လူင်ပွင်ၸိုင်ႈမိူင်းတႆးဝႃႈ တႃႇတေသိူဝ်ႇပၼ်သဵၼ်ႈတၢင်း ၼႂ်းၵႄႈဝၢၼ်ႈၼမ်ႉႁူးၼွႆႉ လႄႈ ၵွင်းၶႃး ၼႂ်ႈၸႄႈဝဵင်းသီႇပေႃႉ ၼၼ်ႉ ဢမ်ႇပႆႇမီးငိုၼ်းတမ်းဝၢင်းပၼ်မႃး ဝႃႈၼႆ။
ဝၼ်းတီႈ 12/6/2019 ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 15 ဝၼ်းထူၼ်ႈ 3 ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်းၼၼ်ႉ ၼၢင်းသၢၼ်းသၢၼ်းဢေး ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းသီႇပေႃႉ တွင်ႈ ထၢမ် ၼႂ်းပၢင်ၵုမ်သၽႃးၸႄႈမိူင်းတႆးဝႃႈ “ သဵၼ်ႈတၢင်းဢၼ်ၵၢႆႇၸူးၵၼ် ၼႂ်းဢိူင်ႇမၢၼ်ႈႁၢႆး တင်းဢိူင်ႇမေႃႇၵိူဝ် ဝၢၼ်ႈ ၼမ်ႉႁူးၼွႆႉလႄႈ ဝၢၼ်ႈၵွင်းၶႃးၼၼ်ႉ ယွၼ်ႉဝႃႈ ပဵၼ်သဵၼ်ႈတၢင်းလိၼ်သေ ၵႂႃႇမႃးႁႃၵၼ်ယၢပ်ႇၽိုတ်ႇလိူဝ်ႁႅင်း၊ ယဝ်ႉ ၵေႃႈ ပဵၼ်တၢင်းၵူတ်ႉ၊ တၢင်းၸၼ်း၊ ၵွပ်ႈၼၼ်ၶႂ်ႈသိူဝ်ႇပူပၼ်ႁႂ်ႈပဵၼ်တၢင်းလီ လွင်ႈၼႆႉ ပီတေမႃးၸွင်ႇတေမီး ငိုၼ်းႁဵတ်း သၢင်ႈပၼ် ဝႃႈၼႆ။
ၶုၼ်ႇယေးထူၺ်း ၽွင်းလူင်ၾၢႆႇသဵၼ်ႈတႃႈသၢႆတၢင်း တွပ်ႇလၢတ်ႈၼႂ်းပၢင်ၵုမ်သၽႃးၶိုၼ်းဝႃႈ “ ငိုၼ်းၵွင်ၵၢင် ပီ 2019 – 2020 တေမႃးၼႆႉ တႃႇႁဵတ်းသဵၼ်ႈတၢင်း 5 သဵၼ်ႈ ၼႂ်းၸႄႈဝဵင်းသီႇပေႃႉၼႆသေ လႆႈယွၼ်းဝႆႉငိုၼ်း 531.5 လၢၼ်ႉပျႃး။ ၵူၺ်းၵႃႈ တႃႇသိူဝ်ႇသဵၼ်ႈတၢင်းၼႂ်းၵႄႈ ဝၢၼ်ႈၼမ်ႉႁူးၼွႆႉလႄႈ ဝၢၼ်ႈၵွင်းၶႃးတႄႉ ဢမ်ႇပႆႇပႃး” ဝႃႈၼႆ။
ၵူႈပီလႆႈငိုၼ်းၵွင်ၵၢင်မႃးၼၼ်ႉ တူၺ်းၸွမ်းငဝ်းလၢႆးသေ ၸတ်းဝၢင်းပၼ် ဝၢၼ်ႈဢၼ်ၶွမ်ႊမတီႊၵူတ်ႇထတ်းၶဝ် တိုတ်ႉတႅမ်ႈဝႆႉၼၼ်ႉၵူၺ်း ဝႃႈၼႆ။
