်ႈၶၢင်ႈတၢင်းၸိူဝ်းၼႆႉ တေလႆႈႁဵတ်း ႁႂ်ႈမူတ်းသႂ်။ သုမ်ႉတွပ်း သုမ်ႉတႅပ်းၶၢႆတၢင်းၵိၼ်ၶၢင်ႈတၢင်းၸိူဝ်းၼၼ်ႉၵေႃႈ ၵဵပ်းပႅတ်ႈၽဵဝ်ႈ ပႅတ်ႈ မူတ်းယဝ်ႉ။ – ဝႃႈၼႆ။

ၽူႈၵိူဝ်းၵုမ်ၸိုင်ႈမိူင်း ဢွင်ႇသၢၼ်းၸုၵျီႇၼႆႉ ၵိူတ်ႇမိူဝ်ႈပီ 1945 လိူၼ်ၵျုၼ်ႊဝၼ်းတီႈ 19။ ပီၼႆႉဢႃယုမၼ်းၼၢင်းတဵမ် 74 ပီ။