Thursday, March 28, 2024

ၾၢႆႇပွင်ႇၶၢဝ်ႇ တပ်ႉမတေႃႇလူင်ပွင်ၸိုင်ႈဝႃႈ ဢၼ် ဝႃႉ ၸႂ်ႉၶိူင်ႈယိုဝ်းသိုၵ်း ၼေၾၢင်ႁၢင်ႈသိုၵ်းၼၼ်ႉ မိူၼ် ၶဵင်ႇတႃႉလူင်ပွင်ၸိုင်ႈဝႆႉ

Must read

ၾၢႆႇပွင်ႇၶၢဝ်ႇၶွင်တပ်ႉမတေႃႇလူင်ပွင်ၸိုင်ႈ လၢတ်ႈဝႃႈ လၢႆးဢၼ်ၸုမ်းသိုၵ်းဝႃႉ ႁဵတ်းသၢင်ႈယူႇတင်းသဵင်ႈၼႆႉ   မိူၼ်တင်း  ၶဵင်ႇတႃႉလူင်ပွင်ၸိုင်ႈမိူင်းႁူမ်ႈတုမ်၊  ၶဵင်ႇတႃႉတပ်ႉသိုၵ်းမိူင်းႁူမ်ႈတုမ် ဝႃႈၼႆ။

Photo Credit to http://cincds.gov.mm  : ၾၢႆႇပွင်ႇၶၢဝ်ႇ တပ်ႉမတေႃႇလူင်ပွင်ၸိုင်ႈ ၸတ်းပၢင်သပ်းၸႅင်ႈၶၢဝ်ႇ တီႈၼေႇပီႇတေႃႇ 2/6/2019

ၾၢႆႇပွင်ၶၢဝ်ႇၶွင်တပ်ႉမတေႃႇ ၸတ်းပၢင်သပ်းၸႅင်ႈၶၢဝ်ႇမိူဝ်ႈဝၼ်းတီႈ 2 လိူၼ်ၵျုၼ်ႊ 2019 မိူဝ်ႈဝႃး ၼၼ်ႉ ၽူႈၶၢၼ်ပၢၵ်ႇတပ်ႉသိုၵ်းတပ်ႉမတေႃႇမၢၼ်ႈ ၸွမ်သိုၵ်း ၸူဝ်းၼၢႆႇဢူး လၢတ်ႈတီႈၽူႈသိုဝ်ႇ ၶၢဝ်ႇ ဝႃႈ- “တီႈပၢင်ပွႆးငမ်းယဵၼ် 30 ပီ မိူင်းဝႃႉၽွမ်ႉႁူမ်ႈ ၸတ်းမိူဝ်ႈဝၼ်းတီႈ 16 လိူၼ်ဢေႊပရိူဝ်ႊ ပူၼ်ႉ မႃးၼႆႉၼၼ်ႉ ၸႂ်ႉဢဵၼ်ႁႅင်းသိုၵ်း ယိပ်းၵွင်ႈၵၢင်ႇၸေးမိုဝ်း ၸတ်းပၢင်ၼေၾၢင်ႁၢင်ႈသိုၵ်း၊ ၼေပႃး လူတ်ႉၵႃးယိုဝ်းသိုၵ်း ၶိူင်ႈၸႂ်ႉတိုဝ်းၼႂ်းပၢင်တိုၵ်းသိုၵ်းသိူဝ် ။ ပေႃးတူၺ်းၼႆႉၸိုင် မိူၼ်တၢင်းၸုမ်း သိုၵ်းဝႃႉၼႆႉ  မီးလူင်ပွင်ၸိုင်ႈၶဵင်ႇတႃႉလူင်ပွင်ၸိုင်ႈမိူင်းႁူမ်ႈတုမ်၊ မီးတပ်ႉသိုၵ်း ၶဵင်ႇတႃႉတပ်ႉသိုၵ်း တပ်ႉမတေႃႇလူင်ပွင်ၸိုင်ႈလႄႈ ပဵၼ်ဢၼ်လႆႈယိူၼ်ႉသီးဝႆႉ တီႈသုတ်း” – ဝႃႈၼႆ။

- Subscription -

တီႈပၢင်ပွႆးငမ်းယဵၼ်ၼၼ်ႉ ၽူႈၼမ်းၸိၵ်းၸွမ်ၾၢႆႇသိုၵ်းဝႃႉ ပဝ်းယဵဝ်ႇၶျႅင်လၢတ်ႈဝႃႈ တေၶတ်းၸႂ်ႁႂ်ႈလႆႈ ပဵၼ်ၸေႈမိူင်းဝႃႉ ၊ ၵူၺ်းၵႃႈဢမ်ႇၸႂ်ႈတႃႇၽၢတ်ႇဢွၵ်ႇမိူင်းႁူမ်ႈတုမ် – ဝႃႈၼႆ။ တီႈပၢင်ၼၼ်ႉ ယူႇတီႈတပ်ႉသိုၵ်းဝႃႉၽိတ်ႈမွၵ်ႇ ၽူႈၵိူဝ်းၵုမ်ၸိုင်ႈမိူင်း လႄႈ ၸွမ်ၸိၵ်းသိုၵ်း တပ်ႉမတေႃႇ မၢၼ်ႈယူႇၵေႃႈ ဢမ်ႇမႃးၶဝ်ႈႁူမ်ႈ။