ၼႂ်းၸႄႈဝဵင်းသီႇပေႃႉၼႆႉ ယူႇတီႈၶွမ်ႊမတီႊသဵၼ်ႈတၢင်း တိုတ်ႉတႅမ်ႈဝႆႉ တႃႇသဵၼ်ႈတၢင်း 13 ပီ တေၵႂႃႇသၢင်ႈပၼ် ၸွမ်းၼႂ်းမူႇဝၢၼ်ႈ။ ၶူင်းၵၢၼ်ၼႆႉ တေၵေႃႇသၢင်ႈထိုင်ပီ 2024-2025 လႄႈ 2025-2026 တေသိူဝ်ႇပူပၼ် သဵၼ်ႈတၢင်း မၢၵ်ႇႁိၼ်သိူဝ်ႇယၢင် တင်းမူတ်း ဝႃႈၼႆ။
ၼၢင်းသၢၼ်းသၢၼ်းဢေး ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းသီႇပေႃႉ လၢတ်ႈဝႃႈ “ သဵၼ်ႈတၢင်း ၼမ်ႉႁူးၼွႆႉ တင်း ၵွင်းၶႃႈ ဢၼ်ၵၢႆႇၸူးၵၼ်ၼႆႉ ပေႃးပဵၼ်ၶၢဝ်းၾူၼ်မႃး ၵႃး၊ ရူတ်ႉၶိူင်ႈ ႁေႃႈၶိုၼ်ႈၵႂႃႇမႃးဢမ်ႇလႆႈ။ ယွၼ်ႉဝႃႈ သဵၼ်ႈတႃႈသၢႆတၢင်းဢမ်ႇလီလႄႈ ႁူင်းႁဵၼ်း၊ ႁွင်းယႃႈယႃလႄႈၾႆးၵေႃႈ ဢမ်ႇလႆႈၵုမ်ႇထူၼ်ႈ” ဝႃႈၼႆ။
လိူဝ်ၼၼ်ႉ တွၼ်ႈတႃႇလုၵ်ႈဢွၼ်ႇႁဵၼ်းၸၼ်ႉဢွၼ်(မူလ) ၼႆႉ လႆႈပႆတၢင်းလိၼ်ၼႆႉ 2 လၵ်းပၢႆ တႃႇၵႂႃႇၶိုၼ်းႁူင်းႁဵၼ်း တီႈဝၢၼ်ႈၼမ်ႉႁူးၼွႆႉ။ ဢမ်ႇမီးၽႂ်ႁပ်ႉပုၼ်ႈၽွၼ်း တွၼ်ႈတႃႇလွင်ႈႁူမ်ႇလူမ်ႈလုၵ်ႈဢွၼ်ႇ ၸိူဝ်းၼႆႉ။
ၼွၵ်ႈလိူဝ်ၼၼ်ႉ သင်ၵူၼ်းဝၢၼ်ႈၸဵပ်းမႆႈၶႆႈၼၢဝ်မႃးတေၵႂႃႇႁူင်းယႃ၊ ႁွင်ႈယႃ (ဆေးရုံ ဆေးခန်း) ၼႆၸိုင် ယွၼ်ႉၵႂႃႇယၢပ်ႇ မႃးယၢပ်ႇလႄႈ လႆႈၸူးဢဝ်မေႃယႃ ၼႂ်းဝၢၼ်ႈသေ ယူတ်းယႃၵၼ်ၵႂႃႇႁဵတ်းၼၼ်ၵူၺ်း ဝႃႈၼႆ။
သင်ဝႃႈ သဵၼ်ႈတၢင်းၼႆႉ သိူဝ်ႇပူယၢင်ပၼ်ၸိုင် ၵူၼ်းဝၢၼ်ႈပၢင်ၵျီးတင်း ဝၢၼ်ႈၼမ်ႉႁူးၼွႆႉၼႆႉ တင်းမူတ်းလင်ႁိူၼ်းမီး 94 လင် ႁူဝ်ၵူၼ်း 480 ၵေႃႉ မိူၼ်ဝႃႈ ၵႄႈၶႆႈပၼ်ႁႃလွင်ႈယၢပ်ႇၽိုတ်ႇၵူၼ်းမိူင်းၵႂႃႇယဝ်ႉ ဝႃႈၼႆ။
