ၵူၼ်းမိူင်းၼမ်ႉၶမ်းလႄႈ ၸုမ်းတူဝ်တႅၼ်းၵူၼ်းမိူင်း 5 ၸုမ်း တႅမ်ႈလိၵ်ႈတၢင်ႇထိုင်လူင်ပွင်ၸိုင်ႈ ႁႂ်ႈလူင်းၵူတ်ႇထတ်းပၼ် လွင်ႈၶုတ်းမၢၵ်ႇႁိၼ်ၶၢဝ် (ႁိၼ်မိူဝ်ႊပိူဝ်ႊရ်) တီႈၼႂ်းဢိူင်ႇႁိၼ်လူင်ၼၼ်ႉ ဝႃႈၼႆ။
လိၵ်ႈၼၼ်ႉသူင်ႇထိုင်လူင်ပွင်ၸိုင်ႈ မိူဝ်ႈဝၼ်းတီႈ 3/6/2019။ ပဵၼ်ၸုမ်းပေႃႈၾႃႉမႄႈမိူင်း၊ ၸုမ်းပႃႇတီႇသိူဝ်ၽိူၵ်ႇ၊ ၸုမ်းၵုမ်းထိင်းလွင်ႈၶွတ်ႇလိူတ်ႈၽွမ်ႉႁူမ်ႈ၊ ၸုမ်းႁၵ်ႉသႃသိင်ႇဝႅတ်ႉလွမ်ႉလႄႈ ၶူဝ်းၶွင်ၵိုၵ်းပိုၼ်း၊ ၸုမ်းၸဝ်ႈႁႆႈၸဝ်ႈၼႃး 5 ၸုမ်းၼႆႉ ၵူတ်ႇထတ်းႁူႉႁၼ်သေ ပဵၼ်တူဝ်တႅၼ်းၵူၼ်းဝၢၼ်ႈၵူၼ်းမိူင်း လူင်းလၢႆးမိုဝ်း တၢင်ႇလိၵ်ႈထိုင် လူင်ပွင်ၸိုင်ႈလႄႈ ႁွင်ႈၵၢၼ်ၽွင်းလူင်ၾၢႆႇႁၵ်ႉသႃၶူဝ်းၶွင်သၽႃႇဝ။
လုင်းၸၢႆးဢွင်ႇဝိၼ်း ႁူဝ်ပဝ်ႈ ၸုမ်းႁၵ်ႉသႃသိင်ႇဝႅတ်ႉလွမ်ႉလႄႈ ၶူဝ်းၶွင်ၵိုၵ်းပိုၼ်းၸေႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ- “ၶွမ်ႊပၼီႊ 3 ဢၼ်ၼႆႉ ၶဝ် ၶိုၼ်ႈယွၼ်းလိၵ်ႈဢၼုယၢတ်ႈတီႈလူင်ပွင်ၸိုင်ႈၼေႇပီႇတေႃႇၵမ်းသိုဝ်ႈ။ ၼေပီႇတေႃႇသင်ႇမႃး ႁႂ်ႈၵူတ်ႇထတ်းလွင်ႈတုမ်ႉတိူဝ်ႉသိင်ႇဝႅတ်ႉလွမ်ႉၵွၼ်ႇ ၼႆသေတႃႉ ၵူၼ်းဝၢၼ်ႈဝႃႈ ဢမ်ႇမႃးတွင်ႈထၢမ်ၵၢင်ၸႂ်ၵူၼ်းဝၢၼ်ႈသင်သေဢိတ်း သေ ၶဝ်ၶုတ်းၵႂႃႇၵမ်းသိုဝ်ႈ။ ယွၼ်ႉမီးလွင်ႈတုမ်ႉတိူဝ်ႉ ၵူၼ်းဝၢၼ်ႈ ၊ မီးလွင်ႈတုမ်ႉတိူဝ်ႉ သိင်ႇဝႅတ်ႉလွမ်ႉ၊ တုမ်ႉတိူဝ်ႉမႄႈၼမ်ႉမၢဝ်း၊ တုမ်ႉတိူဝ်ႉႁူင်းၸၢၵ်ႈၾႆးၾႃႉ မၢၼ်ႈတၢတ်ႈ ၊ လၵ်ႉလွမ်ႁဵတ်းယူႇၸိူင်ႉၼႆၼႆႉ တုမ်ႉတိူဝ်ႉပႃးၶူဝ်းၶွင်ၸိုင်ႈမိူင်းလႄႈ ႁဝ်းၶႃႈၸင်ႇလႆႈယူႇၾၢႆႇၵူၼ်းမိူင်းသေ သၢၼ်ၶတ်းၵၢၼ်ၶုတ်းမၢၵ်ႇႁိၼ်၊ ၸင်ႇလႆႈတႅမ်ႈလိၵ်ႈသူင်ႇထိုင်လူင်ပွင်ၸိုင်ႈၶႃႈဢေႃႈ” – ဝႃႈၼႆ။
ၶွမ်ႊပၼီႊၼႆႉဢဝ်ၶိူင်ႈၸၢၵ်ႈၶိုတ်းၵၢပ်ႈမႃးၶုတ်းမၢၵ်ႇႁိၼ်တီႈၼႂ်းဢိူင်ႇႁိၼ်လူင်သေ တတ်းမၢၵ်ႇႁိၼ်ပဵၼ်ၵွၼ်ႈသီႇၸဵင်ႇ ႁူၺ်ႇယႂ်ႇႁူၺ်ႇလူင်။ တၢင်ႇလူတ်ႉၵႃး 10 လေႃႉ သူင်ႇၶဝ်ႈမိူင်းၶႄႇ ၼိုင်ႈဝၼ်းဢမ်ႇယွမ်း ၵႃး 5 လမ်း။ ပဵၼ်ၶွမ်ႊပၼီႊ မျၢၼ်ႇမႃႉမျႃးဢူး၊ တူဝ်းပႂႃးဢွင်ႇ၊ ၼိၼ်းၼိၼ်းၶႅင်ႇ သၢမ်ဢၼ်ၼႆႉဝႃႈၼႆ။
“ဢၼ်ၶဝ်လၵ်ႉလွမ်ၶုတ်းမၢၵ်ႇႁိၼ်သေ တၢင်ႇမၢၵ်ႇႁိၼ်ၵႂႃႇမိူင်းၶႄႇၵူႈဝၼ်းၼႆႉ လူင်ပွင်ၸိုင်ႈလႄႈ ၸဝ်ႈၼႃႈတီႈၼႂ်းပိုၼ်ႉတီႈ ဢမ်ႇႁူႉႁိုဝ်၊ ဢမ်ႇၼၼ် ႁူႉယူႇသေ ႁဵတ်းၵႅင်ႈဢမ်ႇႁူႉသေပွႆႇဝႆႉ၊ ဢမ်ႇဢဝ်လိူင်ႈႁိုဝ် ၵေႃႈဢမ်ႇႁူႉ”- ၵူၼ်းဝၢၼ်ႈႁိၼ်လူင် ၵေႃႉၼိုင်ႈလၢတ်ႈ။
ၶွမ်ႊမၼီႊ 3 ဢၼ်ၼႆႉ ၶဝ်တႄႇၶုတ်းမၢၵ်ႇႁိၼ်ၶၢဝ်ၼႂ်းထုင်ႉႁိၼ်လူင်ၼႆႉမႃးၸဵမ်မိူဝ်ႈပီ 2015။ လၵ်ႉလွမ်တၢင်ႇဢွၵ်ႇတၢင်း ဝၢၼ်ႈၼွင်ၼူၵ်ႉ ၼွင်လူမ်ႇ။ ဢမ်ႇဢွၵ်ႇတၢင်းၽၵ်းတူမၢၼ်ႈဝဵင်း ၵူၼ်းဝၢၼ်ႈႁိၼ်လူင်လၢတ်ႈ။
မၢၵ်ႇႁိၼ်ၶၢဝ်လုၵ်ႈယႂ်ႇ လုၵ်ႈၶႅမ်ႉၼင်ႇတီႈဝၢၼ်ႈႁိၼ်လူင်ၼႆႉ မိူင်းၶႄႇႁပ်ႉသိုဝ်ႉၵႃႈယႂ်ႇၶၼ်လူင်။ ၶဝ်ဢဝ်ၵႂႃႇၸႂ်ႉႁဵတ်းတင်ႇ ႁဵတ်းၽိူၼ်၊ ႁဵတ်းၶိူင်ႈၸႂ်ႉတိုဝ်း (Furniture) တၢင်းႁၢင်ႈလီၼႂ်းႁိူၼ်း- ဝႃႈၼႆ။
