လူတ်ႉၵႃးလႄႈ လူတ်ႉၶိူင်ႈၽႃႇၺႃးၵၼ်တီႈတၢင်းၶဝ်ႈဝဵင်းၵျွၵ်ႉမႄး ။ ၵူၼ်းၶီႇလူတ်ႉၶိူင်ႈ တၢႆတင်းသၢမ်ၵေႃႉ။
မိူဝ်ႈၼႆႉ ဝၼ်းတီႈ 11/6/2019 ယၢမ်းဝၢႆးဝၼ်း လူတ်ႉၵႃးလႄႈ လူတ်ႉၶိူင်ႈ ၽႃႇၺႃးၵၼ်ၼိူဝ်ႈသဵၼ်ႈတၢင်းလူင် ဢေႊသျိူဝ်ႊႁၢႆႊဝေႊ မၢႆလၵ်း 115/5 ။ တီႈ ႁိမ်းဝၢၼ်ႈႁွင်ႈႁႅင်ႈ (ၶျွင်းၶျွၵ်ႉ) ဢၼ်မီးတၢင်းၶဝ်ႈဝဵင်း ၵျွၵ်ႉမႄး။ ၵွၼ်ႇထိုင်ၵျႂၵ်ႉမႄး 7 လၵ်း။
လူတ်ႉၶိူင်ႈၼၼ်ႉ မီးၵူၼ်းၶီႇမႃးၸွမ်းၵၼ် 3 ၵေႃႉ။ လုၵ်ႈဢွၼ်ႇၵေႃႉၼိုင်ႈလႄႈၵူၼ်းလူင် သွင်ၵေႃႉ။ တၢႆထင်တီႈတင်းမူတ်း။
ဢူးတိၼ်ႇမွင်ႇတဵင်း ၸုမ်းၸွႆႈထႅမ်ၵူၼ်းထူပ်းၽေး တီႈဝဵင်းၵျွၵ်ႉမႄးလၢတ်ႈဝႃႈ- “ၵူၼ်းဢၼ်တၢႆၵႂႃႇသၢမ်ၵေႃႉၼၼ်ႉ ဢမ်ႇႁူႉၸၵ်းၶဝ် ဝႃႈၶဝ်ပဵၼ်ၽႂ်။ ႁၼ်မၢႆၾၢင် မၢတ်ႉပုင်ႇတိၼ်ႇ ဢၼ်ၼိုင်ႈၵူၺ်း။ ၸိုဝ်ႈႁွင်ႉ မၸၢၼ်းၸၢၼ်းဢေး။ ဢႃယုလႆႈ 28 ပီ။ ယူႇပူႇတႃႇၸေႈဢႅၼ်ႇ ဝဵင်းသီႇပေႃႉ။ မိုဝ်းထိုဝ်ၶဝ်ၵေႃႈ လုလႅဝ်မူတ်းလႄႈ ဢမ်ႇၸၢင်ႈတူၺ်းတီႈဢၼ်တေလႆႈ ၵပ်းသိုပ်ႇတိတ်းတေႃႇၸူး။ ၵွပ်ႈၼၼ် ပဵၼ်ပီႈၼွင်ႉၽႂ်ၵေႃႈ တိတ်းတေႃႇမႃးတီႈၶႃႈႁဝ်းလႆႈယူႇၶႃႈ ”– ဝႃႈၼႆ။
ၵူၼ်းဢၼ်ပႃးမႃးၸွမ်းလူတ်ႉၵႃးယႂ်ႇတႄႉ ဢမ်ႇမၢတ်ႇၸဵပ်းသင်သေ ယၢမ်းလဵဝ် ၸဝ်ႈၼႃႈတီႈႁွင်ႉၵူတ်ႇထတ်းထဵတ်ႈထၢမ်ဝႆႉယူႇဝႃႈၼႆ။
သဵၼ်ႈတၢင်းဝဵင်းသီႇပေႃႉ ၵျွၵ်ႉမႄးၼႆႉ ပဵၼ်သဵၼ်ႈတၢင်းလူင် ဢၼ်ၵပ်းသိုပ်ႇတိတ်းတေႃႇတင်း မိူင်းၶႄႇၵမ်းသိုဝ်ႈလႄႈ လူတ်ႉတၢင်ႇၶူဝ်းၶွင်ၵေႃႈၼမ်။ ႁေႃဝႆး။ၵွပ်ႈၼၼ်လႄႈလူတ်ႉၵမ်းၵမ်းၽႃႇၺႃးၵၼ်။
