ၸုမ်းတူဝ်တႅၼ်းလုမ်းၽွင်းတၢင် ပရိတ်ႉတိတ်ႉသျ် ႁူပ်ႉထူပ်းၵၼ်တင်း ၸုမ်းပၵ်းတႃပႂ်ႉတူၺ်းၵၢၼ်ၵိုတ်းတိုၵ်း ၸၼ်ႉၸႄႊမိူင်းလႄႈၸၼ်ႉၸႄႊတွၼ်ႈ (မိူင်းတႆး) ၊ ဢုပ်ႇဢူဝ်းၵဵပ်းၶေႃႈမုလ်းတႃႇၵမ်ႉၸွႆႈ တႃႇႁူမ်ႈသၢင်ႈၵၢၼ်ငၢၼ်း။

ၸုမ်းတူဝ်တႅၼ်း လုမ်းၽွင်းတၢင် ဢိင်းၵလဵတ်ႈ (ပရိတ်ႉတိတ်ႉသျ်) ႁူပ်ႉထူပ်း ၸုမ်းတူဝ်တႅၼ်းၵူၼ်းမိူင်း JMC-S လႄႈ  JMC-L မိူင်းတႆး တီႈႁူင်းႁႅမ်း ၵွင်းလုၼ်း ဝဵင်းတူၼ်ႈတီး မိူဝ်ႈဝၼ်းတီႈ 6/6/2019 ယၢမ်းၵၢင်ဝၼ်း 11 မူင်းထိုင် 12 မူင်း။

လုင်းၸၢႆးၵျေႃႇလႃႉ တူဝ်တႅၼ်းၵူၼ်းမိူင်း JMC-L လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “ၸိူဝ်းၶဝ်မႃးထၢမ်လွင်ႈၵၢၼ်ငၢၼ်းႁဝ်းႁဵတ်းဝႆႉယူႇၼႆႉပဵၼ်ႁိုဝ်ၽွင်ႈ။ ႁဵတ်းသင်ဝႆႉယူႇ။မီးလွင်ႈယၢပ်ႇသင် ၸိူဝ်းၼႆႉ။ ၸွမ်းၼင်ႇႁဝ်းၶႃႈလႆႈႁူႉၸွမ်းတႄႉ ၶဝ်ၶႂ်ႈၵမ်ႉၸွႆႈၵၢၼ်ငၢၼ်းႁဝ်းၶႃႈ ဢၼ်ႁဵတ်းဝႆႉ ယူႇ ယၢမ်းလဵဝ်ၼႆႉ။ ၵူၺ်းၵႃႈယၢမ်းလဵဝ်ၶဝ်တိုၵ်ႉမႃးၵဵပ်းၶေႃႈမုလ်းၵူၺ်း။ ”- ဝႃႈၼႆ။

တီႈပၢင်ႁူပ်ႉထူပ်းၵၼ်ၼၼ်ႉ ယူႇတီႈ JMC-S မီး ဢူးဢွင်ႇၸူဝ်းမူဝ်း ၵႅမ်ႁူဝ်ပဝ်ႈ 2၊  ၽူႈၶဝ်ႈၶွမ်ႊမတီႊ ဢူးဝိၼ်းတိၼ်ႇ၊ ၶုၼ်ႇၵျေႃႇသူၺ်ႇ၊ ပႃႈၼၢင်းၶိၼ်ႇၸၢၼ်းယု၊ ယူႇတီႈ JMC-L သမ်ႉ မီးၽူႈၶဝ်ႈၶွမ်ႊမတီႊ ဢၼ်ပဵၼ် ၸၢႆးၵျေႃႇလႃႉ၊ ပႃႈၼၢင်းလႄႉလႄႉဢေးၶဝ်။ ၾၢႆႇတူဝ်တႅၼ်းလုမ်းၽွင်းတၢင်ဢိင်းၵလဵတ်ႈသမ်ႉပဵၼ် Mr.Edward Bell(Second Secretary, Security Sector Advisor- CSSF)ဢွၼ်ႁူဝ်ၸုမ်းၸိူဝ်း မီး 4 ၵေႃႉႁူပ်ႉထူပ်းဢုပ်ႇဢူဝ်းၵၼ်ဝႃႈၼႆ။

“ၵၢၼ်ဢၼ်ႁဝ်းၶႃႈႁဵတ်းယူႇယၢမ်းလဵဝ်ၼႆႉၵေႃႈ ၵႂႃႇႁူပ်ႉထူပ်းၵူၼ်းမိူင်း။ သပ်းလႅင်းပၼ်လွင်ႈငမ်းယဵၼ်၊ လွင်ႈၵိုတ်းတိုၵ်း။ ပၼ်ပၢင်သွၼ်  ။ ၵဵဝ်ႇၵပ်းလွင်ႈငမ်းယဵၼ်။ ယၢမ်းလဵဝ် ဢၼ်တိုၵ်ႉႁဵတ်းဝႆႉယူႇၵေႃႈပဵၼ်တီႈၼမ်ႉၸၢင်။ ပေႃးယဝ်ႉ ၼမ်ႉၸၢင် သမ်ႉတေမီးထႅင်ႈတီႈတူၼ်ႈတီးၶႃႈ။ ဢၼ်မႃးၶဝ်ႈႁူမ်ႈ ထွမ်ႇ  ႁဵၼ်းဢဝ် ၵေႃႈမီးယူႇၵူႈၸၼ်ႉထၢၼ်ႈၶႃႈဢေႃႈ။ တင်ႈဢဝ်ပူႇၵႄႇပူႇႁဵင် ၊ ၵူၼ်းဝၢၼ်ႈ ၵူၼ်းၼုမ်ႇ ပေႃးပဵၼ်တီႈၼမ်ႉၸၢင်ၵေႃႈပႃးၸဵမ်သိုၵ်းၵူၼ်းမိူင်းၶႃႈ  ”– ၸၢႆးၵျေႃႇလႃႉသိုပ်ႇလၢတ်ႈၼႄၼင်ႇၼႆ။

မိူၼ်ၼၼ်ၼင်ႇၵဝ်ႇ တီႈမိူင်းယၢင်းၽိူၵ်ႇၵေႃႈ ယူႇတီႈၸုမ်းတၢင်တူဝ်လုမ်းၽွင်းတၢင်မိူင်းဢိင်းၵလဵတ်ႈ ဢၼ်ပဵၼ် Ms. Jasveen Kakaria (CSSF Program Manager) ဢွၼ်ႁူဝ်ၸုမ်းၸိူဝ်းႁူပ်ႉထူပ်း ၸုမ်းတၢင်တူဝ် JMC-S လႄႈ JMC-L မိူင်းယၢင်း ။ မိူဝ်ႈဝၼ်းတီႈ 7 လိူၼ်ၵျုၼ်ႊ တီႈဝဵင်းၽႃဢၢင်ႇ ၼၼ်ႉၼင်ႇၵဝ်ႇ။