“တေႃႇထိုင်ယၢမ်းလဵဝ် ယူႇတီႈသိုၵ်းတပ်ႉမတေႃႇသေ ဢမ်ႇႁၢမ်ႈ ဢမ်ႇတၵ်ႉ တပ်ႉသိုပ်းဝႃႉၼႆႉၵေႃႈ ယွၼ်ႉပိူဝ်ႈ ၶႂ်ႈလႆႈလွင်ႈငမ်းယဵၼ်လႄႈ ၸင်ႇလႆႈယိူၼ်ႉၵၼ်သေ ယဵၼ်ဝႆႉ  – ၸွမ်သိုၵ်း ၸူဝ်းၼႆႇဢူးလၢတ်ႈတီႈ သိုဝ်ႇၶၢဝ်ႇၶဝ်ၼင်ႇၼႆ။

ၵႅမ်ၸွမ်ႁၢၼ် ၸေႃႇမိၼ်းထုၼ်း ၵေႃႈလၢတ်ႈတီႈပၢင်သပ်းၸႅင်ႈၶၢဝ်ႇၼၼ်ႉဝႃႈ –  “ၵဵဝ်ႇၵပ်းလွင်ႈ သိုၵ်းဝႃႉၼႆႉတႄႉ ယူႇတီႈတပ်ႉမတေႃႇသေ တေတၵ်ႉတိူၼ်းၵႂႃႇတီႈ လုမ်းၵပ်းသၢၼ်ဝႃႉ ယူႇ”- ဝႃႈၼႆ။

ဢူးၺီယၢၼ်း ၸဝ်ႈၼႃႈတီႈ တီႈလုမ်းၵပ်းသၢၼ်ဝႃႉ တီႈလႃႈသဵဝ်ႈတႄႉလၢတ်ႈဝႃႈ- “ယူႇတီႈ တပ်ႉ သိုၵ်းဝႃႉသေ ဢမ်ႇလႆႈဝႆႉၽႂ်ၸုမ်းလႂ်မိူၼ်ၼင်ႇၽူႈၶဵၼ်။ ပႃးၸဵမ်တပ်ႉသိုၵ်း တပ်ႉမတေႃႇမၢၼ်ႈ။ ၵွပ်ႈၼၼ်လႄႈ ၸင်ႇလႆႈသူင်ႇလိၵ်ႈမွၵ်ႇမႃးၶဝ်ႈပၢင်ပွႆး။ ဢၼ်ၼေၾၢင်ႁၢင်ႈသိုၵ်းၼႆႉၵေႃႈ ဢမ်ႇၸႂ်ၸုမ်းဝႃႉၸုမ်းလဵဝ်။ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းတၢင်ႇၸုမ်းၵေႃႈ ပေႃးၸတ်းပၢင်ပွႆးၸိုင် ယင်းၼေၾၢင်ႁၢင်ႈသိုၵ်းယူႇႁင်းၽႂ်မၼ်း ”- ဝႃႈၼႆ။

ၵဵဝ်ႇၵပ်း ပၢင်ပွႆးမိူင်းလႃး 30 ပီ ဢၼ်တေၸတ်းၼႂ်းႁၢင်လိူၼ် ၵျုၼ်ႊ ၼႆႉသေ ၸွမ်သိုၵ်း ၸူဝ်းၼၢႆႇဢူး လၢတ်ႈဝႃႈ – “ဢၼ်ၸုမ်းမိူင်းလႃးတေၸတ်းပၢင်ပွႆးငမ်းယဵၼ် 30 ပီ ၼႂ်းလိူၼ် ၵျုၼ်ႊသဵင်ႈၼႆႉၵေႃႈ လႆႈငိၼ်းဝႃႈ ၸိၵ်းၸွမ်ၸုမ်းမိူင်းလႃးတေသူင်ႇလိၵ်ႈမွၵ်ႇမႃးယူႇၼႆသေတႃႉ ယူႇတီႈတပ်ႉမတေႃႇ တေၵႂႃႇၶဝ်ႈႁူမ်ႈႁႃႉဢမ်ႇၵႂႃႇဢၼ်ဝႃႈၼၼ်ႉတႄႉ တေပႂ်ႉတူၺ်းၵွၼ်ႇ ၊ ပႆႇၸၢင်ႈတႅပ်းတတ်း” – ဝႃႈၼႆ။

ၸုမ်းဝႃႉ UWSA ၼႆႉ ယူႇတီႈပိူင်ငဝ်ႈပိုင်းမိူင်း 2008 ၵၢၼ်ၶွတ်ႇၽွတ်ႈၸိုင်ႈမိူင်း ၵၼ် 2 မတ်ႉတႃ 56 (ၸ) ၼၼ်ႉ တႅမ်ႈဝႆႉဝႃႈ  ႁူဝ်ပၢင်ႇ၊ မိူင်းမႂ်ႇ၊ ပၢင်ဝၢႆ၊ ၼႃးၽၢၼ်း၊ မၢၵ်ႇမၢင်လႄႈ ပၢင်သၢင်းၼႆႉ ၸႅၵ်ႇပဵၼ် 2 ၸေႈတွၼ်ႈသေ ပၼ်ဝႆႉပဵၼ် ၼႃႈလိၼ်ၽွင်းငမ်းတူဝ်ၵဝ်ႇ ဝႃႉ ဢၼ်မီးတႂ်ႈ လူင်ပွင်ၸိုင်ႈငဝ်ႈ ငုၼ်းၵုမ်းၵမ်- ဝႃႈၼႆ။ ၵူၺ်းၵႃႈ တေႃႇထိုင်ယၢမ်းလဵဝ် ဝႃႉ ၽွင်းငမ်းၼႃႈလိၼ်တူဝ်ၵဝ်ႇဝႆႉ လွတ်ႈလႅဝ်း လူၺ်ႈဢမ်ႇမီး လူင်ပွင်ၸိုင်ႈမၢၼ်ႈမႃးၶဝ်ႈၵႅဝ်ၸွမ်းသေဢိတ်း။

Ref; The Ladies News, Irrawaddy, cincds

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း