ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ တီႉလႆႈယႃႈမႃႉတင်း ယႃႈၾိၼ်ႇၽိူၵ်ႇ တႃႇၵႃႈၶၼ်ငိုၼ်း 1,084 သႅၼ်ပျႃးပၢႆ ၼႂ်းၸႄႈ ဝဵင်းမၢၼ်ႈပဵင်း ၸိုင်ႈတႆးပွတ်းႁွင်ႇ။ ယူႇတီႈႁွင်ႈၵၢၼ်ၾၢႆႇၽဵဝ်ႈမူၺ်ႉယႃႈမဝ်းၵမ် ပိုၼ်ၽၢဝ်ႇဢွၵ်ႇဝႆႉ။
ဝၼ်းတီႈ 30/05/2019 ယၢမ်းၵၢင်ၼႂ် 9 မူင်းၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ လူင်းပိုၼ်ႉတီႈၵူတ်ႇထတ်း တီႈ ၼႂ်းသုမ်ႉထဵင်ၼႃးတီႈၼိုင်ႈ ၼႂ်းၸႄႈဝဵင်းမၢၼ်ႈပဵင်း ၸိုင်ႈတႆးပွတ်းႁွင်ႇ။ လႆႈၶဝ်ႈၵူတ်ႇထတ်း ထူပ်း ႁၼ် ယႃႈမဝ်းၵမ် သႂ်ႇ ထူင်ၸၢၼ်ႈ( ထူင်ႈၶဝ်ႈသၢၼ်) ဝႆႉ။ ယႃႈမႃႉ တင်းမူတ်း 54,200 မဵတ်ႉ(မႅၼ်ႈငိုၼ်း 1,084 သႅၼ်ပျႃး)၊ ယႃႈၾိၼ်ႇၽိူၵ်ႇ ၼမ်ႉ ၼၵ်း 2 ၵရမ်ႊ (မႅၼ်ႈငိုၼ်း 28,000 ပျႃး) ဝႃႈၼႆ။
ၼႂ်းလိၵ်ႈၽိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ တီႉလႆႈၽူႈၸၢႆး ဢႃယု 46 ပီ 1 ၵေႃႉ၊ ဢႃယု 43 ပီ 2 ၵေႃႉ၊ ဢႃယု 28 ပီ 2 ၵေႃႉ။ ၵူၼ်းၸိူဝ်းၼႆႉ ပဵၼ်ၵူၼ်းတၢင်းၼမ်ႉၶမ်း၊ မၢၼ်ႈၸေႊ လႄႈ လႃႈသဵဝ်ႈ ၸဵမ်ၸိူဝ်းၼႆႉ။ လိူဝ်ၼၼ်ႉ တီႉလႆႈပႃးထႅင်ႈ ၾူၼ်း 1 လုၵ်ႈ၊ ငိုၼ်းမၢၼ်ႈ 170 သႅၼ်ပျႃးလႄႈ ရူတ်ႉၶိူင်ႈ 2 လမ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ လႆႈမွပ်ႈတူဝ်ၵူၼ်းၵႃႉၶၢႆယႃႈမဝ်းၵမ် ၸိူဝ်းၼႆႉ ပၼ်တီႈၽူႈ မီး ပုၼ်ႈၽွၼ်း ပလိၵ်ႈၸႄႈဝဵင်းမၢၼ်ႈပဵင်း ႁႂ်ႈဢဝ်လိူင်ႈလၢဝ်း ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
ၶေႃႈမုလ်း – မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့
